Aur Ata Bin Abi Rabah ne Jabir (Radi Allahu Anhu) se bayan kiya ke Rasul Allah (Sallallahu Alaihi Wasallam) ne apne ashab ko ye hukum diya ke Haj ke ihram ko Umrah se badal dein aur tawaf (Bait Allah aur Safa-o-Marwah) karein phir baal tarshwa kar ihram se nikal jayein
.

Hum se Ishaq Bin Ibrahim ne bayan kiya, un se Jareer ne, un se Ismail ne, un se Abdullah Bin Abi Aufa ne bayan kiya ke Rasul Allah (Sallallahu Alaihi Wasallam) ne Umrah bhi kiya aur hum ne bhi Aap (Sallallahu Alaihi Wasallam) ke sath Umrah kiya, chunancha jab Aap (Sallallahu Alaihi Wasallam) Makkah mein dakhil hue to Aap (Sallallahu Alaihi Wasallam) ne pehle (Bait Allah ka) tawaf kiya aur Aap (Sallallahu Alaihi Wasallam) ke sath hum ne bhi tawaf kiya, phir Safa aur Marwah aaye aur hum bhi Aap (Sallallahu Alaihi Wasallam) ke sath aaye. Hum Aap (Sallallahu Alaihi Wasallam) ki Makkah walon se hifazat kar rahe thay ke kaheen koi kafir teer na chala de, mere ek saathi ne Ibn Abi Aufa se poocha kya Nabi Kareem (Sallallahu Alaihi Wasallam) Kaabah mein andar dakhil hue thay? Unhon ne farmaya ke nahi
.