Hum se Ismail Bin Abdullah ne bayan kiya, kaha ke mujh se Malik ne bayan kiya, un se Umar Bin Ubaidullah ke Maula Abu-al-Nazr ne, un se Ubaid yani Ibn Hunain aur un se Abu Saeed Khudri Radi Allahu Anhu ne bayan kiya ke Rasul Allah Sallallahu Alaihi Wasallam minbar par baithe, farmaya ”apne ek naik bande ko Allah Ta'ala ne ikhtiyar diya ke duniya ki ne'maton mein se jo wo chahe ise apne liye pasand kar le ya jo Allah Ta'ala ke yahan hai (Akhirat mein) ise pasand kar le. Is bande ne Allah Ta'ala ke haan milne wali cheez ko pasand kar liya.“ Is par Abu Bakr Radi Allahu Anhu rone lage aur arz kiya hamare maan baap aap par fida hon. (Abu Saeed Radi Allahu Anhu kehte hain) humein Abu Bakr Radi Allahu Anhu ke is rone par hairat hui, baaz logon ne kaha is buzurg ko dekhiye Nabi Kareem Sallallahu Alaihi Wasallam to ek bande ke mutaliq khabar de rahe hain jise Allah Ta'ala ne duniya ki ne'maton aur jo Allah ke paas hai is mein se kisi ke pasand karne ka ikhtiyar diya tha aur ye keh rahe hain ke hamare maan baap aap par fida hon. Lekin Rasul Allah Sallallahu Alaihi Wasallam hi ko in do cheezon mein se ek ka ikhtiyar diya gaya aur Abu Bakr Radi Allahu Anhu hum mein sab se zyada is baat se waqif thay aur Rasul Allah Sallallahu Alaihi Wasallam ne farmaya tha ke logon mein sab se zyada apni suhbat aur mal ke zariya mujh par ihsan karne wale Abu Bakr hain. Agar mein apni ummat mein se kisi ko apna khaleel bana sakta to Abu Bakr Radi Allahu Anhu ko banata albatta Islami rishta in ke sath kafi hai. Masjid mein koi darwaza ab khula hua baqi na rakkha jaye siwaye Abu Bakr ke ghar ki taraf khulne wale darwaze ke
.