(Aur farmaya) «iz qalatil mala-ikatu ya maryamu innallaha yubashiruki bikalimatin» "(Aur wo waqt yaad kar) jab farishton ne kaha ke ae Maryam! Allah tujh ko khushkhabri de raha hai apni taraf ek kalma ki." (Aur farmaya) «innallahas tafa adama wa nuhan wa aala ibrahima wa aala imrana alal alameena» "Beshak Allah ne Adam aur Nooh aur Aal-e-Imran ko tamam jahan par barguzida banaya." Aayat «yarzuqu man yashau bighairi hisabin» tak. Abdullah Bin Abbas (Radi Allahu Anhuma) ne kaha ke «aal-e-imran» se murad imandar log murad hain jo Imran ki aulad mein hon jaise «aal-e-ibrahim» aur «aal-e-yasin» aur «aal-e-muhammad sallallahu alaihi wasallam» se wohi log murad hain jo momin hon. Ibn Abbas (Radi Allahu Anhuma) kehte hain. Allah Ta'ala ne farmaya "Ibrahim (Alaihis Salam) ke nazdeek wale wohi log hain jo un ki raah par chalte hain yani jo momin mowahhid hain." «aal» ka lafz asal mein «ahlun» tha. «aal-e-yaqub» yani «ahlu yaquba.» (H ko hamza se badal diya) tasgheer mein phir asal ki taraf le jate hain tab «uhaillum» kehte hain

Hum se Abu Al-Yaman ne bayan kiya kaha hum ko Shuaib ne khabar di un se Zuhri ne bayan kiya kaha unhon ne kaha ke mujh se Saeed Bin Musayyib ne bayan kiya kaha ke Abu Hurairah (Radi Allahu Anhu) ne bayan kiya ke mein ne Rasul Allah (Sallallahu Alaihi Wasallam) se suna Aap (Sallallahu Alaihi Wasallam) ne farmaya "Har ek Bani Adam jab paida hota hai to paidaish ke waqt Shaitan ise chouta hai aur baccha Shaitan ke choune se zor se cheekhta hai. Siwaye Maryam aur un ke bete Isa (Alaihimas Salam) ke." Phir Abu Hurairah (Radi Allahu Anhu) ne bayan kiya ke (is ki wajah Maryam (Alaihimas Salam) ki walida ki dua hai ke ae Allah!) mein ise (Maryam ko) aur is ki aulad ko Shaitan-e-Rajeem se teri panah mein deti hoon