Humaid aur Sabit Bunani ne Anas Radi Allahu Anhu se bayan kiya ke Ghazwa Uhud ke mauqe par Nabi Kareem Sallallahu Alaihi Wasallam ke sar-e-mubarak mein zakham aa gaye thay to Aap Sallallahu Alaihi Wasallam ne farmaya ke wo qaum kaise falah paye gi jis ne apne nabi ko zakhmi kar diya. Is par (ayat) «laisa laka minal amri shaiun» nazil hui
.

Hum se Yahya Bin Abdullah Salmi ne bayan kiya, kaha hum ko Abdullah ne khabar di, kaha hum ko Ma'mar ne khabar di, unhein Zuhri ne, unhein Salim ne apne walid Abdullah Bin Umar (Radi Allahu Anhuma) se ke unhon ne Rasul Allah Sallallahu Alaihi Wasallam se suna, jab Nabi Kareem Sallallahu Alaihi Wasallam fajar ki aakhri rakat ke ruku se sar-e-mubarak uthate to ye dua karte ”Ai Allah! Falaan, falaan aur falaan (Safwan Bin Umayya, Suhail Bin Amr aur Harith Bin Hisham) ko apni rahmat se door kar de.“ Ye dua Aap «sami'allahu liman hamidah rabbana wa lakal hamd» ke baad karte thay. Is par Allah Ta'ala ne ayat «laisa laka minal amri shaiun» se «fainnahum zalimun» (Aal-e-Imran: 128) tak nazil ki
.