Hum se Musaddad ne aur un se Abdul Wahid ne isi tarah bayan kiya, aur kaha ke har is cheez mein (shufa hai) jo taqseem na hui ho. Is ki mutabiat Hisham ne Mamar ke wasita se ki hai aur Abdul Razzaq ne ye lafz kahe ke ”har mal mein“ is ki riwayat Abdur Rahman Bin Ishaq ne Zuhri se ki hai
.

Hum se Yaqub Bin Ibrahim ne bayan kiya, kaha ke hum se Abu Asim ne bayan kiya kaha ke hum ko Ibn Juraij ne khabar di, kaha ke mujhe Musa Bin Uqba ne khabar di, unhein Nafay ne aur unhein Abdullah Bin Umar (Radi Allahu Anhuma) ne Nabi Kareem (Sallallahu Alaihi Wasallam) se ke Aap (Sallallahu Alaihi Wasallam) ne farmaya, teen shakhs kahin bahar ja rahe thay ke achanak barish hone lagi. Unhon ne ek pahar ke ghar mein ja kar panah li. Ittefaq se pahar ki ek chattan oopar se larkhi (aur is ghar ke munh ko band kar diya jis mein ye teenon panah liye hue thay) ab ek ne doosre se kaha ke apne sab se achay amal ka jo tum ne kabhi kiya ho, naam le kar Allah Ta'ala se dua karo. Is par un mein se ek ne ye dua ki ”Ae Allah! mere maan baap bahut hi boodhay thay. Mein bahar le ja kar apne maweshi charata tha. Phir jab sham ko wapas aata to un ka doodh nikalta aur bartan mein pehle apne walidain ko pesh karta. Jab mere walidain pee chukte to phir bachon ko aur apni biwi ko pilata. Ittefaq se ek raat wapsi mein dair ho gayi aur jab mein ghar lauta to walidain so chuke thay. Is ne kaha ke phir mein ne pasand nahi kiya ke unhein jagaoon bacche mere qadmon mein bhookay pare ro rahe thay. Mein barabar doodh ka piyala liye walidain ke samne isi tarah khara raha yahan tak ke subah ho gayi. Ae Allah! agar tere nazdeek bhi mein ne ye kaam sirf teri raza hasil karne ke liye kiya tha, to hamare liye is chattan ko hata kar itna rasta to bana de ke hum aasman ko to dekh sakein“ Nabi Kareem (Sallallahu Alaihi Wasallam) ne farmaya. Chunanche wo patthar kuch hat gaya. Doosre shakhs ne dua ki ”Ae Allah! tu khoob janta hai ke mujhe apne chacha ki ek larki se itni zyada mohabbat thi jitni ek mard ko kisi aurat se ho sakti hai. Is larki ne kaha tum mujh se apni khwahish is waqt tak poori nahi kar sakte jab tak mujhe sau ashrafi na de do. Mein ne un ke hasil karne ki koshish ki, aur aakhir itni ashrafi jama kar li. Phir jab mein is ki donon ranon ke darmiyan baitha. To wo boli, Allah se dar, aur mahr ko najayiz tareeqe par na torr. Is par mein khara ho gaya aur mein ne usay chor diya. Ab agar tere nazdeek bhi mein ne ye amal teri hi raza ke liye kiya tha to hamare liye (nikalne ka) rasta bana de“ Nabi Kareem (Sallallahu Alaihi Wasallam) ne farmaya. Chunanche wo patthar do tihayi hat gaya. Teesri shakhs ne dua ki ”Ae Allah! tu janta hai ke mein ne ek mazdoor se ek farq jawar par kaam karaya tha. Jab mein ne is ki mazdoori usay de di to is ne lene se inkar kar diya. Mein ne is jawar ko le kar bo diya (kheti jab kati to is mein itni jawar paida hui ke) is se mein ne ek bail aur ek charwaha khareed liya. Kuch arsa baad phir is ne aa kar mazdoori mangi ke Allah ke bande mujhe mera haqq dede. Mein ne kaha ke is bail aur is ke charwahe ke paas jao ke ye tumhare hi milk hain. Is ne kaha ke mujh se mazak karte ho. Mein ne kaha ”mein mazak nahi karta“ waqai ye tumhare hi hain. To ae Allah! agar tere nazdeek ye kaam mein ne sirf teri raza hasil karne ke liye kiya tha to yahan hamare liye (is chattan ko hata kar) rasta bana de. Chunanche wo ghar poora khul gaya aur wo teenon shakhs bahar aa gaye
.