Hum se Yahya bin Bukayr ne byaan kiya , kaha ke hum se Layth bin Saad ne kaha , un se Aqeel ne , un se Ibn Shihab ne , unhon ne farmaya ke mujhe Kharija bin Zayd bin Thabit ne khabar di ke Umm al-Ala razi Allahu anha Ansar ki ek aurat ne jinhon ne Nabi Karim salla Allahu alaihi wasallam se baiyat ki thi , ne unhein khabar di ke Muhajirin qura daal kar Ansar mein baant diye gaye to Uthman bin Mazoon razi Allahu anhu hamare hisse mein aaye . Chunanche hum ne unhein apne ghar mein rakkha . Aakhir woh bimar huay aur isi mein wafat pa gaye . Wafat ke baad ghusl diya gaya aur kafan mein lapait diya gaya to Rasool Allah salla Allahu alaihi wasallam tashreef laaye . Main ne kaha Abu Saib Aap par Allah ki rahmatein hon meri Aap ke mutaliq shahadat yeh hai ke Allah Ta'ala ne Aap ki izzat farmayi hai . Is par Nabi Karim salla Allahu alaihi wasallam ne farmaya tumhein kaise maloom hua ke Allah Ta'ala ne un ki izzat farmayi hai ? Main ne kaha ya Rasool Allah! mere maan baap Aap par qurban hon phir kis ki Allah Ta'ala izzat afzayi kare ga ? Aap salla Allahu alaihi wasallam ne farmaya is mein shubha nahin ke un ki maut aa chuki , qasam Allah ki ke main bhi un ke liye khayr hi ki umeed rakhta hoon lekin wallah! mujhe khud apne mutaliq bhi maloom nahin ke mere saath kya muamala ho ga . Halanke main Allah ka Rasool hoon . Umm al-Ala razi Allahu anha ne kaha ke Allah ki qasam! ab main kabhi kisi ke mutaliq (is tarah ki) gawahi nahin doon gi .