Hum se Makki Bin Ibrahim ne bayan kiya ‘ kaha hum ko Yazid Bin Abi Ubaid ne khabar di ‘ unhein Salama Bin Akwa (Radi Allahu Anhu) ne khabar di ‘ unhon ne bayan kiya ke mein Madinah Munawwarah se Ghabba (Sham ke raste mein ek maqaam) ja raha tha ‘ Ghabba ki pahari par abhi mein pahuncha tha ke Abdur Rahman Bin Auf (Radi Allahu Anhu) ka ek ghulam (Rabah) mujhe mila. Mein ne kaha ‘ kya baat pesh aayi? Kehne laga ke Rasul Allah (Sallallahu Alaihi Wasallam) ki dodeil oontniyan (doodh dene waliyan) chheen li gayiin hain. Mein ne poocha kis ne chheena hai? Bataya ke qabila Ghatafan aur qabila Fazara ke logon ne. Phir mein ne teen martaba bahut zor se cheekh kar ”ya sabahaha ‘ ya sabahaha“ kaha. Itni zor se ke Madinah ke charon taraf meri awaz pahunch gayi. Is ke baad mein bahut tezi ke sath aage barha ‘ aur dakuon ko ja liya ‘ oontniyan un ke sath thiin ‘ mein ne un par teer barsana shuru kar diya ‘ aur kehne laga ‘ mein Akwa ka beta Salama hoon aur aaj ka din kameenon ki halakat ka din hai. Aakhir oontniyan mein ne un se chhara liin ‘ abhi wo log pani na peene paye thay aur unhein haank kar wapas la raha tha ke itne mein Rasul Allah (Sallallahu Alaihi Wasallam) bhi mujh ko mil gaye. Mein ne arz kiya: ya Rasul Allah! Daku pyase hain aur mein ne mare teeron ke pani bhi nahi peene diya. Is liye un ke peeche kuch logon ko bhej dein. Aap (Sallallahu Alaihi Wasallam) ne farmaya ‘ Ae Ibn-ul-Akwa! Tu un par ghalib ho chuka ab jaane de ‘ darguzar kar wo to apni qaum mein pahunch gaye jahan un ki mehmani ho rahi hai
.