Hum se Ismail bin Khaleel ne bayan kiya, kaha hum se Ali bin Mus’hir ne, hum se Abu Ishaaq Sulaiman bin Firoz Shaibani ne Abdur Rehman bin Aswad ke waaste se, woh apne waalid Aswad bin Yazeed se, woh Aisha Radhiallahu Anha se ke aap ne farmaaya hum azwaaj mein se koi jab haaiza hoti, us haalat mein Rasoolullah Sallallahu Alaihi Wasallam agar mubaasharat ka iradah karte to Aap Sallallahu Alaihi Wasallam izaar baandhne ka hukm de dete bawjood haiz ki ziyaadti ke. Phir badan se badan milaate, aap ne kaha tum mein aisa kaun hai jo Nabi-e-Kareem Sallallahu Alaihi Wasallam ki tarah apni shehwat par qaabu rakhta ho. Is Hadees ki Mutaba’at Khalid aur Jareer ne Shaibani ki riwayat se ki hai. (Yahan bhi mubaasharat se saath letna baithna muraad hai).

Hum se Abu No’maan Muhammed bin Fazl ne bayan kiya, unhon ne kaha hum se Abdul Wahid bin Ziyaad ne bayan kiya, unhon ne kaha hum se Abu Ishaaq Shaibani ne bayan kiya, unhon ne kaha hum se Abdullah bin Shaddad ne bayan kiya, unhon ne kaha main ne Maimunah se suna, unhon ne kaha ke jab Nabi-e-Kareem Sallallahu Alaihi Wasallam apni biwiyon mein se kisi se mubaasharat karna chaahte aur woh haaiza hoti, to Aap Sallallahu Alaihi Wasallam ke hukm se, woh pehle izaar baandh leti. Aur Sufyan ne Shaibani se is ko riwayat kiya hai.

Hum se Sa’eed bin Abi Maryam ne bayan kiya, unhon ne kaha hum se Muhammed bin Ja’far ne bayan kiya, unhon ne kaha mujhe Zaid ne aur yeh Zaid Aslam ke bete hain, unhon ne ’Iyaaz bin Abdullah se, unhon ne Abu Sa’eed Khudri Radhiallahu Anhu se ke aap ne farmaaya ke Rasoolullah Sallallahu Alaihi Wasallam Eid-ul-Azha ya Eid-ul-Fitr mein eidgaah tashreef le gaye. Wahan Aap Sallallahu Alaihi Wasallam aurton ke paas se guzre aur farmaaya aye aurton ki jama’at! Sadqa karo, kiunki main ne jahannam mein ziyada tum hi ko dekha hai. Unhon ne kaha ya Rasoolallah! Aisa kiun? Aap Sallallahu Alaihi Wasallam ne farmaaya ke tum la’an ta’an bahut karti ho aur shauhar ki na-shukri karti ho, bawjood aql aur deen mein naaqis hone ke main ne tum se ziyada kisi ko bhi ek aqalmand aur tajurbekaar aadmi ko dewaana bana dene waala nahi dekha. Aurton ne arz ki ke hamaare deen aur hamaari aql mein nuqsaan kya hai ya Rasoolallah? Aap Sallallahu Alaihi Wasallam ne farmaaya kya aurat ki gawaahi mard ki gawaahi se nisf nahi hai? Unhon ne kaha, ji hai. Aap Sallallahu Alaihi Wasallam ne farmaaya bas yahi us ki aql ka nuqsaan hai. Phir Aap ne poocha kya aisa nahi hai ke jab aurat haaiza ho to na Namaz padh sakti hai na Roza rakh sakti hai, aurton ne kaha aisa hi hai. Aap Sallallahu Alaihi Wasallam ne farmaaya ke yahi us ke deen ka nuqsaan hai.

Ibrahim ne kaha ke Aayat padhne mein koi harj nahi aur Abdullah bin Abbas Radhiallahu Anhuma junubi ke liye Quran-e-Majeed padhne mein koi harj nahi samajhte the. Aur Nabi-e-Kareem Sallallahu Alaihi Wasallam har waqt Allah ka zikr kiya karte the. Umm-e-Atiyyah ne farmaaya hamein hukm hota tha ke hum haiz waali aurton ko bhi (eid ke din) bahar nikaalein. Pas woh mardon ke saath takbeer kehtien aur dua kartien. Ibn-e-Abbas Radhiallahu Anhuma ne farmaaya ke un se Abu Sufyan ne bayan kiya ke Hiraql ne Nabi-e-Kareem Sallallahu Alaihi Wasallam ke giraami naama ko talab kiya aur use padha. Us mein likha huwa tha.“Shuru karta hun main Allah ke naam se jo bada meharbaan nihayat rahem waala hai.”Aur“Aye kitaab waalo! Ek aise Kalime ki taraf aao jo hamaare aur tumhaare darmiyaan mushtarak hai ke hum Allah ke siwa kisi ki bandagi na karen aur us ka kisi ko shareek na thehraayen.”Allah Tabaaraka-wa-Ta’ala ke qaul «مُسْلِمُوْن» tak. Ata ne Jabir ke hawaale se bayan kiya ke Aisha Radhiallahu Anha ko (Hajj mein) haiz aa gaya to aap ne tamaam manaasik poore kiye siwaaye Baitullah ke Tawaaf ke aur aap Namaz bhi nahi padhti thien aur Hakam ne kaha main junubi hone ke bawjood zabah karta hun jab ke Allah Ta’ala ne farmaaya hai «وَلا تَأْكُلُوا مِمَّا لَمْ يُذْكَرِ اسْمُ اللَّهِ عَلَيْهِ» ke jis zabeeha par Allah ka naam na liya gaya ho use na khaao.

Hum se Abu Nu’aim Fazl bin Dukain ne bayan kiya, unhon ne kaha hum se Abdul ’Aziz bin Abi Salamah ne bayan kiya, unhon ne Abdur Rahman bin Qasim se, unhon ne Qasim bin Muhammed se, woh Aisha Radhiallahu Anha se, aap ne farmaaya ke hum Rasoolullah Sallallahu Alaihi Wasallam ke saath Hajj ke liye is tarah nikle ke hamaari zabaano par Hajj ke alawah aur koi zikr hi na tha. Jab hum maqam-e-Sarif pahunche to mujhe haiz aa gaya. (Is gham se) main ro rahi thi ke Nabi-e-Kareem Sallallahu Alaihi Wasallam tashreef laaye, Aap Sallallahu Alaihi Wasallam ne poocha ke kiun ro rahi ho? Main ne kaha kaash! Main is saal Hajj ka iradah hi na karti. Aap Sallallahu Alaihi Wasallam ne farmaaya shayad tumhein haiz aa gaya hai. Main ne kaha ji haan. Aap Sallallahu Alaihi Wasallam ne farmaaya yeh cheez to Allah Ta’ala ne Adam ki betiyon ke liye muqarrar kar di hai. Is liye tum jab tak paak na ho jaao Tawaaf-e-Baitullah ke alawah Haajiyon ki tarah tamaam kaam anjaam do.

Hum se Abdullah bin Yousuf ne bayan kiya, unhon ne kaha hum se Imam Malik ne Hishaam bin ’Urwah ke waaste se bayan kiya, unhon ne apne waalid se, unhon ne Aisha Radhiallahu Anha se, aap ne bayan kiya ke Fatima Abi Hubaish ki beti ne Rasoolullah Sallallahu Alaihi Wasallam se kaha ke ya Rasoolallah! Main to paak hi nahi hoti, to kya main Namaz bilkul chhod dun. Nabi-e-Kareem Sallallahu Alaihi Wasallam ne farmaaya ke yeh rag ka khoon hai haiz nahi is liye jab haiz ke din (jin mein kabhi pehle tumhein aadatan aaya karta tha) aayein to Namaz chhod de aur jab andaze ke mutabiq woh din guzar jaayen, to khoon dho daal aur Namaz padh.

Hum se Abdullah bin Yousuf ne bayan kiya, unhon ne kaha hamein Imam Malik ne bayan kiya, unhon ne Hishaam bin ’Urwah ke waaste se, unhon ne Fatima bint-e-Munzir se, unhon ne Asma bint-e-Abi Bakr Siddiq Radhiallahu Anhuma se, unhon ne kaha ke ek aurat ne Rasoolullah Sallallahu Alaihi Wasallam se sawaal kiya. Us ne poocha ke ya Rasoolallah! Aap ek aisi aurat ke mutalliq kya farmaate hain jis ke kapde par haiz ka khoon lag gaya ho. To Rasoolullah Sallallahu Alaihi Wasallam ne farmaaya ke agar kisi aurat ke kapde par haiz ka khoon lag jaaye to chaahiye ke use ragad daale, us ke baad use paani se dhoye, phir us kapde mein Namaz padh le.

Hum se Asbagh ne bayan kiya, unhon ne kaha mujh se Abdullah bin Wahb ne bayan kiya, unhon ne kaha mujh se ’Amr bin Haarith ne Abdur Rahman bin Qasim ke waaste se bayan kiya, unhon ne apne waalid Qasim bin Muhammed se bayan kiya, woh Aisha Radhiallahu Anha se ke aap ne farmaaya ke hamein haiz aata to kapde ko paak karte waqt hum khoon ko mal dete, phir us jagah ko dho lete aur tamaam kapde par paani baha dete aur use pahan kar Namaz padhte.

Hum se Ishaaq bin Shaheen Abu Bishr Waasiti ne bayan kiya, unhon ne kaha hum se Khalid bin Abdullah ne bayan kiya, unhon ne Khalid bin Mahran se, unhon ne ’Ikrimah se, unhon ne Aisha Radhiallahu Anha se ke Nabi-e-Kareem Sallallahu Alaihi Wasallam ke saath Aap Sallallahu Alaihi Wasallam ki ba’z azwaaj ne aitekaaf kiya, halaanki woh mustahaaza thien aur unhein khoon aata tha. Is liye khoon ki wajah se tasht aksar apne neeche rakh letien. Aur ’Ikrimah ne kaha ke Aisha Radhiallahu Anha ne kasm ka paani dekha to farmaaya yeh to aisa hi ma’loom hota hai jaise falaan sahibah ko istihaaza ka khoon aata tha.

Hum se Qutaibah bin Sa’eed ne bayan kiya, kaha hum se Yazeed bin Zurai’ ne Khalid se, woh ’Ikrimah se, woh Aisha Radhiallahu Anha se, unhon ne kaha ke Rasoolullah Sallallahu Alaihi Wasallam ke saath Aap Sallallahu Alaihi Wasallam ki azwaaj mein se ek ne aitekaaf kiya. Woh khoon aur zardi (nikalte) dekhtien, tasht un ke neeche hota aur Namaz ada karti thien.