Hum se Abdullah bin Yusuf ne bayan kiya, kaha hum ko Imam Malik ne khabar di, unhein Nafi ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ke jis ne maveshi ki hifazat ya shikar ki gharz ke siwa kisi aur wajah se kutta pala is ke sawab se rozana do qiraat ki kami ho jati hai.

‏‏‏‏ Aur Allah Ta'ala ne (Surah al-Maidah) mein farmaya ke ”Aap se poochte hain ke kiya cheez khani hamare liye halal ki gayi hai, Aap keh dein ke tum par kull pakeeza janwar khane halal hain aur tumhare sudhaye huay shikari kutton aur janwaron ka shikar bhi jo shikar par chhorre jaate hain. Tum unhein is tariqa par sikhate ho jis tarah tumhein Allah ne sikhaya hai so khao is shikar ko jise (shikari janwar ya kutta) tumhare liye pakar kar rakhein.“ Allah ke qaul ”beshak Allah hisab jald kar deta hai“ tak. Ibn Abbas razi Allahu anhuma ne kaha ke agar kutte ne shikar ka gosht khud bhi kha liya to us ne shikar ko na-paak kar diya kyunke is surat mein us ne khud apne liye shikar ko roka hai aur Allah Ta'ala ka isi surat mein farmana ke ”tum unhein sikhate ho is mein se jo Allah ne tumhein sikhaya hai“ is liye aise kutte ko peeta jaye ga aur sikhaya jata rahe ga, yahan tak ke shikar mein se woh khane ki aadat chhor de. Aaise shikar ko Ibn Umar razi Allahu anhuma makrooh samajhte thay aur Ata ne kaha ke agar sirf shikar ka khoon pee liya ho aur is ka gosht na khaya ho to tum kha sakte ho.

Hum se Qutaybah bin Saeed ne bayan kiya, kaha hum se Muhammad bin Fudayl ne bayan kiya, in se Bayaan bin Bishr ne, in se Shabi ne aur in se Adi bin Hatim razi Allahu anhu ne bayan kiya ke main ne Rasool Allah salla Allahu alaihi wasallam se poochha ke hum log in kutton se shikar karte hain? Aap salla Allahu alaihi wasallam ne farmaya ke agar tum apne sikhaye huay kutton ko shikar ke liye chhorrte waqt Allah ka naam lete ho to jo shikar woh tumhare liye pakar kar layein usay khao khwah woh shikar ko maar hi daalein. Albatta agar kutta shikar mein se khud bhi kha le to is mein yeh andesha hai ke us ne yeh shikar khud apne liye pakra tha aur agar doosre kutte bhi tumhare kutton ke siwa shikar mein shareek ho jayein to na khao.

Hum se Musa bin Ismail ne bayan kiya, kaha hum se Sabit bin Yazid ne bayan kiya, kaha hum se Aasim bin Sulayman ne bayan kiya, in se Shabi ne, in se Adi bin Hatim razi Allahu anhu ne ke Nabi Karim salla Allahu alaihi wasallam ne farmaya ke jab tum ne apna kutta shikar par chhorra aur Bismillah bhi parhi aur kutte ne shikar pakra aur usay maar dala to usay khao aur agar us ne khud bhi kha liya to tum na khao kyunke yeh shikar is ne apne liye pakra hai aur agar doosre kutte jin par Allah ka naam na liya gaya ho, is kutte ke saath shikar mein shareek ho jayein aur shikar pakar kar maar daalein to aisa shikar na khao kyunke tumhein maloom nahi ke kis kutte ne maara hai aur agar tum ne shikar par teer maara phir woh shikar tumhein do ya teen din baad mila aur is par tumhare teer ke nishan ke siwa aur koi doosra nishan nahi hai to aisa shikar khao lekin agar woh pani mein gir gaya ho to na khao.

Aur Abd-ul-A-la ne bayan kiya, in se Dawood bin Abi Yasir ne, in se Aamir Shabi ne aur in se Adi bin Hatim razi Allahu anhu ne ke unhon ne Nabi Karim salla Allahu alaihi wasallam se arz ki ke woh shikar teer se maarte hain phir do ya teen din par usay talash karte hain, tab woh murda halat mein milta hai aur is ke andar in ka teer ghusa hua hota hai. Nabi Karim salla Allahu alaihi wasallam ne farmaya ke agar tu chahe to kha sakta hai.

Hum se Adam bin Abi Iyas ne bayan kiya, kaha hum se Shubah ne bayan kiya, in se Abdullah bin Abi al-Safar ne, in se Aamir Shabi ne aur in se Adi bin Hatim razi Allahu anhu ne bayan kiya ke main ne arz kiya ya Rasool Allah! Main (shikar ke liye) apna kutta chhorrte waqt Bismillah parh leta hoon. Aap salla Allahu alaihi wasallam ne farmaya ke jab kutta chhorrte waqt Bismillah parh liya ho aur phir woh kutta shikar pakar ke maar dala aur khud bhi kha le to aisa shikar na khao kyunke yeh shikar is ne khud apne liye pakra hai. Main ne kaha ke main kutta shikar par chhorrta hoon lekin is ke saath doosra kutta bhi mujhe milta hai aur mujhe yeh maloom nahi ke kis ne shikar pakra hai? Aap salla Allahu alaihi wasallam ne farmaya ke aisa shikar na khao kyunke tum ne apne kutte par Bismillah parhi hai doosre kutte par nahi parhi aur main ne Aap se be-par ke teer ya lakri se shikar ka hukm poochha to Aap salla Allahu alaihi wasallam ne farmaya ke agar shikar noak ki dhaar se mara ho to kha lekin agar tu ne is ki chorayi se usay maara hai to aisa shikar bojh se mara hai pas usay na kha.

Mujh se Muhammad bin Salam ne bayan kiya, kaha hum ko Muhammad ibn Fadl ne khabar di, in se Bayaan bin Bishr ne, in se Aamir Shabi ne aur in se Adi bin Hatim razi Allahu anhu ne bayan kiya ke main ne Rasool Allah salla Allahu alaihi wasallam se poochha ke hum is qaum mein sukoonat rakhte hain jo in kutton se shikar karti hai. Aap salla Allahu alaihi wasallam ne farmaya ke jab tum apna sikhaya hua kutta chhorro aur is par Allah ka naam le lo to agar woh kutta tumhare liye shikar laya ho to tum usay kha sakte ho lekin agar kutte ne khud bhi kha liya ho to woh shikar na khao kyunke andesha hai ke us ne woh shikar khud apne liye pakra hai aur agar is kutte ke saath koi doosra kutta bhi shikar mein shareek ho jaye to phir shikar na khao.

Hum se Abu Aasim Nabeel ne bayan kiya, in se Haywah bin Shurayh ne (doosri sanad) aur Imam Bukhari rahmahullah ne kaha, mujh se Ahmad bin Abi Rajaa ne bayan kiya, in se Salamah bin Sulayman ne bayan kiya, in se Abdullah bin al-Mubarak ne bayan kiya, in se Haywah bin Shurayh ne bayan kiya ke main ne Rabia bin Yazid Dimashqi se suna, kaha ke mujhe Abu Idrees Aiz-ullah ne khabar di, kaha ke main Abu Thalaba Khushni razi Allahu anhu se suna, unhon ne bayan kiya ke main Rasool Allah salla Allahu alaihi wasallam ki khidmat mein hazir hua aur arz kiya: ya Rasool اللہ! Hum Ahl e Kitab ke mulk mein rehte hain aur in ke bartan mein khate hain aur hum shikar ki zameen mein rehte hain, jahan main apne teer se shikar karta hoon aur apne sudhaye huay kutte se. To is mein se kiya cheez hamare liye jaiz hai? Aap salla Allahu alaihi wasallam ne farmaya tum ne jo yeh kaha hai ke tum Ahl e Kitab ke mulk mein rehte ho aur in ke bartan mein bhi khate ho to agar tumhein in ke bartanon ke siwa doosre bartan mil jayein to in ke bartanon mein na khao lekin in ke bartanon ke siwa doosre bartan na milein to unhein dho kar phir in mein khao aur tum ne shikar ki sar-zameen ka zikr kiya hai to jo shikar tum apne teer se maaro aur teer chalate waqt Allah ka naam liya ho to usay khao aur jo shikar tum ne apne sudhaye huay kutte se kiya ho aur is par Allah ka naam liya ho to usay khao aur jo shikar tum ne apne bila-sudhaye kutte se kiya ho aur usay zibah bhi khud hi kiya ho to usay bhi khao.

Hum se Musaddad ne bayan kiya, kaha hum se Yahya bin Saeed Qattan ne bayan kiya, in se Shubah ne bayan kiya, in se Hisham bin Zayd ne bayan kiya aur in se Anas bin Malik razi Allahu anhu ne bayan kiya ke Mar-uz-Zahran (Makkah ke qareeb ek maqam) mein hum ne ek khargosh ko ubhara log is ke peeche dore magar na paya phir main is ke peeche laga aur main ne usay pakar liya aur usay Abu Talha razi Allahanhu paas laya, unhon ne Nabi Karim salla Allahu alaihi wasallam ki khidmat mein is ka kolha aur donon raanein bheijiein to Aap ne unhein qabool farma liya.

Hum se Ismail ne bayan kiya, kaha ke mujh se Imam Malik ne bayan kiya, in se Amr bin Ubaidullah ke ghulam Abu al-Nadr ne, in se Abu Qatadah razi Allahu anhu ke ghulam Nafi ne aur in se Abu Qatadah razi Allahu anhu ne ke woh Rasool Allah salla Allahu alaihi wasallam ke saath thay woh Makkah ke rasta mein ek jagah par apne baaz sathiyon ke saath jo ihram baandhe huay thay peeche reh gaye khud Abu Qatadah razi Allahu anhu ihram se nahi thay isi arsa mein unhon ne ek gor-khar dekha aur (usay shikar karne ke irada se) apne ghore par baith gaye. Is ke baad apne sathiyon se (jo mahram thay) kora maanga lekin unhon ne dene se inkar kiya phir apna nezah maanga lekin usay bhi uthane ke liye woh tayyar nahi huay to unhon ne woh khud uthaya aur gor-khar par hamla kiya aur usay shikar kar liya phir baaz ne is ka gosht khaya aur baaz ne khane se inkar kiya. Is ke baad jab woh Nabi Karim salla Allahu alaihi wasallam ki khidmat mein hazir huay to is ka hukm poochha Aap salla Allahu alaihi wasallam ne farmaya ke yeh to ek khana tha jo Allah ne tumhare liye muhayya kiya tha.