Aur Abdullah Bin Umar (Radi Allahu Anhuma) ne kaha ke mein ek sarkash ont par sawaar tha. Nabi Kareem (Sallallahu Alaihi Wasallam) ne pehle to ise khareeda phir farmaya "Abdullah ye ont tu le le."
.

Hum se Qutaiba Bin Saeed ne bayan kiya, kaha hum se Lais ne bayan kiya Ibn Abi Mulaika se aur wo Miswar Bin Makhrama (Radi Allahu Anhu) se ke Rasul Allah (Sallallahu Alaihi Wasallam) ne chand qabaein taqseem kein aur Makhrama (Radi Allahu Anhu) ko is mein se ek bhi nahi di. Unhon ne (mujh se) kaha, bete chalo, Rasul Allah (Sallallahu Alaihi Wasallam) ki khidmat mein chalein. Mein un ke sath chala. Phir unhon ne kaha ke andar jao aur Nabi Kareem (Sallallahu Alaihi Wasallam) se arz karo ke mein Aap ka muntazir khara hua hoon, chunanchay mein andar gaya aur Nabi Kareem (Sallallahu Alaihi Wasallam) ko bla laya. Aap (Sallallahu Alaihi Wasallam) is waqt unhein qabaon mein se ek qaba pehne hue thay. Aap (Sallallahu Alaihi Wasallam) ne farmaya ke mein ne ye tumhare liye chhupa rakkhi thi, lo ab ye tumhari hai. Miswar ne bayan kiya ke (mere walid) Makhrama (Radi Allahu Anhu) ne qaba ki taraf dekha. Aap (Sallallahu Alaihi Wasallam) ne farmaya "Makhrama! khush ho ya nahi?"
.