Ye wahi ghazwa hai jis mein mushrikeen-e-Ghatafan Ghazwa Khaibar se teen den pehle Nabi Kareem Sallallahu Alaihi Wasallam ki doodheel oontniyon ko bhaga kar le ja rahe thay. Ye Khaibar ki larayi se teen raat pehle ka waqia hai
.

Hum se Qutaiba Bin Saeed ne bayan kiya ‘ kaha hum se Hatim Bin Ismail ne bayan kiya ‘ in se Yazid Bin Abi Ubaid ne bayan kiya ‘ kaha mein ne Salama Bin Al-Akwa Radi Allahu Anhu se suna ‘ wo bayan karte thay ke mein fajar ki azan se pehle (Madina se bahar Ghaba ki taraf nikla) Rasul Allah Sallallahu Alaihi Wasallam ki doodh dene wali oontniyan Zat-ul-Qarad mein chara karti thin. Unhon ne bayan kiya ke raste mein mujhe Abdur Rahman Bin Auf Radi Allahu Anhu ke ghulam mile aur kaha ke Rasul Allah Sallallahu Alaihi Wasallam ki oontniyan pakar li gayin hain. Mein poocha ke kis ne pakra hai? Unhon ne bataya ke qabila-e-Ghatafan walon ne. Unhon ne bayan kiya ke phir mein ne teen martaba bari zor zor se pukara ‘ ya sabahaha! Unhon ne bayan kiya ke apni awaz mein ne Madina ke dono kinaron tak pahuncha di aur is ke baad mein seedha tezi ke sath dorta hua aage barha aur aakhir unhein ja liya. Is waqt wo janwarom ko pani pilane ke liye utre thay. Mein ne in par teer barsane shuru kar diye. Mein teer andazi mein mahir tha aur ye sher kehta jata tha ”Mein Ibn Al-Akwa hoon ‘ aaj zaleelon ki barbadi ka den hai“ mein yahi rajaz parhta raha aur aakhir oontniyan in se chura lein balkey tees chadaren in ki mere qabze mein aa gayin. Salama ne bayan kiya ke is ke baad Nabi Kareem Sallallahu Alaihi Wasallam bhi sahaba (Radi Allahu Anhum) ko sath le kar aa gaye. Mein ne arz kiya: Ya Rasul Allah! Mein ne teer maar maar kar in ko pani nahi diya aur wo abhi pyase hain. Aap furan in ke taaqub ke liye fauj bhej dijiye. Aap Sallallahu Alaihi Wasallam ne farmaya: Ai Ibn Al-Akwa! Jab tu kisi par qabu pa le to narmi ikhtiyar kar. Salama Radi Allahu Anhu ne bayan kiya ‘ phir hum wapas aa gaye aur Aap Sallallahu Alaihi Wasallam mujhe apni oontni par peeche bitha kar laye yahan tak ke hum Madina wapas aa gaye
.