Hum se Muhammad Bin Abdur Rahim ne bayan kiya, kaha hum ko Zakariya Bin Adi ne khabar di, kaha hum ko Abdullah Bin Mubarak ne khabar di, unhein Haiwah ne, unhein Yazid Bin Abi Habib ne, unhein Abul Khair ne aur un se Uqbah Bin Amir Radi Allahu Anhu ne bayan kiya ke Rasul Allah Sallallahu Alaihi Wasallam ne aath saal baad yani aathvein baras mein Ghazwa Uhud ke shuhada par namaz-e-janaza ada ki. Jaise Aap zindon aur murdon sab se ruxat ho rahe hon. Is ke baad Aap Sallallahu Alaihi Wasallam minbar par tashreef laye aur farmaya ”Mein tum se aage aage hoon, mein tum par gawah rahoonga aur mujh se (qayamat ke din) tumhari mulaqat Hauz (Kausar) par hogi. Is waqt bhi mein apni is jagah se Hauz (Kausar) ko dekh raha hoon. Tumhare bare mein mujhe is ka koi khatra nahi hai ke tum shirk karoge, haan mein tumhare bare mein duniya se darta hoon ke tum kahin duniya ke liye aapas mein muqabla na karne lago.“ Uqbah Bin Amir Radi Allahu Anhu ne bayan kiya ke mere liye Rasul Allah Sallallahu Alaihi Wasallam ka ye aakhri dedaar tha jo mujh ko naseeb hua
.

Hum se Ubaidullah Bin Musa ne bayan kiya, un se Israil ne bayan kiya, un se Ibn Ishaq (Amr Bin Ubaidullah Sabi'i) ne aur un se Bara Bin Azib Radi Allahu Anhu ne bayan kiya ke jung-e-Uhud ke mauqe par jab mushrikeen se muqabla ke liye hum pahunche to Nabi Kareem Sallallahu Alaihi Wasallam ne teer andazon ka ek dasta Abdullah Bin Jubair (Radi Allahu Anhuma) ki matahti mein (pahari par) muqarrar farmaya tha aur unhein ye hukm diya tha ke tum apni jagah se na hatna, is waqt bhi jab tum log dekh lo ke hum in par ghalib aa gaye hain phir bhi yahan se na hatna aur is waqt bhi jab dekh lo ke wo hum par ghalib aa gaye, tum log hamari madad ke liye na aana. Phir jab hamari mudbher kuffar se hui to in mein bhagdar mach gayi. Mein ne dekha ke in ki aurten pahariyon par bari tezi ke sath bhagi ja rahi thin, pindliyon se upar kapre uthaye hue, jis se in ke pazib dikhayi de rahe thay. Abdullah Bin Jubair (Radi Allahu Anhuma) ke (teer andaz) saathi kehne lage ke ghanimat ghanimat. Is par Abdullah Radi Allahu Anhu ne un se kaha ke mujhe Nabi Kareem Sallallahu Alaihi Wasallam ne takeed ki thi ke apni jagah se na hatna (is liye tum log maal-e-ghanimat lootne na jao) lekin in ke sathiyon ne in ka hukm manne se inkar kar diya. In ki is hukm udooli ke nateejay mein musalmanon ko haar hui aur sattar musalman shaheed ho gaye. Is ke baad Abu Sufyan ne pahari par se awaz di, kya tumhare sath Muhammad (Sallallahu Alaihi Wasallam) maujood hain? Aap Sallallahu Alaihi Wasallam ne farmaya ke koi jawab na de, phir unhon ne pucha, kya tumhare sath Ibn Abi Quhafah maujood hain? Aap Sallallahu Alaihi Wasallam ne is ke jawab ki bhi mamanat farma di. Unhon ne pucha, kya tumhare sath Ibn Khattab maujood hain? Is ke baad wo kehne lage ke ye sab qatl kar diye gaye. Agar zinda hote to jawab dete. Is par Umar Radi Allahu Anhu be-qabu ho gaye aur farmaya: Allah ke dushman tu jhoota hai. Allah ne abhi unhein tumhein zaleel karne liye baqi rakha hai. Abu Sufyan ne kaha, Hubal (ek but) buland rahe. Nabi Kareem Sallallahu Alaihi Wasallam ne farmaya ke is ka jawab do. Sahaba (Radi Allahu Anhum) ne arz kiya ke hum kya jawab dein? Aap Sallallahu Alaihi Wasallam ne farmaya ke kaho, Allah sab se buland aur buzurg-o-bartar hai. Abu Sufyan ne kaha, hamare pas Uzza (but) hai aur tumhare pas koi Uzza nahi. Aap Sallallahu Alaihi Wasallam ne farmaya ke is ka jawab do. Sahaba (Radi Allahu Anhum) ne arz kiya, kya jawab dein? Aap Sallallahu Alaihi Wasallam ne farmaya ke kaho, Allah hamara hami aur madadgaar hai aur tumhara koi hami nahi. Abu Sufyan ne kaha, aaj ka din Badr ke din ka badla hai aur larayi ki misal doal ki hoti hai. (Kabhi hamare hath mein aur kabhi tumhare hath mein) tum apne maqtooleen mein kuch lashon ka misla kiya hua pao ge, mein ne is ka hukm nahi diya tha lekin mujhe bura nahi maloom hua
.

Mujhe Abdullah Bin Muhammad ne khabar di, kaha hum se Sufyan ne bayan kiya, un se Amr ne aur un se Jabir Radi Allahu Anhu ne bayan kiya ke baaz sahaba ne Ghazwa Uhud ki subah ko sharab pi (jo abhi haram nahi hui thi) aur phir shahadat ki maut naseeb hui
.

Hum se Abdan ne bayan kiya, kaha hum se Abdullah ne bayan kiya, kaha hum ko Shuba ne khabar di, unhein Saad Bin Ibrahim ne, un se in ke walid Ibrahim ne ke (in ke walid) Abdur Rahman Bin Auf Radi Allahu Anhu ke pas khana laya gaya. Aur wo roze se thay to unhon ne kaha, Musab Bin Umair Radi Allahu Anhu (Uhud ki jung mein) shaheed kar diye gaye, wo mujh se afzal aur behtar thay lekin unhein jis chadar ka kafan diya gaya (wo itni chhoti thi ke) agar is se in ka sar chupaya jata to paon khul jate aur paon chupaye jate to sar khul jata tha. Mera khayal hai ke unhon ne kaha aur Hamza Radi Allahu Anhu bhi (isi jung mein) shaheed kiye gaye, wo mujh se behtar aur afzal thay. Phir jaisa ke tum dekh rahe ho, hamare liye duniya mein kushadagi di gayi ya unhon ne ye kaha ke phir jaisa ke tum dekhte ho, humein duniya di gayi, humein to is ka darr hai ke kahin yahi hamari nekyon ka badla na ho jo isi duniya mein humein diya ja raha hai. Is ke baad Aap roye ke khana na kha sake
.

Hum se Abdullah Bin Muhammad Musnadi ne bayan kiya, kaha hum se Sufyan Bin Uyainah ne bayan kiya, un se Amr Bin Dinar ne, unhon ne Jabir Bin Abdullah Ansari (Radi Allahu Anhuma) se suna, unhon ne bayan kiya ke ek sahabi ne Nabi Kareem Sallallahu Alaihi Wasallam se Ghazwa Uhud ke mauqe par pucha: Ya Rasul Allah! Agar mein qatl kar diya gaya to mein kahan jaonga? Nabi Kareem Sallallahu Alaihi Wasallam ne farmaya ke jannat mein. Unhon ne khajoor phaink di jo in ke hath mein thi aur larrne lage yahan tak ke shaheed ho gaye
.

Hum se Ahmad Bin Yunus ne bayan kiya, kaha hum se Zuhair Bin Muawiya ne bayan kiya, un se Aamash ne bayan kiya, un se Shaqiq Bin Salama ne aur un se Khabbab Bin Al-Aratt Radi Allahu Anhu ne bayan kiya ke hum ne Rasul Allah Sallallahu Alaihi Wasallam ke sath hijrat ki thi. Hamara maqsad sirf Allah ki raza thi. Is ka sawab Allah ke zimme tha. Phir hum mein se baaz log to wo thay jo guzar gaye aur koi ajr unhon ne is duniya mein nahi dekha, unhein mein se Musab Bin Umair Radi Allahu Anhu bhi thay. Uhud ki larayi mein unhon ne shahadat payi thi. Ek dhari dar chadar ke siwa aur koi cheez in ke pas nahi thi (aur wahi in ka kafan bani) jab hum is se in ka sar chupate to paon khul jate aur paon chupate to sar khul jata. Nabi Kareem Sallallahu Alaihi Wasallam ne farmaya ke sar chadar se chupa do aur paon par izkhir ghas daal do. Ya Nabi Kareem Sallallahu Alaihi Wasallam ne ye alfaz farmaye thay ke «alqu ala rijlihi minal izkhir» bajaye «ij'alu ala rijlihi al-izkhir» ke aur hum baaz wo thay jinhein in ke is amal ka badla (isi duniya mein) mil raha hai aur wo is se faida utha rahe hain
.

Hum se Hassan Bin Hassan ne bayan kiya, kaha hum se Muhammad Bin Talha ne bayan kiya, kaha hum se Humaid Taweel ne bayan kiya aur un se Anas Radi Allahu Anhu ne ke in ke chacha (Anas Bin Nazr) Badr ki larayi mein shareek na ho sake thay, phir unhon ne kaha ke mein Nabi Kareem Sallallahu Alaihi Wasallam ke sath pehli hi larayi mein ghair hazir raha. Agar Nabi Kareem Sallallahu Alaihi Wasallam ke sath Allah Ta'ala ne mujhe kisi aur larayi mein shirkat ka mauqa diya to Allah dekhe ga ke mein kitni be-jigri se larrta hoon. Phir Ghazwa Uhud ke mauqe par jab musalmanon ki jamaat mein afra tafri paida ho gayi to unhon ne kaha: Ai Allah! Musalmanon ne aaj jo kuch kiya mein tere huzoor mein is ke liye mazrat khwah hoon aur mushrikeen ne jo kuch kiya mein tere huzoor mein is se apni bezari zahir karta hoon. Phir wo apni talwar le kar aage barhe. Raste mein Saad Bin Muaz Radi Allahu Anhu se mulaqat hui to unhon ne un se kaha, Saad! Kahan ja rahe ho? Mein to Uhud pahari ke daman mein jannat ki khushbu soongh raha hoon. Is ke baad wo aage barhe aur shaheed kar diye gaye. In ki lash pehchani nahi ja rahi thi. Aakhir in ki bahen ne ek til ya in ki ungliyon ke poar se in ki lash ko pehchana. Unko assi (80) se zyada zakham bhaale aur talwar aur teeron ke lage thay
.

Hum se Musa Bin Ismail ne bayan kiya, unhon ne kaha hum se Ibrahim Bin Saad ne bayan kiya, un se Ibn Shihab ne bayan kiya, unhein Kharija Bin Zaid Bin Sabit ne khabar di unhon ne Zaid Bin Sabit Radi Allahu Anhu se suna, wo bayan karte thay ke jab hum Quran Majeed ko likhne lage to mujhe Surah Al-Ahzab ki ek ayat (likhi hui) nahi mili. Mein ne Rasul Allah Sallallahu Alaihi Wasallam ko is ki tilawat karte barha suna tha. Phir jab hum ne is ki talash ki to wo ayat Khuzaima Bin Sabit Ansari Radi Allahu Anhu ke pas humein mili (ayat ye thi) «minal muminina rijalun sadaqu ma aahadullaha alaihi faminhum man qaza nahbahu waminhum man yantazir» phir hum ne is ayat ko is ki surat mein Quran Majeed mein mila diya
.

Hum se Abul Walid ne bayan kiya, kaha hum se Shuba ne bayan kiya, un se Adi Bin Sabit ne, mein ne Abdullah Bin Yazid se suna, wo Zaid Bin Sabit Radi Allahu Anhu se bayan karte thay ke unhon ne bayan kiya, jab Nabi Kareem Sallallahu Alaihi Wasallam Ghazwa Uhud ke liye nikle to kuch log jo Aap ke sath thay (munafiqeen, bahana bana kar) wapas laut gaye. Phir sahaba ki in wapas hone wale munafiqeen ke bare mein do rayein ho gayi thin. Ek jamaat to kehti thi humein pehle in se jung karni chahiye aur dusri jamaat kehti thi ke in se humein jung na karni chahiye. Is par ayat nazil hui «fama lakum fil munafiqina fiataini wallahu arkasahum bima kasabu» ”Pas tumhein kya ho gaya hai ke munafiqeen ke bare mein tumhari do jamaaten ho gayi hain, halanke Allah Ta'ala ne in ki bad-amali ki wajah se unhein kufr ki taraf lauta diya hai.“ Aur Nabi Kareem Sallallahu Alaihi Wasallam ne farmaya ke Madina ”Tayyaba“ hai, sarkashon ko ye is tarah apne se door kar deta hai jaise aag ki bhatti chandi ke mail kucfail ko door kar deti hai
.

Hum se Muhammad Bin Yusuf ne bayan kiya, kaha hum se Ibn Uyainah ne bayan kiya, un se Amr ne, un se Jabir Bin Abdullah (Radi Allahu Anhuma) ne bayan kiya ke ye ayat hamare bare mein nazil hui thi «iz hammat taifatani minkum an tafshala» (Aal-e-Imran: 122) yani Bani Haritha aur Bani Salama ke bare mein. Meri khwahish nahi hai ke ye ayat nazil na hoti, jab ke Allah aage farma raha hai «wallahu waliyyuhuma» ”Aur Allah in dono jamaaton ka madadgaar tha“
.