Hum se Musaddad ne bayan kiya, kaha hum se Yazid bin Zuray ne bayan kiya, kaha hum se Khalid Hazza ne bayan kiya, in se Ikrimah ne aur in se Ibn Abbas razi Allahu anhuma ne bayan kiya ke jab Nabi Karim salla Allahu alaihi wasallam Makkah Mukarramah tashreef laaye (fatah ke mauqa par) to Abd-ul-Mutalib ki aulad ne (jo Makkah mein thi) Aap ka istiqbal kiya. (Yeh sab bache hi thay) Aap ne az-rah e mohabbat ek bache ko apne samne aur ek ko apne peeche bitha liya.

Baaz ne kaha hai ke janwar ke maalik ko janwar par aage baithne ka zyada haq hai. Albatta agar woh kisi doosre ko (aage baithne ki) ijazat de to jaiz hai.

Mujh se Muhammad bin Bashar ne bayan kiya, kaha hum se Abd-ul-Wahhab ne, kaha hum se Ayub Sakhtiyani ne ke Ikrimah ke samne yeh zikr aaya ke teen aadmi jo ek janwar par charhein is mein kaun bahut bura hai. Unhon ne bayan kiya ke Ibn Abbas razi Allahu anhuma ne kaha ke Rasool Allahsalla Allahu alaihi wasallam (Makkah Mukarramah) tashreef laaye to Aap Qusam bin Abbas ko apni sawari par aage aur Fazl bin Abbas ko peeche bithaaye huay thay. Ya Qusam peeche thay aur Fazl aage thay (razi Allahu anhum) ab tum in mein se kisay bura kaho ge aur kisay achha.

Hum se Hudba bin Khalid ne bayan kiya, kaha hum se Humam bin Yahya ne bayan kiya, kaha hum se Qatadah ne bayan kiya, kaha hum se Anas bin Malik razi Allahu anhu ne bayan kiya, in se Muaz bin Jabal ne bayan kiya ke main Nabi Karim salla Allahu alaihi wasallam ki sawari par Aap ke peeche baitha hua thu aur mere aur Nabi Karim salla Allahu alaihi wasallam ke darmiyan kajawa ki pichhli lakri ke siwa aur koi cheez haail nahi ku isi halat mein Nabi Karim salla Allahu alaihi wasallam ne farmaya: ya Muaz! Main bola ya Rasool اللہ! Main hazir hoon, Aap ki itaat aur farmabardari ke liye tayyar hoon. Phir Aap ne thori der tak chalte rahe. Is ke baad farmaya: ya Muaz! Main bola, ya Rasool اللہ! Hazir hoon Aap ki itaat ke liye tayyar hoon. Phir Aap thori der chalte rahe is ke baad farmaya: ya Muaz! Main ne arz kiya hazir hoon, ya Rasool اللہ! Aap ki itaat ke liye tayyar hoon. Is ke baad Nabi Karim salla Allahu alaihi wasallam ne farmaya tumhein maloom hai Allah ke apne bandon par kiya haq hain? Main ne arz kiya Allah aur us ke Rasool hi ko zyada ilm hai. Nabi Karim salla Allahu alaihi wasallam ne farmaya ke Allah Ta-ala ke bandon par haq yeh hain ke bande khaas is ki ibadat karein aur is ke saath kisi ko shareek na banayein phir Aap thori der chalte rahe. Is ke baad farmaya: Muaz! Main ne arz kiya, hazir hoon ya Rasool اللہ! Aap ki itaat ke liye tayyar hoon. Nabi Karim salla Allahu alaihi wasallam ne farmaya ke tumhein maloom hai bandon ka Allah par kiya haq hai. Jab ke woh yeh kaam kar lein. Main ne arz kiya Allah aur us ke Rasool ko zyada ilm hai. Farmaya ke phir bandon ka Allah par haq hai ke woh unhein azab na kare.

Hum se Hasan bin Muhammad bin Sabbah ne bayan kiya, kaha hum se Yahya bin Abbad ne bayan kiya, kaha hum se Shubah ne bayan kiya, unhein Yahya bin Abi Ishaq ne khabar di, kaha ke main ne Anas bin Malik razi Allahu anhu se suna, unhon ne bayan kiya ke hum Rasool Allahsalla Allahu alaihi wasallam ke saath Khaibar se wapas aa rahe thay aur main Abu Talha razi Allahu anhu ki sawari par Aap ke peeche baitha hua thu aur chal rahe thay. Nabi Karim salla Allahu alaihi wasallam ki baaz biwi Safiyyah razi Allahu anha Nabi Karim salla Allahu alaihi wasallam ki sawari par Aap ke peeche thien ke achanaak oontni ne thokar khayi, main ne kaha aurat ki khabargiri karo phir main utar para. Nabi Karim salla Allahu alaihi wasallam ne farmaya yeh tumhari maan hain phir main ne kajawa mazboot baandha aur Nabi Karim salla Allahu alaihi wasallam sawar ho gaye phir jab Madinah Munawwarah ke qareeb huay ya (rawi ne bayan kiya ke) Madinah Munawwarah dekha to farmaya ”hum wapas hone wale hain Allah Ta-ala ki taraf rujoo hone wale hain, isi ko poojne wale hain, apne maalik ki tareef karne wale hain.“

Hum se Ahmad bin Yunus ne bayan kiya, kaha hum se Ibrahim bin Saad ne bayan kiya, kaha hum se Ibn Shihab ne bayan kiya, in se Ubadah bin Tameem ne, in se un ke chacha (Abdullah bin Zayd Ansari razi Allahu anhu) ne ke unhon ne Rasool Allahsalla Allahu alaihi wasallam ko masjid mein (chit) laite huay dekha ke Aap ek paon ko doosre paon par utha kar rakkhe huay thay.