Mujh se Abdah Bin Abdullah ne bayan kiya ‘ kaha hum se Abd-us-Samad Bin Abdul Waris ne bayan kiya ‘ un se Abdur Rahman Bin Abdullah Bin Dinar ne ‘ un se in ke walid ne aur un se Abdullah Bin Umar (Radi Allahu Anhuma) ne bayan kiya ke sab se pehla ghazwa jis mein mein ne shirkat ki wo Ghazwa Khandaq hai
.

Mujh se Ibrahim Bin Musa ne bayan kiya ‘ kaha hum ko Hisham ne khabar di ‘ unhein Ma'mar Bin Rashid ne ‘ unhein Zuhri ne ‘ unhein Salim Bin Abdullah ne aur un se Ibn Umar (Radi Allahu Anhuma) ne bayan kiya aur Ma'mar Bin Rashid ne bayan kiya ke mujhe Abdullah Bin Taoos ne khabar di ‘ un se Ikrima Bin Khalid ne aur un se Ibn Umar (Radi Allahu Anhuma) ne bayan kiya ke mein Hafsa Radi Allahu Anha ke yahan gaya to in ke sar ke baalon se pani ke qatrat tapak rahe thay. Mein ne in se kaha ke tum dekhti ho logon ne kya kiya aur mujhe to kuch bhi hukumat nahi mili. Hafsa Radi Allahu Anha ne kaha ke musalmanon ke majma mein jao ‘ log tumhara intizar kar rahe hain. Kahin aisa na ho ke tumhara mauqe par na pahunchna mazeed phoot ka sabab ban jaye. Aakhir Hafsa Radi Allahu Anha ke israr par Abdullah Radi Allahu Anhu gaye. Phir jab log wahan se chale gaye to Muawiya Radi Allahu Anhu ne khutba diya aur kaha ke khilafat ke masla par jise guftagu karni ho wo zara apna sar to uthaye. Yaqeenan hum is se zyada khilafat ke haqdar hain aur is ke baap se bhi zyada. Habib Bin Maslama Radi Allahu Anhu ne Ibn Umar (Radi Allahu Anhuma) se is par kaha ke Aap ne wahin is ka jawab kyun nahi diya? Abdullah Bin Umar (Radi Allahu Anhuma) ne kaha ke mein ne isi waqt apne lungi kholi (jawab dene ko tayyar hua) aur irada kar chuka tha ke in se kahoon ke tum se zyada khilafat ka haqdar wo hai jis ne tum se aur tumhare baap se Islam ke liye jung ki thi. Lekin phir mein dara ke kahin meri is baat se musalmanon mein ikhtilaf barh na jaye aur khoonrezi na ho jaye aur meri baat ka matlab meri mansha ke khilaf na liya jane lage. Is ke bajaye mujhe jannat ki wo nematen yaad aa gayin jo Allah Ta'ala ne (sabr karne walon ke liye) jannat mein tayyar kar rakhi hain. Habib Ibn Abi Muslim ne kaha ke accha hua Aap mahfooz rahe aur bacha liye gaye ‘ aafat mein nahi pare. Mahmood ne Abdur Razzaq se ( «naswatuha» ke bajaye lafz) «wonosatuha» bayan kiya (jis ke mani choti ke hain jo aurten sar par baal gundhte waqt nikalti hain)
.

Hum se Abu Nuaim ne bayan kiya ‘ kaha hum se Sufyan ne bayan kiya ‘ un se Abu Ishaq Sabi'i ne ‘ un se Sulaiman Bin Surad Radi Allahu Anhu ne bayan kiya ke Nabi Kareem Sallallahu Alaihi Wasallam ne Ghazwa Ahzab ke mauqe par (jab kuffar ka lashkar nakam wapas ho gaya) farmaya ke ab hum in se laren ge. Ayinda wo hum par charh kar kabhi na aa saken ge
.

Hum se Abdullah Bin Muhammad Musnadi ne bayan kiya ‘ kaha hum se Yahya Bin Adam ne bayan kiya ‘ kaha hum se Israil Bin Yunus ne bayan kiya ‘ unhon ne Abu Ishaq se suna ‘ unhon ne bayan kiya ke mein ne Sulaiman Bin Surad Radi Allahu Anhu se suna ‘ unhon ne bayan kiya ke mein ne Nabi Kareem Sallallahu Alaihi Wasallam se suna ‘ jab Arab ke qabail (jo Ghazwa Khandaq ke mauqe par Madina charh kar aaye thay) nakam wapas ho gaye to Aap Sallallahu Alaihi Wasallam ne farmaya ke ab hum in se jung karen ge ‘ wo hum par charh kar na aa saken ge balkey hum hi in par fauj kashi kiya karen ge
.

Hum se Ishaq Bin Mansoor ne bayan kiya ‘ kaha hum se Rauh Bin Ubadah ne bayan kiya ‘ un se Hisham Bin Hassan ne bayan kiya ‘ un se Muhammad Bin Sirin ne ‘ un se Ubaida Salmani ne aur un se Ali Radi Allahu Anhu ne bayan kiya ke Nabi Kareem Sallallahu Alaihi Wasallam ne Ghazwa Khandaq ke mauqe par farmaya ke jis tarah in kuffar ne humein Salawatul Wusta (namaz-e-asar) nahi parhne di aur sooraj ghuroob ho gaya ‘ Allah Ta'ala bhi in ki qabron aur gharon ko aag se bhar de
.

Hum se Makki Bin Ibrahim ne bayan kiya ‘ kaha hum se Hisham Bin Hassan ne bayan kiya ‘ un se Yahya Bin Abi Kaseer ne ‘ un se Abu Salama Bin Abdur Rahman ne aur un se Jabir Radi Allahu Anhu ne ke Umar Bin Khattab Radi Allahu Anhu Ghazwa Khandaq ke mauqe par sooraj ghuroob hone ke baad (lar kar) wapas hue. Wo kuffar-e-Quraish ko bura bhala keh rahe thay. Unhon ne arz kiya: Ya Rasul Allah! Sooraj ghuroob hone ko hai aur mein asar ki namaz ab tak nahi parh saka. Is par Aap Sallallahu Alaihi Wasallam ne farmaya ke Allah ki qasam! Namaz to mein bhi na parh saka. Aakhir hum Rasul Allah Sallallahu Alaihi Wasallam ke sath wadi-e-Buthan mein utre. Aap Sallallahu Alaihi Wasallam ne namaz ke liye wudhu kiya. Hum ne bhi wudhu kiya ‘ phir asar ki namaz sooraj ghuroob hone ke baad parhi aur is ke baad maghrib ki namaz parhi
.

Hum se Muhammad Bin Kaseer ne bayan kiya ‘ kaha hum ko Sufyan Sawri ne khabar di ‘ un se Muhammad Bin Munkadir ne bayan kiya aur unhon ne Jabir Radi Allahu Anhu se suna ‘ wo bayan karte thay ke Ghazwa Ahzab ke mauqe par Nabi Kareem Sallallahu Alaihi Wasallam ne farmaya ke kuffar ke lashkar ki khabren kaun laye ga? Zubair Radi Allahu Anhu ne arz kiya ke mein tayyar hoon. Phir Aap Sallallahu Alaihi Wasallam ne pucha ke kuffar ke lashkar ki khabren kaun laye ga? Is martaba bhi Zubair Radi Allahu Anhu ne kaha ke mein. Phir Aap Sallallahu Alaihi Wasallam ne teesri martaba pucha ke kuffar ke lashkar ki khabren kaun laye ga? Zubair Radi Allahu Anhu ne is martaba bhi apne aap ko pesh kiya. Is par Aap Sallallahu Alaihi Wasallam ne farmaya ke har nabi ke havari hote hain aur mere havari Zubair hain
.

Hum se Qutaiba Bin Saeed ne bayan kiya ‘ kaha hum se Laith ne bayan kiya ‘ un se Saeed Bin Abi Saeed ne ‘ un se in ke walid ne aur un se Abu Huraira Radi Allahu Anhu ne ke Nabi Kareem Sallallahu Alaihi Wasallam farmaya karte thay ”Allah ke siwa koi mabood nahi, wo akela hai jis ne apne lashkar ko fatah di. Apne bande ki madad ki (yani Nabi Kareem Sallallahu Alaihi Wasallam ki) aur ahzab (yani afwaj-e-kuffar) ko tanha bhaga diya pas is ke baad koi cheez is ke mad-e-muqabil nahi ho sakti“
.

Hum se Muhammad ne bayan kiya ‘ kaha hum ko Fazari aur Abdah ne khabar di ‘ un se Ismail Bin Abi Khalid ne bayan kiya ke mein ne Abdullah Bin Abi Aufa Radi Allahu Anhu se suna ‘ unhon ne bayan kiya ke Nabi Kareem Sallallahu Alaihi Wasallam ne ahzab (afwaj-e-kuffar) ke liye (Ghazwa Khandaq ke mauqe par) bad-dua ki ”Ai Allah! Kitab ke nazil karne wale! Jaldi hisab lene wale! Kuffar ke lashkar ko shikast de. Ai Allah! Unhein shikast de. Ya Allah! In ki taqat ko mutazalzal kar de“
.

Hum se Muhammad Bin Muqatil ne bayan kiya, unhon ne kaha hum ko Abdullah Bin Mubarak ne khabar di, unhein Salim Bin Abdullah Bin Umar aur Nafi ne aur un se Abdullah Bin Umar (Radi Allahu Anhuma) ne bayan kiya ke Nabi Kareem Sallallahu Alaihi Wasallam jab ghazve, hajj ya umre se wapas aate to sab se pehle teen martaba Allahu Akbar kehte. Phir yun farmate ”Allah ke siwa koi mabood nahi, badshahat isi ke liye hai, hamd isi ke liye hai aur wo har cheez par qadir hai. (Ya Allah!) Hum wapas ho rahe hain tauba karte hue, ibadat karte hue apne rabb ke huzoor sajda karte hue aur apne rabb ki hamd karte hue. Allah ne apna wada sach kar dikhaya. Apne bande ki madad ki aur kuffar ki faujon ko is ne akele shikast de di“
.