Hum se Ibrahim Bin al-Munzir ne bayan kiya, unhon ne kaha ke mujh se Maeen Bin Isa ne bayan kiya, kaha mujh se Imam Malik ne bayan kiya, un se Ibn Shihab ne, un se Humaid Bin Abdur Rahman ne bayan kiya aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya jo Allah ke raste mein do cheezain kharch kare ga usay farishte jannat ke darwazon se bulayein ge ke ae Allah ke bande! ye darwaza accha hai phir jo shakhs namazi ho ga usay namaz ke darwaza se bulaya ga jo mujahid ho ga usay jihad ke darwaze se bulaya jaye jo roza dar ho ga usay «Bab al-Rayyan» se bulaya jaye ga aur jo zakat ada karne wala ho ga usay zakat ke darwaza se bulaya jaye ga. Is par Abu Bakr (Radi Allahu Anhu) ne poocha mere maan baap Aap (Sallallahu Alaihi Wasallam) par fida hon ya Rasul Allah (Sallallahu Alaihi Wasallam)! jo log in darwazon (mein se kisi ek darwaza) se bulaye jayein ge mujhe un se bahas nahi, aap ye farmayein ke kya koi aisa bhi ho ga jisay in sab darwazon se bulaya jaye ga ? Aap (Sallallahu Alaihi Wasallam) ne farmaya ke han aur mujhe umeed hai ke aap bhi unhein mein se hon ge
.