Allah Ta'ala ne (Surah Al-Taubah mein) farmaya "Yahlifuna billahi lakum" "Wo log aap ke samne Allah ki qasam khayein ge, tum ko razi karne ke liye." Aur Allah Ta'ala ne (Surah Nisa mein) farmaya "Summa ja-ooka yahlifuna billahi in aradna illa ihsanan wa taofeeqa" "Phir tere paas Allah ki qasam khate aate hain ke hamari niyat to bhalayi aur milap ki thi." Qasam mein yun kaha jaye "Billahi", "Tallahi", "Wallahi" (Allah ki qasam) aur Nabi Kareem (Sallallahu Alaihi Wasallam) ne farmaya "Aur wo shaks jo Allah ki jhooti qasam asar ke baad khata hai aur Allah ke siwa kisi ki qasam na khayein."
.

Hum se Ismail Bin Abdullah ne bayan kiya, kaha ke mujh se Imam Malik ne bayan kiya, un se un ke chacha Abu Suhail ne, un se un ke walid ne aur unhon ne Talha Bin Ubaidullah (Radi Allahu Anhu) se suna, Aap ne bayan kiya ke ek sahab (Dimam Bin Salaba) Nabi Kareem (Sallallahu Alaihi Wasallam) ki khidmat mein aaye aur Islam ke mutalliq poochne lage. Aap (Sallallahu Alaihi Wasallam) ne farmaya "Din aur raat mein panch namazein ada karna." Us ne poocha kya is ke alawa bhi mujh par kuch namaz aur zaroori hain? Aap (Sallallahu Alaihi Wasallam) ne farmaya "Nahi ye doosri baat hai ke tum nafl parho." Phir Rasul Allah (Sallallahu Alaihi Wasallam) ne farmaya "Aur Ramazan ke roze hain." Us ne poocha kya is ke alawa bhi mujh par kuch (roze) wajib hain? Aap (Sallallahu Alaihi Wasallam) ne farmaya nahi "Swa is ke jo tum apne taur par nafl rakkho." Talha (Radi Allahu Anhu) ne bayan kiya ke un ke samne Rasul Allah (Sallallahu Alaihi Wasallam) ne zakat ka bhi zikar kiya to unhon ne poocha, kya (jo farz zakat aap ne batayi hai) is ke alawa bhi mujh par koi khairat wajib hai? Aap (Sallallahu Alaihi Wasallam) ne farmaya "Nahi, swa is ke jo tum khud apni taraf se nafl do." Is ke baad wo sahab ye kehte hue jane lage ke Allah gawah hai na mein in mein koi zyada-ti karoon ga aur na koi kami. Rasul Allah (Sallallahu Alaihi Wasallam) ne farmaya "Agar us ne sach kaha hai to kamyab hua."
.