Aur Ubaidah Bin Umar Salmani ne kaha agar hiba karne wala mar jaye aur mohoob par mohoob-lahu ka qabza ho gaya, wo zinda ho phir mar jaye to wo mohoob-lahu ke warisou ka ho ga aur agar mohoob-lahu ka qabza hone se peshtar wahab mar jaye to wo wahab ke warisou ko mile ga. Aur Imam Hasan Basri ne kaha ke fareeqain mein se khwah kisi ka bhi pehle intiqal ho jaye, hiba mohoob-lahu ke wurasa ko mile ga. Jab mohoob-lahu ka wakeel is par qabza kar chuka ho
.

Hum se Ali Bin Abdullah ne bayan kiya, kaha hum se Sufyan Bin Uyaina ne bayan kiya, kaha hum se Muhammad Bin Al-Munkadir ne bayan kiya, unhon ne Jabir (Radi Allahu Anhu) se suna. Aap ne bayan kiya ke Nabi Kareem (Sallallahu Alaihi Wasallam) ne mujh se wada farmaya, agar Bahrain ka mal (jizya ka) aaya to mein tumhein itna itna teen lap mal doon ga. Lekin Bahrain se mal aane se pehle hi Aap (Sallallahu Alaihi Wasallam) wafat farma gaye aur Abu Bakr (Radi Allahu Anhu) ne ek munadi se ye elan karne ke liye kaha ke jis se Nabi Kareem (Sallallahu Alaihi Wasallam) ka koi wada ho ya Aap (Sallallahu Alaihi Wasallam) par is ka koi qarz ho to wo hamare paas aaye. Chunanchay mein Aap (Sallallahu Alaihi Wasallam) ke yahan gaya aur kaha ke Nabi Kareem (Sallallahu Alaihi Wasallam) ne mujh se wada kiya tha. To unhon ne teen lap bhar kar mujhe diye
.