Aur Allah Ta'ala ne (Surah Al-Noor mein) farmaya "Wala taqbaloo lahum shahadatan abadan wa ula-ika humul-fasiqoon. Illallazina taboo" "Aise tohmat lagane walon ki gawahi kabhi na mano, yahi log to badkar hain, magar jo tauba kar lein." To Umar (Radi Allahu Anhu) ne Abu Bakra, Shibl Bin Maabad (un ke maan jaye bhai) aur Nafi Bin Haris ko had lagayi Mugheera par tohmat rakhne ki wajah se. Phir un se tauba karayi aur kaha jo koi tauba kar le is ki gawahi qabool ho gi. Aur Abdullah Bin Utba, Umar Bin Abdul Aziz, Saeed Bin Jubair, Taus, Mujahid, Shabi, Ikrimah, Zuhri, Muharib Bin Disar, Shureih aur Moawiya Bin Qurrah ne bhi tauba ke baad is ki gawahi ko jaiz rakkha hai aur Abu-uz-Zinad ne kaha hamare nazdeek Madinah Tayyiba mein to ye hukm hai jab "qazif" apne qoul se phir (mukar) jaye aur istighfar kare to is ki gawahi qabool ho gi aur Shabi aur Qatada ne kaha jab wo apne aap ko jhutlaye aur is ko had par jaye to is ki gawahi qabool ho gi. Aur Sufyan Sawri ne kaha jab ghalam ko had-e-qazf lag jaye phir is ke baad wo azad ho jaye to is ki gawahi qabool ho gi. Aur jis ko had-e-qazf lagi ho agar wo qazi banaya jaye to is ka faisla nafiz ho ga. Aur baaz log (Imam Abu Hanifa Rahimahullah) kehte hain qazif ki gawahi qabool na ho gi go wo tauba kar le. Phir ye bhi kehte hain ke baghair do gawahon ke nikah durust nahi hota aur agar had-e-qazf lage hue gawahon ki gawahi se nikah kiya to nikah durust ho ga. Agar do ghalamou ki gawahi se kiya to durust na ho ga aur in hi logon ne had-e-qazf pare hue logon ki aur londi ghalam ki gawahi Ramazan ke chand ke liye durust rakkhi hai. Aur is bab mein ye bayan hai ke "qazif" ki tauba kyun kar maloom ho gi aur Aap (Sallallahu Alaihi Wasallam) ne to zani ko ek saal ke liye jala-watan kiya aur Aap (Sallallahu Alaihi Wasallam) ne Kaab Bin Malik (Radi Allahu Anhu) aur un ke do sathiyon se mana kar diya koi baat na kare. Pachas raatein isi tarah guzar gayein
.

Hum se Ismail ne bayan kiya, kaha mujh se Abdullah Bin Wahb ne bayan kiya aur un se Yunus ne aur Lais ne bayan kiya ke mujh se Yunus ne bayan kiya aur un se Ibn Shihab ne, unhein Urwah Bin Zubair ne khabar di ke ek aurat ne Fatah Makkah par chori kar li thi. Phir ise Rasul Allah (Sallallahu Alaihi Wasallam) ki khidmat mein hazir kiya gaya aur Aap (Sallallahu Alaihi Wasallam) ke hukm ke mutabiq is ka hath kaat diya gaya. Aisha (Radi Allahu Anha) ne bayan kiya ke phir unhon ne acchi tarah tauba kar li aur shadi kar li. Is ke baad wo aati theen to mein un ki zaroorat Rasul Allah (Sallallahu Alaihi Wasallam) ki khidmat mein pesh kar diya karti thi
.