Hum se Abdullah Bin Yusuf ne bayan kiya, unhon ne kaha hum ko Imam Malik ne khabar di, unhein Hisham Bin Urwah ne, unhein un ke walid (Urwah Bin Zubair) ne ke mein ne Nabi Kareem (Sallallahu Alaihi Wasallam) ki zauja mutahira Aisha Siddiqa (Radi Allahu Anha) se poocha jab ke abhi mein nau-umr tha ke Allah Ta'ala ka irshad ”Safa aur Marwah dono Allah Ta'ala ki nishaniyan hain is liye jo shakhs Bait Allah ka Haj ya Umrah kare is ke liye un ki sayee karne mein koi gunah nahi“ is liye mein samajhta hoon ke agar koi un ki sayee na kare to is par koi gunah na ho ga. Ye sun kar Aisha Siddiqa (Radi Allahu Anha) ne farmaya ke hargiz nahi. Agar matlab ye hota jaisa ke tum bata rahe ho phir to un ki sayee na karne mein waqeyi koi haraj nahi tha, lekin ye ayat to Ansar ke bare mein nazil hui hai jo Manat but ke naam ka ihram bandhte thay jo Qudaid ke muqabil mein rakha hua tha wo Safa aur Marwah ki sayee ko acha nahi samajhte thay, jab Islam aaya to unhon ne Rasul Allah (Sallallahu Alaihi Wasallam) se is ke bare mein poocha aur is par Allah Ta'ala ne ye ayat nazil farmayi ke ”Safa aur Marwah dono Allah ki nishaniyan hain is liye jo shakhs Bait Allah ka Haj ya Umrah kare is ke liye un ki sayee karne mein koi gunah nahi“ Sufyan aur Abu Muawiyah ne Hisham se ye ziyadati nikali hai ke jo koi Safa Marwah ka phera na kare to Allah is ka Haj aur Umrah poora na kare ga
.