Hum se Affan bin Muslim Saffar ne byaan kiya ‘ kaha ke hum se Dawood bin Abil Furat ne ‘ un se Abdullah bin Buraydah ne ‘ un se Abul Aswad ad-Dili ne ke main Madina hazir hua . In dinon wahan ek bimari phel rahi thi . Main Umar bin Khattab razi Allahu anhu ki khidmat mein tha ke ek janaza saamne se guzra . Log is mayyat ki tareef karne lage to Umar razi Allahu anhu ne farmaya ke wajib ho gayi phir ek aur janaza guzra , log is ki bhi tareef karne lage . Is martaba bhi Aap ne aisa hi farmaya ke wajib ho gayi . Phir teesra janaza nikla ‘ log is ki burayi karne lage ‘ aur is martaba bhi Aap ne yehi farmaya ke wajib ho gayi . Abul Aswad ad-Dili ne byaan kiya ke main ne poocha ke Amir-ul-Mumineen kya cheez wajib ho gayi ? Aap ne farmaya ke main ne is waqt wahi kaha jo Rasool Allah salla Allahu alaihi wasallam ne farmaya tha ke jis Musalman ki achhayi par chaar shakhs gawahi de dein Allah ise Jannat mein dakhil kare ga . Hum ne kaha aur agar teen gawahi dein ? Aap ne farmaya ke teen par bhi , phir hum ne poocha aur agar do Musalman gawahi dein ? Aap ne farmaya ke do par bhi . Phir hum ne yeh nahin poocha ke agar ek Musalman gawahi de to kya ?