Yeh hadeeth Abdullah bin Abbas Radi Allahu Anhuma ne Nabi Kareem Sallallahu Alaihi Wa Sallam se riwayat ki hai.

Mujh se Abdullah bin Muhammad ne bayan kiya, kaha hum se Abu Aamir ne bayan kiya, un se Falih bin Sulaiman ne bayan kiya, kaha ke mujh se Salim Abu al-Nadr ne bayan kiya, un se Busr bin Sa'id ne aur un se Abu Sa'id Khudri Radi Allahu Anhu ne bayan kiya ke Rasoolullah Sallallahu Alaihi Wa Sallam ne khutba diya aur farmaya ke Allah Ta'ala ne apne ek bande ko dunya mein aur jo kuch Allah ke pas aakhirat mein hai in dono mein se kisi ek ka ikhtiyar diya to is bande ne woh ikhtiyar kar liya jo Allah ke pas tha. Unhon ne bayan kiya ke is par Abu Bakr Radi Allahu Anhu rone lage. Abu Sa'id kehte hain ke hum ko in ke rone par hairat hui ke Nabi Kareem Sallallahu Alaihi Wa Sallam to kisi bande ke mutalliq khabar de rahe hain jise ikhtiyar diya gaya tha, lekin baat yeh thi ke khud Aap Sallallahu Alaihi Wa Sallam hi woh bande thay jinhein ikhtiyar diya gaya tha aur (waqiatan) Abu Bakr Radi Allahu Anhu hum mein sab se zyada janne wale thay. Nabi Kareem Sallallahu Alaihi Wa Sallam ne ek martaba farmaya ke apni suhbat aur maal ke zariye mujh par Abu Bakr ka sab se zyada ehsan hai aur agar mein apne Rabb ke siwa kisi ko jaani dost bana sakta to Abu Bakr ko banata. Lekin Islam ka bhai chara aur Islam ki mohabbat in se kafi hai. Dekho masjid ki taraf tamam darwaze (jo Sahaba ke gharon ki taraf khulte thay) sab band kar diye jayein. Sirf Abu Bakr ka darwaza rehne do.