Hum se Abdullah Bin Abdul Wahhab ne bayan kiya, kaha hum se Hammad Bin Zaid ne bayan kiya, un se Ayub Sakhtiyani ne aur un se Abdullah Bin Abi Mulika ke Nabi Kareem (Sallallahu Alaihi Wasallam) ki khidmat mein deeba ki kuch qabain tuhfa ke taur par aayi theen. Jin mein sone ki ghundiyan lagi hui theen, unhein Nabi Kareem (Sallallahu Alaihi Wasallam) ne apne chand ashab mein taqseem farma diya aur ek qaba Makhrama Bin Naufal (Radi Allahu Anhu) ke liye rakh li. Phir Makhrama (Radi Allahu Anhu) aaye aur un ke sath un ke sahibzade Miswar Bin Makhrama (Radi Allahu Anhu) bhi thay. Aap darwaze par khade ho gaye aur kaha ke mera naam le kar Nabi Kareem (Sallallahu Alaihi Wasallam) ko bula la. Aap (Sallallahu Alaihi Wasallam) ne un ki awaz suni to qaba le kar bahar tashreef laye aur is ki ghundiyan un ke samne kar deen. Phir farmaya: Abu Miswar! Ye qaba mein ne tumhare liye chhupa kar rakh li thi. Makhrama (Radi Allahu Anhu) zara taiz tabiyat ke aadmi thay. Ibn Aliyya ne Ayub ke waste se ye hadees (mursalan hi) riwayat ki hai. Aur Hatim Bin Wardan ne bayan kiya ke hum se Ayub ne bayan kiya, un se Ibn Abi Mulika un se Miswar (Radi Allahu Anhu) ne ke Nabi Kareem (Sallallahu Alaihi Wasallam) ke yahan kuch qabain aieen theen, is riwayat ki mutabi-at Laith ne Ibn Abi Mulika se ki hai
.