Mujh se Muhammad Bin Bashar ne bayan kiya ‘ kaha hum se Ghundar ne ‘ in se Shuba ne ‘ in se Saad Bin Ibrahim ne ‘ unhon ne Abu Umama se suna ‘ unhon ne kaha ke mein ne Abu Saeed Khudri Radi Allahu Anhu se suna ‘ unhon ne bayan kiya ke Banu Quraiza ne Saad Bin Muaz Radi Allahu Anhu ko salis maan kar hathiyar daal diye to Rasul Allah Sallallahu Alaihi Wasallam ne unhein bulane ke liye aadmi bheja. Wo gadhe par sawar ho kar aaye. Jab is jagah ke qareeb aaye jise Nabi Kareem Sallallahu Alaihi Wasallam ne namaz parhne ke liye muntakhab kar rakha tha to Aap Sallallahu Alaihi Wasallam ne Ansar se farmaya ke apne sardar ke lene ke liye kharay ho jao. Ya (Aap Sallallahu Alaihi Wasallam ne yun farmaya) apne se behtar shakhs ke liye kharay ho jao. Is ke baad Aap Sallallahu Alaihi Wasallam ne in se farmaya ke Banu Quraiza ne tum ko salis maan kar hathiyar daal diye hain. Chunancha Saad Radi Allahu Anhu ne ye faisla kiya ke jitne log in mein jung ke qabil hain unhein qatl kar diya jaye aur in ke bachon aur aurton ko qaidi bana liya jaye. Nabi Kareem Sallallahu Alaihi Wasallam ne is par farmaya ke tum ne Allah ke faisle ke mutabiq faisla kiya ya ye farmaya ke jaise Badshah (yani Allah) ka hukm tha
.