Hum se Abu Naeem ne byaan kiya , kaha hum se Malik bin Maghool ne byaan kiya , un se Talha bin Musarrif ne byaan kiya ke main ne Abdullah bin Abi Awfa razi Allahu anhu se poocha , kya Rasool Allah salla Allahu alaihi wasallam ne kisi ko wasi banaya tha . Unhon ne kaha ke nahi . Main ne poocha ke logon par wasiyat karna kaise farz hai ya wasiyat karne ka kaise hukm hai ? Unhon ne bataya ke Aap ne Kitab Allah ke mutabiq amal karte rehne ki wasiyat ki thi .

Hum se Qutaybah bin Saeed ne byaan kiya , unhon ne kaha hum se Abu al-Ahwas (Salam bin Hakeem) ne byaan kiya , un se Abu Ishaq ne , un se Amr bin al-Harith razi Allahu anhu ne byaan kiya ke Rasool Allah salla Allahu alaihi wasallam ne na dirham chhore thay , na dinar , na koi ghulam na baandi , siwa apne safaid khachar ke jis par Aap salla Allahu alaihi wasallam sawar hua karte thay aur Aap ka hathiyar aur kuch woh zameen jo Aap salla Allahu alaihi wasallam ne apni zindagi mein mujahidon aur musafiron ke liye waqf kar rakkhi thi .

Hum se Sulayman bin Harb ne byaan kiya , kaha hum se Hammad bin Zayd ne byaan kiya , un se Sabit Banani ne aur un se Anas bin Malik razi Allahu anhu ne ke shiddat e marz ke zamane mein Nabi Karim salla Allahu alaihi wasallam ki be-chaini bahut barh gayi thi . Fatimah al-Zahra razi Allahu anha ne kaha: Aah , Abba jaan ko kitni be-chaini hai . Aap salla Allahu alaihi wasallam ne is par farmaya ke aaj ke baad tumhare Abba jaan ki yeh be-chaini nahi rahe gi . Phir jab Nabi Karim salla Allahu alaihi wasallam ki wafat ho gayi to Fatima razi Allahu anha kehti thien , haye Abba jaan! Aap apne Rabb ke bulawe par chale gaye , haye Abba jaan! Aap Jannat al-Firdous mein apne maqam par chale gaye . Hum Jibraeel alaihissalam ko Aap ki wafat ki khabar sunate hain . Phir jab Nabi Karim salla Allahu alaihi wasallam dafan kar diye gaye to Aap razi Allahu anha ne Anas razi Allahu anhu se kaha ”Anas! Tumhare dil Rasool Allah salla Allahu alaihi wasallam ki naash par mitti daalne ke liye kis tarah aamada ho gaye thay .“

Hum se Bishr bin Muhammad ne byaan kiya , kaha hum se Abdullah bin Mubarak ne byaan kiya , un se Yunus ne byaan kiya , un se Zuhri ne byaan kiya , unhein Saeed bin Musayyab ne kai ahl e ilm ki maujoodgi mein khabar di aur un se Aisha razi Allahu anha ne byaan kiya ke Nabi Karim salla Allahu alaihi wasallam halat e sehat mein farmaya karte thay ke har Nabi ki rooh qabz karne se pehle unhein jannat mein un ki qiyam-gah dikhayi gayi , phir ikhtiyar diya gaya . Phir jab Aap salla Allahu alaihi wasallam beemar huay aur Aap ka sar mubarak meri raan par tha . Is waqt Aap par ghashi tari ho gayi . Jab hosh mein aaye to Aap ne apni nazar ghar ki chhat ki taraf utha li aur farmaya «allahummar rafeeqal aa'la» ”Ae Allah! Mujhe apni bargah mein anbiya aur siddiqeen se mila de .“ Main isi waqt samajh gayi ke ab Aap hamain pasand nahi kar sakte aur mujhe woh hadees yaad aa gayi jo Aap halat e sehat mein hum se byaan kiya karte thay . Aisha razi Allahu anha ne byaan kiya ke aakhri kalma jo zaban mubarak se nikla woh yahi tha ke «allahummar rafeeqal aa'la» .

Hum se Abu Naeem ne byaan kiya , kaha hum se Shayban bin Abdur Rahman ne byaan kiya , un se Yahya bin Abi Kaseer ne , un se Abu Salamah bin Abdur Rahman ne aur un se Aisha aur Ibn Abbas razi Allahu anhum ne ke Nabi Karim salla Allahu alaihi wasallam ne (basat ke baad) Makkah mein das saal tak qiyam kiya . Jis mein Aap salla Allahu alaihi wasallam par wahi nazil hoti rahi aur Madinah mein bhi das saal tak Aap ka qiyam raha .

Hum se Abu Naeem ne byaan kiya , kaha hum se Shayban bin Abdur Rahman ne byaan kiya , un se Yahya bin Abi Kaseer ne , un se Abu Salamah bin Abdur Rahman ne aur un se Aisha aur Ibn Abbas razi Allahu anhum ne ke Nabi Karim salla Allahu alaihi wasallam ne (basat ke baad) Makkah mein das saal tak qiyam kiya . Jis mein Aap salla Allahu alaihi wasallam par wahi nazil hoti rahi aur Madinah mein bhi das saal tak Aap ka qiyam raha .

Hum se Abdullah bin Yusuf ne byaan kiya , unhon ne kaha hum se Layth bin Saad ne byaan kiya , un se Aqeel ne , un se Ibn Shihab ne , un se Urwah bin Zubayr ne aur un se Aisha razi Allahu anha ne byaan kiya ke jab Rasool Allah salla Allahu alaihi wasallam ki wafat hui to Aap ki umr tirsath saal ki thi . Ibn Shihab ne kaha ke mujhe Saeed bin Musayyab ne bhi isi tarah khabar di thi .

Hum se Qubaysah bin Utbah ne byaan kiya , kaha hum se Sufyan Sawri ne byaan kiya , un se Aamash ne , un se Ibrahim Nakhai ne , un se Aswad bin Yazid ne aur un se Aisha razi Allahu anha ne byaan kiya ke jab Nabi Karim salla Allahu alaihi wasallam ki wafat hui to Aap ki zirah ek Yahudi ke yahan tees sa jau ke badle mein girwi rakkhi hui thi .

Hum se Abu Aasim Dahhak bin Makhlad ne byaan kiya , kaha hum se Fudayl bin Sulayman ne byaan kiya , un se Musa bin Uqbah ne byaan kiya , un se Salim ne aur un se un ke walid (Abdullah bin Umar razi Allahu anhuma) ne ke Nabi Karim salla Allahu alaihi wasallam ne Usamah bin Zayd razi Allahu anhuma ko ek lashkar ka ameer banaya to baaz sahabah razi Allahu anhum ne un ki amarat par aitraz kiya . Is par Nabi Karim salla Allahu alaihi wasallam ne farmaya ke mujhe maloom hua hai ke tum Usamah razi Allahu anhu par aitraz kar rahe ho haalan ke woh mujhe sab se zyada azeez hai .

Hum se Ismail bin Abi Oways ne byaan kiya , kaha hum se Imam Malik ne byaan kiya , un se Abdullah bin Dinar ne aur un se Abdullah bin Umar razi Allahu anhuma ne ke Rasool Allah salla Allahu alaihi wasallam ne ek lashkar rawana farmaya aur is ka ameer Usamah bin Zayd razi Allahu anhuma ko banaya . Baaz logon ne un ki amarat par aitraz kiya . Is par Nabi Karim salla Allahu alaihi wasallam ne sahabah razi Allahu anhum ko khitab kiya aur farmaya ke agar aaj tum is ki amarat par aitraz karte ho to tum is se pehle is ke walid ki amarat par isi tarah aitraz kar chuke ho aur Allah ki qasam! Is ke walid (Zayd razi Allahu anhu) amarat ke bahut laiyq thay aur mujhe sab se zyada azeez thay aur yeh (yani Usamah razi Allahu anhu) bhi un ke baad mujhe sab se zyada azeez hai .