Hum se Amr Bin Zararah ne bayan kiya, kaha ke humein Qasim Bin Malik ne khabar di, unhein Juaid Bin Abdur Rahman ne, unhon ne kaha ke mein ne Umar Bin Abdul Aziz (Rahimahullah) se suna, wo Saib Bin Yazid (Radi Allahu Anhu) se keh rahe thay Saib (Radi Allahu Anhu) ko Nabi Kareem (Sallallahu Alaihi Wasallam) ke saman ke sath (yani baal bachon mein) Hajj karaya gaya tha
.

Imam Bukhari (Rahimahullah) ne kaha ke mujh se Ahmad Bin Muhammad ne kaha ke un se Ibrahim Bin Saad ne bayan kiya, un se un ke walid ne, un se un ke dada (Ibrahim Bin Abdur Rahman Bin Auf Radi Allahu Anhu) ne ke Umar (Radi Allahu Anhu) ne apne aakhri Hajj ke mauqe par Nabi Kareem (Sallallahu Alaihi Wasallam) ki biwiyon ko Hajj ki ijazat di thi aur un ke sath Usman Bin Affan aur Abdur Rahman Bin Auf (Radi Allahu Anhuma) ko bheja tha
.

Hum se Musaddad ne bayan kiya, kaha hum se Abdul Wahid ne bayan kiya, un se Habib Bin Umrah ne bayan kiya, unhon ne kaha mujh se Aisha Bint Talha ne bayan kiya aur un se Umm-ul-Momineen Aisha (Radi Allahu Anha) ne bayan kiya ke mein ne poocha ya Rasul Allah (Sallallahu Alaihi Wasallam)! hum bhi kyun na Aap (Sallallahu Alaihi Wasallam) ke sath jihad aur ghazwon mein jaya karein ? Aap (Sallallahu Alaihi Wasallam) ne farmaya tum logon ke liye sab se umda aur sab se munasib jihad Hajj hai, wo Hajj jo maqbool ho. Aisha (Radi Allahu Anha) kehti theen ke jab se mein ne Rasul Allah (Sallallahu Alaihi Wasallam) ka ye irshad sun liya hai Hajj ko mein kabhi chorne wali nahi hoon
.

Hum se Abu-al-Numan ne bayan kiya, kaha hum se Hammad Bin Zaid ne bayan kiya, un se Amr Bin Dinar ne bayan kiya, un se Ibn Abbas (Radi Allahu Anhuma) ke ghulam Abu Ma'bad ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya ke koi aurat apne mahram rishtedar ke baghair safar na kare aur koi shakhs kisi aurat ke paas is waqt tak na jaye jab tak wahan zi-mahram maujood na ho. Ek shakhs ne poocha ke ya Rasul Allah! mein falan lashkar mein jihad ke liye nikalna chahta hoon, lekin meri biwi ka irada Hajj ka hai ? To Aap (Sallallahu Alaihi Wasallam) ne farmaya ke tu apni biwi ke sath Hajj ko ja
.

Hum se Abdan ne bayan kiya, kaha hum ko Yazid Bin Zuraie ne khabar di, kaha hum ko Habib Muallim ne khabar di, unhein Ata Bin Abi Rabah ne aur un se Ibn Abbas (Radi Allahu Anhuma) ne farmaya ke jab Rasul Allah (Sallallahu Alaihi Wasallam) Hajjat-ul-Wida se wapas hue to Aap (Sallallahu Alaihi Wasallam) ne Umm-e-Sinan Ansariya aurat (Radi Allahu Anha) se daryaft farmaya ke tu Hajj karne nahi gayi ? Unhon ne arz ki ke falan ke baap yani mere khawand ke paas do ont pani pilane ke thay ek par to khud Hajj ko chale gaye aur doosra hamari zameen seerab karta hai. Aap (Sallallahu Alaihi Wasallam) ne is par farmaya ke Ramzan mein Umrah karna mere sath Hajj karne ke barabar hai, is riwayat ko Ibn Juraij ne Ata se suna, kaha unhon ne Ibn Abbas (Radi Allahu Anhuma) se suna, unhon ne Nabi Kareem (Sallallahu Alaihi Wasallam) se, aur Ubaidullah ne Abdul Karim se riwayat kiya, un se Ata ne un se Jabir (Radi Allahu Anhu) ne aur un se Nabi Kareem (Sallallahu Alaihi Wasallam) ne
.

Hum se Sulaiman Bin Harb ne bayan kiya, kaha ke hum se Shuba ne, un se Abdul Malik Bin Umar ne, un se Ziyad ke ghulam Qaz'ah ne, unhon ne bayan kiya ke mein ne Abu Saeed Khudri (Radi Allahu Anhu) se suna jinhon ne Nabi Kareem (Sallallahu Alaihi Wasallam) ke sath barah jihad kiye thay. Wo kehte thay ke mein ne char baatein Nabi Kareem (Sallallahu Alaihi Wasallam) se suni theen ya ye ke wo ye char baatein Nabi Kareem (Sallallahu Alaihi Wasallam) se naqal karte aur kehte thay ke ye baatein mujhe intehai pasand hain ye ke koi aurat do din ka safar is waqt tak na kare jab tak is ke sath is ka shohar ya koi zhu-reham mahram na ho, na Eid-ul-Fitr aur Eid-ul-Adha ke roze rakhe jayein na Asr ki namaz ke baad ghuroob hone ke pehle aur na subah ki namaz ke baad sooraj nikalne se pehle koi namaz parhi jaye aur na teen masajid ke siwa kisi ke liye kajawe bandhe jayein Masjid-ul-Haram, meri Masjid aur Masjid-ul-Aqsa
.

Hum se Muhammad Bin Salam ne bayan kiya, kaha humein Marwan Fazari ne khabar di, unhein Humaid Taweel ne, unhon ne bayan kiya ke mujh se Thabit ne bayan kiya aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne ek boodhe shakhs ko dekha jo apne do beton ka sahara liye chal raha hai. Aap (Sallallahu Alaihi Wasallam) ne poocha in sahab ka kya haal hai ? Logon ne bataya ke unhon ne Kaabah ko paidal chalne ki mannat mani hai. Aap (Sallallahu Alaihi Wasallam) ne farmaya ke Allah Ta'ala is se beniyaz hai ke ye apne ko takleef mein dalein phir Aap (Sallallahu Alaihi Wasallam) ne unhein sawar hone ka hukm diya
.

Hum se Ibrahim Bin Musa ne bayan kiya, kaha ke hum ko Hisham Bin Yusuf ne khabar di ke Ibn Juraij ne unhein khabar di, unhon ne bayan kiya ke mujhe Saeed Bin Abi Ayyub ne khabar di, unhein Yazid Bin Habib ne khabar di, unhein Abu-al-Khair ne khabar di, ke Uqba Bin Aamir (Radi Allahu Anhu) ne bayan kiya meri behan ne mannat mani thi ke Baitullah tak wo paidal jayein gi, phir unhon ne mujh se kaha ke tum is ke mutaliq Rasul Allah (Sallallahu Alaihi Wasallam) se bhi pooch lo chunanche mein ne Aap (Sallallahu Alaihi Wasallam) se poocha to Aap (Sallallahu Alaihi Wasallam) ne farmaya ke wo paidal chalein aur sawar bhi ho jayein. Yazid ne kaha ke Abu-al-Khair hamesha Uqba (Radi Allahu Anhu) ke sath rehte thay
.