Hum se Adam ne bayan kiya, un se Sho’bah ne Abdul Aziz bin Suhaib ke waaste se bayan kiya, unhon ne Anas Radhiallahu Anhu se suna, woh kehte the ke Rasoolullah Sallallahu Alaihi Wasallam jab (qazaa-e-haajat ke liye) bait-ul-khala mein daakhil hote to yeh (dua) padhte «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» aye Allah! Main napaak jinon aur napaak jinniyon se teri panaah maangta hun.

Hum se Abdullah bin Muhammed ne bayan kiya, kaha ke hum se Hashim Ibn-ul-Qasim ne, kaha ke un se Warqaa bin Yashkuri ne Ubaidullah bin Abi Yazeed se naql kiya, woh Ibn-e-Abbas Radhiallahu Anhuma se riwayat karte hain ke Nabi Kareem Sallallahu Alaihi Wasallam bait-ul-khala mein tashreef le gaye. Main ne (bait-ul-khala ke qareeb) Aap Sallallahu Alaihi Wasallam ke liye Wuzu ka paani rakh diya. (Bahar nikal kar) Aap Sallallahu Alaihi Wasallam ne poocha yeh kis ne rakha? Jab Aap Sallallahu Alaihi Wasallam ko batlaaya gaya to Aap ne (mere liye dua ki aur) farmaaya «اللَّهُمَّ فَقِّهْهُ فِي الدِّينِ» Aye Allah! Us ko deen ki samajh ata farmaaiyo.

Hum se Adam ne bayan kiya, kaha ke hum se Ibn-e-Abi Zi’b ne, kaha ke hum se Zohri ne ’Ata bin Yazeed Al-Laithi ke waaste se naql kiya, woh Abu Ayyub Ansari Radhiallahu Anhu se riwayat karte hain ke Rasoolullah Sallallahu Alaihi Wasallam ne farmaaya ke jab tum mein se koi bait-ul-khala mein jaaye to qible ki taraf munh kare na us ki taraf pusht kare (balke) mashriq ki taraf munh kar lo ya maghrib ki taraf.

Hum se Abdullah bin Yousuf ne bayan kiya, unhon ne kaha ke hum ko Imam Malik ne Yahya bin Sa’eed se khabar di. Woh Muhammed bin Yahya bin Habban se, woh apne chacha Wase’ bin Habban se riwayat karte hain, woh Abdullah bin Umar Radhiallahu Anhuma se riwayat karte hain. Woh farmaate the ke log kehte the ke jab qazaa-e-haajat ke liye baitho to na qibla ki taraf munh karo na Bait-ul-Muqaddas ki taraf (yeh sun kar) Abdullah bin Umar Radhiallahu Anhuma ne farmaaya ke ek din main apne ghar ki chhat par chadha to main ne Nabi Kareem Sallallahu Alaihi Wasallam ko dekha ke Aap Bait-ul-Muqaddas ki taraf munh kar ke do ienton par qazaa-e-haajat ke liye baithe hain. Phir Abdullah bin Umar Radhiallahu Anhuma ne (Wase’ se) kaha ke shayad tum un logon mein se ho jo apne chootadon ke bal Namaz padhte hain. Tab main ne kaha Allah ki qasam! Main nahi jaanta (ke aap ka matlab kya hai) Imam Malik Rahimahullah ne kaha ke Abdullah bin Umar Radhiallahu Anhuma ne is se woh shakhs muraad liya jo Namaz mein zameen se ooncha na rahe, sajdah mein zameen se chimat jaaye.

Hum se Yahya bin Bukair ne bayan kiya, unhon ne kaha hum se Laith ne bayan kiya, un se ’Aqeel ne Ibn-e-Shihaab ke waaste se naql kiya, woh ’Urwah bin Zubair se, woh Aisha Radhiallahu Anha se riwayat karte hain ke Rasoolullah Sallallahu Alaihi Wasallam ki biwiyaan raat mein Manasi’ ki taraf qazaa-e-haajat ke liye jaatien aur Manasi’ ek khula maidaan hai. To Umar Radhiallahu Anhu Rasoolullah Sallallahu Alaihi Wasallam se kaha karte the ke apni biwiyon ko pardah karaiye. Magar Rasoolullah Sallallahu Alaihi Wasallam ne us par amal nahi kiya. Ek roz raat ko ’Isha ke waqt Saudah Bint-e-Zam’ah Radhiallahu Anha, Rasoolullah Sallallahu Alaihi Wasallam ki ahliya jo daraaz qad aurat thein, (bahar) gayien. Umar Radhiallahu Anhu ne unhein aawaaz di (aur kaha) hum ne tumhein pehchaan liya aur un ki khwahish yeh thi ke pardah (ka hukm) naazil ho jaaye. Chunancha (us ke baad) Allah ne pardah (ka hukm) naazil farmaa diya.

Hum se Zakariyya ne bayan kiya, kaha ke hum se Abu Usamah ne Hishaam bin ’Urwah ke waaste se bayan kiya, woh apne baap se, woh Aisha Radhiallahu Anha se, woh Rasoolullah Sallallahu Alaihi Wasallam se naql karti hain ke Aap Sallallahu Alaihi Wasallam ne (apni biwiyon se) farmaaya ke tumhein qazaa-e-haajat ke liye bahar nikalne ki ijazat hai. Hishaam kehte hain ke haajat se muraad paakhana ke liye (bahar) jaana hai.

Hum se Ibrahim bin Al-Munzir ne bayan kiya, unhon ne kaha ke hum se Anas bin Iyaaz ne Ubaidullah bin Umar ke waaste se bayan kiya, woh Muhammed bin Yahya bin Habban se naql karte hain, woh Wase’ bin Habban se, woh Abdullah bin Umar Radhiallahu Anhuma se riwayat karte hain ke (ek din main apni bahen aur Rasoolullah Sallallahu Alaihi Wasallam ki ahliya mohtarma) Hafsa Radhiallahu Anha ke makaan ki chhat par apni kisi zaroorat se chadha, to mujhe Rasoolullah Sallallahu Alaihi Wasallam qazaa-e-haajat karte waqt qible ki taraf pusht aur shaam ki taraf munh kiye huwe nazar aaye.

Hum se Ya’qoob bin Ibrahim ne bayan kiya, unhon ne kaha ke hum se Yazeed bin Haroon ne bayan kiya, unhon ne kaha, hamein Yahya ne Muhammed bin Yahya bin Habban se khabar di, unhein un ke chacha Wase’ bin Habban ne batlaaya, unhein Abdullah bin Umar Radhiallahu Anhuma ne khabar di, woh kehte hain ke ek din main apne ghar ki chhat par chadha, to mujhe Rasoolullah Sallallahu Alaihi Wasallam do ienton par (qazaa-e-haajat ke waqt) Bait-ul-Muqaddas ki taraf munh kiye huwe nazar aaye.

Hum se Abul Waleed Hisham bin Abdul Malik ne bayan kiya, un se Sho’bah ne Abu Mu’aaz se jin ka naam Ata bin Abi Maimunah tha naql kiya, unhon ne Anas bin Malik Radhiallahu Anhu se suna, woh kehte the ke jab Rasoolullah Sallallahu Alaihi Wasallam rafa-e-haajat ke liye nikalte to main aur ek ladka apne saath paani ka bartan le aate the. Matlab yeh hai ke us paani se Rasoolullah Sallallahu Alaihi Wasallam tahaarat kiya karte the.

Abud Darda Radhiallahu Anhu ne farmaaya ke tum mein jooton waale, paak paani waale aur takya waale saheb nahi hain?