Hum se Abu Naeem ne bayan kiya, kaha ke hum se Hammam ne bayan kiya, un se Ata Bin Abi Rabah ne bayan kiya, unhon ne kaha ke mujh se Safwan Bin Ya'la Bin Umayya ne bayan kiya, un se un ke walid ne ke Nabi Kareem (Sallallahu Alaihi Wasallam) Jirranah mein thay, to Aap (Sallallahu Alaihi Wasallam) ki khidmat mein ek shakhs hazir hua jubba pehne hue aur is par khuloog ya zardi ka nishan tha. Is ne poocha mujhe apne Umrah mein Aap (Sallallahu Alaihi Wasallam) kis tarah karne ka hukum dete hain? Is par Allah Ta'ala ne Nabi Kareem (Sallallahu Alaihi Wasallam) par wahy nazil ki aur Aap (Sallallahu Alaihi Wasallam) par kapra daal diya gaya, meri bari aarzu thi ke jab Nabi Kareem (Sallallahu Alaihi Wasallam) par wahy nazil ho rahi ho to mein Aap (Sallallahu Alaihi Wasallam) ko dekhoon. Umar (Radi Allahu Anhu) ne farmaya yahan ao Nabi Kareem (Sallallahu Alaihi Wasallam) par jab wahy nazil ho rahi ho, is waqt tum Nabi Kareem (Sallallahu Alaihi Wasallam) ko dekhne ke aarzu mand ho? Mein ne kaha haan! Unhon ne kapre ka kinara uthaya aur mein ne is mein se Aap (Sallallahu Alaihi Wasallam) ko dekha Aap zor zor se kharrate le rahe thay, mera khayal hai ke unhon ne bayan kiya ”jaise ont ke saans ki awaz hoti hai“ phir jab wahy utarni band hui to Aap (Sallallahu Alaihi Wasallam) ne farmaya ke poochne wala kahan hai jo Umrah ke bare mein poochta tha? Apna jubba utar de, khuloog ke asar ko dho daal aur (zafran ki) zardi saaf kar le aur jis tarah Haj mein karte ho isi tarah is mein bhi karo
.