Hum se Ibrahim Bin Al-Munzir ne bayan kiya, un se Abu Damrah ne bayan kiya, un se Musa Bin Uqbah ne bayan kiya, un se Nafi ne aur un se Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, teen aadmi kahin chale ja rahe thay ke barish ne un ko aa liya. Teenon ne ek pahar ki ghar mein panah lay li, achanak oopar se ek chattan ghar ke samne aa giri, aur unhein (ghar ke andar) bilkul band kar diya. Ab un mein se baaz logon ne kaha ke tum log ab apne aise kaamon ko yaad karo. Jinhein tum ne khalis Allah Ta'ala ke liye kiya ho aur isi kaam ka wasta day kar Allah Ta'ala se dua karo. Mumkin hai is tarah Allah Ta'ala tumhari is musibat ko taal day, chunanche ek shakhs ne dua shuru ki. Ay Allah! mere walidain bahut boorhe thay aur mere chhote chhote bacche bhi thay. Mein in ke liye (janwar) charaya karta tha. Phir jab wapas hota to doodh dohta. Sab se pehle, apni aulad se bhi pehle, mein walidain hi ko doodh pilata tha. Ek din dair ho gayi aur raat gaye ghar wapas aya, us waqt mere maan baap so chuke thay. Mein ne mamool ke mutabiq doodh doha aur (is ka piyala lay kar) mein in ke sarhane khara ho gaya. Mein ne pasand nahi kiya ke unhein jagaon. Lekin apne bacchon ko bhi (walidain se pehle) pilana mujhe pasand nahi tha. Bacche subah tak mere qadmon par pare tarapte rahe. Pas agar tere nazdeek bhi mera ye amal sirf teri raza ke liye tha to (ghar se is chattan ko hata kar) humare liye itna rasta bana day ke aasman nazar aa sakay. Chunanche Allah Ta'ala ne rasta bana diya aur unhein aasman nazar aane laga. Doosre ne kaha ay Allah! meri ek chachazad behn thi. Mard auraton se jis tarah ki intihati mahabbat kar sakte hain, mujhe us se itni hi mahabbat thi. Mein ne ise apne paas bulana chaha lekin wo sau dinar dene ki surat razi hui. Mein ne koshish ki aur wo raqam jama ki. Phir jab mein us ke donon paon ke darmiyan baith gaya, to us ne mujh se kaha, ay Allah ke bande! Allah se dar aur is ki mohar ko haq ke baghair na tor. Mein ye sunte hi door ho gaya, agar mera ye amal tere ilm mein bhi teri raza hi ke liye tha to (is ghar se) patthar ko hata day. Pas ghar ka munh kuch aur khula. Ab teesra bola ke ay Allah! mein ne ek mazdoor teen faraq chawal ki mazdoori par muqarrar kiya tha jab us ne apna kaam poora kar liya to mujh se kaha ke ab meri mazdoori mujhe de-day. Mein ne pesh kar di lekin us waqt wo inkar kar baitha. Phir mein barabar us ki ujrat se kasht karta raha aur is ke natija mein barhne se bail aur charwahe mere paas jama ho gaye. Ab wo shakhs aya aur kehne laga ke Allah se dar! mein ne kaha ke bail aur is ke charwahe ke paas ja aur ise lay lay. Us ne kaha Allah se dar! aur mujh se mazaq na kar, mein ne kaha ke mazaq nahi kar raha hoon. (Ye sab tera hi hai) ab tum ise lay jao. Pas us ne in sab par qabza kar liya. Ilahi! agar tere ilm mein bhi mein ne ye kaam teri khushnoodi hi ke liye kiya tha to tu is ghar ko khol day. Ab wo ghar poora khul chuka tha. Abu Abdullah (Imam Bukhari Rahimahullah) ne kaha ke Ibn Uqbah ne Nafi se (apni riwayat mein «فبغيت» ke bajaye) «فسعيت» naqal kiya hai
.