Aur Allah Ta'ala ne farmaya «Innallaha-shtara Minal Mu'minina Anfusahum Wa Amwalahum Bi'anna Lahumul Jannata Yuqatiluna fi Sabilillahi Fayaqtuluna Wa Yuqtaluna Wa'dan Alaihi Haqqan fit-Taurati wal-Injili wal-Qur'ani Wa Man Aufa Bi'ahdihi Minallahi Fastabshiru Bibi'ikum-ullazi Baya'tum Bihi‏» "Bishak Allah Ta'ala ne musalmano se un ki jaan aur un ke maal is badle mein khareed liye hain ke unhein jannat milegi ' wo musalman Allah ke raste mein jehad karte hain aur is tarah (muharib kuffar ko) ye maarte hain aur khud bhi maare jate hain. Allah Ta'ala ka ye waada (ke musalmano ko un ki qurbaniyon ke nateeje mein jannat milegi) saccha hai ' Taurat mein ' Injeel mein aur Quran mein aur Allah se barh kar apne waada ka poora karne wala kaun ho sakta hai? Pas khush ho jao tum apne is sauda ki wajah se jo tum ne us ke sath kiya hai." Aakhir ayat «Wa Bashshiril Mu'minina‏» tak Ibn Abbas (Radi Allahu Anhuma) ne farmaya ke Allah ki hadon se murad us ke ahkam ki ita'at hai
.

Hum se Hasan Bin Sabbah ne bayan kiya ' kaha hum se Muhammad Bin Sabiq ne bayan kiya ' kaha hum se Malik Bin Mighwal ne bayan kiya ' kaha ke mein ne Waleed Bin Aizar se suna ' un se Saeed Bin Iyas Abu Amr Shaibani ne bayan kiya aur un se Abdullah Bin Masood (Radi Allahu Anhu) ne kaha ke mein ne Rasul Allah (Sallallahu Alaihi Wasallam) se poocha ke deen ke kaamon mein kaun sa amal afzal hai? Aap (Sallallahu Alaihi Wasallam) ne farmaya "Waqt par namaz parhna." Mein ne poocha is ke baad? Aap (Sallallahu Alaihi Wasallam) ne farmaya "Walidain ke sath naik sulook karna." Mein ne poocha aur is ke baad? Aap (Sallallahu Alaihi Wasallam) ne farmaya "Allah ke raste mein jehad karna." Phir mein ne Aap (Sallallahu Alaihi Wasallam) se zyada sawalat nahi kiye ' warna Aap (Sallallahu Alaihi Wasallam) isi tarah un ke jawabat inayat farmate
.

Hum se Ali Bin Abdullah ne bayan kiya ' kaha hum se Yahya Bin Saeed Qattan ne bayan kiya ' kaha hum se Sufyan Sawri ne bayan kiya ' kaha ke mujh se Mansoor Bin Mutamir ne bayan kiya Mujahid se ' unhon ne Taoos se aur un se Ibn Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya "Fatah Makkah ke baad ab hijrat (farz) nahi rahi albatta jehad aur niyat-e-bakhair karna ab bhi baqi hain aur jab tumhein jehad ke liye bulaya jaye to nikal kharay hua karo."
.

Hum se Musaddad ne bayan kiya ' kaha hum se Khalid Bin Abdullah ne bayan kiya ' kaha hum se Habeeb Bin Abi Umrah ne bayan kiya Aisha Bint-e-Talhah se aur un se Aisha (Radi Allahu Anha) (Umm-ul-Momineen) ne ke unhon ne poocha ya Rasul Allah! Hum samajhte hain ke jehad afzal amaal mein se hai phir hum (aurtein) bhi kyun na jehad karein? Aap (Sallallahu Alaihi Wasallam) ne farmaya "Lekin sab se afzal jehad maqbool hajj hai jis mein gunah na hon."
.

Hum se Ishaq Bin Mansoor ne bayan kiya ' kaha hum ko Affan Bin Muslim ne khabar di ' kaha hum se Hammam ne ' kaha hum se Muhammad Bin Hijadah ne bayan kiya ' kaha ke mujhe Abu Haseen ne khabar di ' un se Zakwan ne bayan kiya aur un se Abu Hurairah (Radi Allahu Anhu) ne bayan kiya ke ek sahab (naam namaloom) Rasul Allah (Sallallahu Alaihi Wasallam) ki khidmat mein aaye aur arz kiya ke mujhe koi aisa amal bata dijie jo sawab mein jehad ke barabar ho. Nabi Kareem (Sallallahu Alaihi Wasallam) ne farmaya aisa koi amal mein nahi pata. Phir Aap (Sallallahu Alaihi Wasallam) ne farmaya kya tum itna kar sakte ho ke jab mujahid (jehad ke liye) nikle to tum apni masjid mein aa kar barabar namaz parhni shuru kar do aur (namaz parhte raho aur darmiyan mein) koi susti aur kahli tumhein mahsoos na ho, isi tarah roze rakhne lago aur koi din baghair roze ke na guzre. In sahab ne arz kiya bhala aisa kaun kar sakta hai? Abu Hurairah (Radi Allahu Anhu) ne farmaya ke mujahid ka ghora jab rasi mein bandha hua zameen (par paon) maarta hai to us par bhi us ke liye nekiyan likhi jati hain
.

Aur Allah ne (Surat-ul-Saff mein) farmaya «Ya Ayyuhallazina Amanu Hal Adullukum Ala Tijaratin Tunjikum Min Azabin Alimin * Tu'minuna Billahi Wa Rasulihi Wa Tujahiduna fi Sabilillahi Bi'amwalikum Wa Anfusikum Zalikum Khairun Lakum In Kuntum Ta'lamuna * Yaghfir Lakum Zunubakum Wa Yudkhilkum Jannatin Tajri Min Tahtihal Anharu Wa Masakina Tayyibatan fi Jannati Adnin Zalikal Fauzul Azimu‏» "Ae iman walo! Kya mein tum ko bataoon ek aisi tijarat jo tum ko najat dilaye dukh dene wale azab se ' wo ye ke iman lao Allah par aur us ke Rasul par aur jehad karo Allah ki raah mein apne maalon aur apni janon se ' ye tumhare haq mein behtar hai agar tum samjho ' agar tum ne ye kaam anjam diye to Allah Ta'ala maaf kar dega tumhare gunah aur dakhil karega tum ko aise baghon mein jin ke neeche nahrein behti hon gi aur behtareen makanat tum ko ata kiye jayein ge ' jannat-e-adn mein ye bari bhari kamyabi hai."
.

Hum se Abul Yaman ne bayan kiya ' unhon ne kaha ke hum ko Shuaib ne khabar di ' unhein Zuhri ne ' unhon ne kaha ke mujh se Ata Bin Yazid Laisi ne kaha aur un se Abu Saeed Khudri (Radi Allahu Anhu) ne bayan kiya ke arz kiya gaya ya Rasul Allah! Kaun shakhs sab se afzal hai? Aap (Sallallahu Alaihi Wasallam) ne farmaya "Wo momin jo Allah ke raste mein apni jaan aur maal se jehad kare." Sahaba (Radi Allahu Anhum) ne poocha is ke baad kaun? Farmaya "Wo momin jo pahar ki kisi ghati mein rehna ikhtiyar kare ' Allah Ta'ala ka khauf rakhta ho aur logon ko chor kar apni burayi se un ko mehfooz rakkhe."
.

Hum se Abul Yaman ne bayan kiya ' kaha hum ko Shuaib ne khabar di ' un se Zuhri ne bayan kiya ke mujhe Saeed Bin Musayyib ne khabar di aur un se Abu Hurairah (Radi Allahu Anhu) ne bayan kiya ke mein ne Rasul Allah (Sallallahu Alaihi Wasallam) se suna ' Aap (Sallallahu Alaihi Wasallam) farma rahe thay ke Allah ke raste mein jehad karne wale ki misal. . . . Aur Allah Ta'ala is shakhs ko khoob janta hai jo (khuloos-e-dil ke sath sirf Allah Ta'ala ki raza ke liye) Allah ke raste mein jehad karta hai. . . . Is shakhs ki si hai jo raat mein barabar namaz parhta rahe aur din in mein barabar roze rakhta rahe aur Allah Ta'ala ne apne raste mein jehad karne wale liye is ki zimmedari le li hai ke agar ise shahadat dega to ise be-hisab-o-kitab jannat mein dakhil karega ya phir zinda-o-salamat (ghar) sawab aur maal-e-ghaneemat ke sath wapas karega
.

Aur Umar (Radi Allahu Anhu) ne dua ki thi ke ae Allah! Mujhe apne Rasul (Sallallahu Alaihi Wasallam) ke shehar (Madinah Tayyibah) mein shahadat ki maut ata farmana
.

Hum se Abdullah Bin Yusuf ne bayan kiya Imam Malik se ' unhon ne Ishaq Bin Abdullah Bin Abi Talhah se unhon ne Anas Bin Malik (Radi Allahu Anhu) se suna ' aap bayan karte ke Rasul Allah (Sallallahu Alaihi Wasallam) Umm-e-Haram (Radi Allahu Anha) ke yahan tashreef le jaya karte thay (ye Anas Radi Allahu Anhu ki khala theen jo Ubadah Bin Samit Radi Allahu Anhu ke nikah mein theen) ek din Rasul Allah (Sallallahu Alaihi Wasallam) tashreef le gaye to unhon ne Aap (Sallallahu Alaihi Wasallam) ki khidmat mein khana pesh kiya aur Aap (Sallallahu Alaihi Wasallam) ke sar se juein nikalne lagein ' is arse mein Aap (Sallallahu Alaihi Wasallam) so gaye ' jab bidaar hue to Aap (Sallallahu Alaihi Wasallam) muskura rahe thay. Umm-e-Haram (Radi Allahu Anha) ne bayan kiya mein ne poocha ya Rasul Allah! Kis baat par aap hans rahe hain? Aap (Sallallahu Alaihi Wasallam) ne farmaya ke meri ummat ke kuch log mere samne is tarah pesh kiye gaye ke wo Allah ke raste mein ghazwa karne ke liye darya ke beech mein sawar is tarah ja rahe hain jis tarah badshah takht par hote hain ya jaise badshah takht-e-rawan par sawar hote hain ye shak Ishaq rawi ko tha. Unhon ne bayan kiya ke mein ne arz kiya ya Rasul Allah! Aap dua farmaiye ke Allah mujhe bhi unhein mein se kar de ' Rasul Allah (Sallallahu Alaihi Wasallam) ne un ke liye dua farmayi phir Aap (Sallallahu Alaihi Wasallam) apna sar rakh kar so gaye ' is martaba bhi Aap (Sallallahu Alaihi Wasallam) bidaar hue to muskura rahe thay. Mein ne poocha ya Rasul Allah! Kis baat par aap hans rahe hain? Aap (Sallallahu Alaihi Wasallam) ne farmaya meri ummat ke kuch log mere samne is tarah pesh kiye gaye ke wo Allah ki raah mein ghazwa ke liye ja rahe hain pehle ki tarah ' is martaba bhi farmaya unhon ne bayan kiya ke mein ne arz kiya ya Rasul Allah! Allah se mere liye dua kijiye ke mujhe bhi unhein mein se kar de. Aap (Sallallahu Alaihi Wasallam) ne is par farmaya ke tu sab se pehli fauj mein shamil hogi (jo bahri raste se jehad karegi) chunancha Muawiyah (Radi Allahu Anhu) ke zamana mein Umm-e-Haram (Radi Allahu Anha) ne bahri safar kiya phir jab samundar se bahar aayin to in ki sawari ne unhein neeche gira diya aur isi hadisa mein un ki wafat ho gayi
.