Hum se Abdullah Abi Al-Aswad ne bayan kiya ‘ kaha hum se Mutamir Bin Sulaiman ne bayan kiya (dusri sanad Imam Bukhari Rahimahullah farmate hain) aur mujh se Khalifa Bin Khayyat ne bayan kiya ‘ kaha hum se Mutamir Bin Sulaiman ne bayan kiya ‘ ke mein ne apne walid se suna aur in se Anas Radi Allahu Anhu ne bayan kiya ke bator-e-hadiya sahaba (Radi Allahu Anhum) apne bagh mein se Nabi Kareem Sallallahu Alaihi Wasallam ke liye chand khajoor ke darakht muqarrar kar diye thay yahan tak ke Banu Quraiza aur Banu Nazir ke qabail fatah ho gaye (to Nabi Kareem Sallallahu Alaihi Wasallam ne in hadaya ko wapas kar diya) mere ghar walon ne bhi mujhe is khajoor ko, tamam ki tamam ya is ka kuch hissa lene ke liye Aap Sallallahu Alaihi Wasallam ki khidmat mein bheja. Aap Sallallahu Alaihi Wasallam ne wo khajoor Umm-e-Aiman Radi Allahu Anha ko de di thi. Itne mein wo bhi aa gayin aur kapra meri gardan mein daal kar kehne lagin ‘ qat'an nahi. Is zaat ki qasam! Jis ke siwa koi mabood nahi ye phal tumhein nahi milein ge. Ye Nabi Kareem Sallallahu Alaihi Wasallam mujhe inayait farma chuke hain. Ya isi tarah ke alfaz unhon ne bayan kiye. Is par Nabi Kareem Sallallahu Alaihi Wasallam ne in se farmaya ke tum mujh se is ke badle mein itne le lo. (Aur in ka maal unhein wapas kar do) lekin wo ab bhi yahi kahe ja rahi thin ke qat'an nahi, Khuda ki qasam! Yahan tak ke Nabi Kareem Sallallahu Alaihi Wasallam ne unhein, mera khayal hai ke Anas Radi Allahu Anhu ne bayan kiya ke is ka das guna dene ka wada farmaya (phir unhon ne mujhe chora) ya isi tarah ke alfaz Anas Radi Allahu Anhu ne bayan kiye
.