Ae Maryam! Apne Rabb ki ibadat karti reh aur sajda karti reh aur ruku karne walon ke sath ruku karti reh ye (waqiaat) ghaib ki khabron mein se hain jo hum tere upar wahi kar rahe hain aur tu in logon ke pas nahi tha jab wo apne qalam daal rahe thay ke in mein se kaun Maryam ko paalay aur tu na is waqt un ke pas tha jab wo aapas mein ikhtilaf kar rahe thay. «yakfulu» «yazummu» ke maani mein bolte hain yani mila leway. «kaffalaha» yani «zammaha» mila liya (baaz qiratoon mein) takhfeef ke sath hai. Ye wo kafalat hai jo qarzon waghaira mein ki jati hai yani zamanat wo doosra maani hai

Mujh se Ahmad Bin Abi Rajaa ne bayan kiya kaha hum se Nazr ne bayan kiya un se Hisham kaha ke mujhe mere walid ne khabar di kaha ke mein ne Abdullah Bin Jafar se suna kaha ke mein ne Ali (Radi Allahu Anhu) se suna aap ne bayan kiya ke mein ne Nabi Kareem (Sallallahu Alaihi Wasallam) se suna aap (Sallallahu Alaihi Wasallam) farma rahe thay ke Maryam Bint-e-Imran (apne zamana mein) sab se behtareen khatoon thien aur is ummat ki sab se behtareen khatoon Khadija hain (Radi Allahu Anha)