Kyunke Aap (Sallallahu Alaihi Wasallam) ne Suffa walon (muhtajon) aur bewa aurton ki khidmat Fatima (Radi Allahu Anha) ke aaram par muqaddam rakhi. Jab unhon ne qaidiyon mein se ek khidmatgar Aap se manga aur apni takleef ka zikr kiya, jo aata goondhne aur peesne mein hoti hai. Aap (Sallallahu Alaihi Wasallam) ne un ki zarooriyat ko Allah ke bharose par chhod diya
.

Hum se Badal Bin Muhabbir ne bayan kiya, kaha hum ko Shuba ne khabar di, kaha ke mujhe Hakam ne khabar di, kaha ke mein ne Ibn Abi Laila se suna, kaha mujh se Ali (Radi Allahu Anhu) ne bayan kiya ke Fatima (Radi Allahu Anha) ko chakki peesne ki bahut takleef hoti. Phir unhein maloom hua ke Rasul Allah (Sallallahu Alaihi Wasallam) ke paas kuch qaidi aaye hain. Is liye wo bhi un mein se ek londi ya ghulam ki darkhwast le kar hazir huieen. Lekin Aap (Sallallahu Alaihi Wasallam) maujood nahi thay. Wo Aisha (Radi Allahu Anha) se is ke mutaliq keh kar (wapas) chali aieen. Phir jab Aap (Sallallahu Alaihi Wasallam) tashreef laye to Aisha (Radi Allahu Anha) ne Aap (Sallallahu Alaihi Wasallam) ke samne un ki darkhwast pesh kar di. Ali (Radi Allahu Anhu) kehte hain ke ise sun kar Aap (Sallallahu Alaihi Wasallam) hamare yahan (raat hi ko) tashreef laye. Jab hum apne bisteron par lait chuke thay (jab hum ne Aap Sallallahu Alaihi Wasallam ko dekha (to hum log khade hone lage to Aap Sallallahu Alaihi Wasallam ne farmaya ke jis tarah ho waise hi laite raho. (Phir Aap Sallallahu Alaihi Wasallam mere aur Fatima Radi Allahu Anha ke beech mein baith gaye aur itne qareeb ho gaye ke) mein ne aap ke dono qadmon ki thandak apne seene par payi. Is ke baad Aap (Sallallahu Alaihi Wasallam) ne farmaya ke jo kuch tum logon ne (londi ya ghulam) mange hain, mein tumhein is se behtar baat kyun na bataoon, jab tum dono apne bister par lait jao (to sone se pehle) Allahu Akbar 34 martaba aur Alhamdulillah 33 martaba aur Subhan Allah 33 martaba parh liya karo, ye amal behtar hai is se jo tum dono ne manga hai
.