Hum se Abu al-Yaman ne bayan kiya, kaha hum ko Shuayb ne khabar di, kaha hum se Abu al-Zinad ne bayan kiya, in se Aaraj ne bayan kiya, unhon ne Abu Hurairah razi Allahu anhu se suna, bayan kiya ke unhon ne Rasool Allah salla Allahu alaihi wasallam se suna, Nabi Karim salla Allahu alaihi wasallam ne farmaya ke hum aakhri ummat hain lekin (Qayamat ke din) sab se aage rehne wale hain.

Aur isi asnad ke saath (riwayat hai ke Nabi Karim salla Allahu alaihi wasallam ne farmaya) agar koi shakhs tere ghar mein (kisi surakh ya jangle waghaira se) tum se ijazat liye baghair jhaank raha ho aur tum usay kankari maaro jis se is ki aankh phoot jaye to tum par koi saza nahi hai na gunah ho ga na duniya ki koi saza lagu ho gi.

Hum se Musaddad ne bayan kiya, kaha hum se Yahya ne bayan kiya, in se Humayd ne ke ek sahab Nabi Karim salla Allahu alaihi wasallam ke ghar mein jhaank rahe thay to Nabi Karim salla Allahu alaihi wasallam ne in ki taraf teer ka phal barhaya tha. Main ne poochha ke yeh hadees tum se kis ne bayan ki hai? To unhon ne bayan kiya Anas bin Malik razi Allahu anhu ne.

Mujh se Ishaq bin Mansoor ne bayan kiya, kaha hum ko Abu Usamah ne khabar di, unhein Hisham ne khabar di, kaha hamako hamare walid ne aur in se Aisha razi Allahu anha ne bayan kiya ke Uhud ki larayi mein mushrikeen ko pehle shikast ho gayi thi lekin Iblees ne chilla kar kaha Ae Allah ke bando! peeche ki taraf walon se bacho! Chunanche aage ke log palat pare aur aage wale peeche walon se (jo Musalman hi thay) bhirr gaye. Achanaak Huzayfah razi Allahu anhu ne dekha to in ke walid Yaman razi Allahu anhu thay. Huzayfah razi Allahu anhu ne kaha: Allah ke bando! Yeh to mere walid hain, mere walid. Bayan kiya ke Allah ki qasam Musalman unhein qatl kar ke hi hate. Is par Huzayfah razi Allahu anhu ne kaha Allah tumhari maghfirat kare. Urwah ne bayan kiya ke is waqia ka sadma Huzayfah razi Allahu anhu ko aakhri waqt tak raha.

Hum se Makki bin Ibrahim ne bayan kiya, kaha hum se Yazid bin Abi Ubaid ne, aur in se Salama razi Allahu anhu ne bayan kiya ke hum Nabi Karim salla Allahu alaihi wasallam ke saath Khaibar ki taraf nikle. Jama'at ke ek sahab ne kaha Aamir! Hamain apni hudi sunayiye. Unhon ne hudi-khwani shuru ki to Nabi Karim salla Allahu alaihi wasallam ne poochha ke kaun sahab ga ga kar oonton ko hanka rahe hain? Logon ne kaha ke Aamir hain. Nabi Karim salla Allahu alaihi wasallam ne farmaya, Allah in par raham kare. Sahabah ne arz kiya: ya Rasool Allah! Aap ne hamain Aamir se faida kyun nahi uthane diya. Chunanche Aamir razi Allahu anhu isi raat ko apni hi talwar se shaheed ho gaye. Logon ne kaha ke in ke aamal barbad ho gaye, unhon ne khud-kushi kar li (kyunke ek Yahudi par hamla karte waqt khud apni talwar se zakhmi ho gaye thay) jab main wapas aaya aur main ne dekha ke log aapas mein keh rahe hain ke Aamir ke aamal barbad ho gaye to main Nabi Karim salla Allahu alaihi wasallam ki khidmat mein hazir hua aur arz kiya: Ae Allah ke Nabi! Aap par mere baap aur maan fida hon, yeh log kehte hain ke Aamir ke saare aamal barbad huay. Nabi Karim salla Allahu alaihi wasallam ne farmaya ke jo shakhs yeh kehta hai ghalat kehta hai. Aamir ko dohra ajar mile ga woh (Allah ke raaste mein) mashaq-qat uthane wale aur jihad karne wale thay aur kis qatl ka ajar is se barh kar ho ga?

Hum se Adam bin Abi Iyas ne bayan kiya, kaha hum se Shubah ne bayan kiya, kaha hum se Qatadah ne bayan kiya ke main ne Zhuraara bin Abi Aufa se suna, in se Imran bin Husain razi Allahu anhuma ne ke ek shakhs ne ek shakhs ke hath mein daant se kaata to is ne apna hath kaatne wale ke munh mein se khainch liya jis se is ke aage ke do daant toot gaye phir donon apna jhagra Nabi Karim salla Allahu alaihi wasallam ke paas laaye to Aap salla Allahu alaihi wasallam ne farmaya ke tum apne hi bhai ko is tarah daant se kaat-te ho jaise oont kaat-ta hai tumhein diyat nahi mile gi.

Hum se Abu Aasim ne bayan kiya, in se Ibn Jurayj ne, in se Ata ne, in se Safwan bin Yala ne aur in se un ke walid ne ke main ek ghazwa mein bahar tha aur ek shakhs ne daant se kaat liya tha jis ki wajah se is ke aage ke daant toot gaye thay phir Rasool Allah salla Allahu alaihi wasallam ne is muqaddama ko batil qarar de kar is ki diyat nahi dilayi.

Hum se Muhammad bin Abdullah Ansari ne bayan kiya, kaha hum se Humayd Taweel ne bayan kiya, in se Anas razi Allahu anhu ne ke Nazhrat ki beti ne ek larki ko tamancha mara tha aur is ke daant toot gaye thay. Log Nabi Karim salla Allahu alaihi wasallam ke paas muqaddama laaye to Nabi Karim salla Allahu alaihi wasallam ne qisas ka hukm diya.

Hum se Adam ne bayan kiya, kaha hum se Shubah ne bayan kiya, in se Qatadah ne, in se Ikrimah ne aur in se Ibn Abbas razi Allahu anhuma ne ke Nabi Karim salla Allahu alaihi wasallam ne farmaya ”yeh aur yeh barabar yani chhangliya aur angootha diyat mein barabar hain.“

Hum se Muhammad bin Bashar ne bayan kiya, kaha hum se Ibn Abi Adi ne bayan kiya, in se Shubah ne in se Qatadah ne, in se Ikrimah ne aur in se Ibn Abbas razi Allahu anhuma ne bayan kiya ke main ne Nabi Karim salla Allahu alaihi wasallam se isi tarah suna.