Aur (Quran Majeed mein hai) «wa mathalul-ladheena yunfiqoona amwaalahum» in logon ki misal jo apna maal kharch karte hain , (se) farmaan-e-bari «min kullis-samaraati» tak .

Hum se Abu Qudaama Ubaidullah bin Saeed ne byaan kiya ‘ kaha hum se Abu Nu'man Hakam bin Abdullah Basri ne byaan kiya ‘ kaha hum se Shubah bin Hajjaj ne byaan kiya ‘ un se Sulayman Aamash ne ‘ un se Abu Wa'il ne aur un se Abu Masood Ansari razi Allahu anhu ne farmaya ke jab aayat-e-sadqa nazil hui to hum bojh dhoune ka kaam kiya karte thay (taake is tarah jo mazdoori mile usay sadqa kar diya jaye) isi zamana mein ek shakhs (Abdul Rahman bin Auf) aaya aur us ne sadqa ke taur par kaafi cheezon pesh ki . Is par logon ne yeh kehna shuroo kiya ke yeh aadmi riyakaar hai . Phir ek aur shakhs (Abu Aqeel naami) aaya aur us ne sirf ek saa' ka sadqa kiya . Is ke baare mein logon ne yeh keh diya ke Allah Ta'ala ko ek saa' sadqa ki kya haajat hai . Is par yeh aayat nazil hui «alladheena yalmizoona al-mutawwi'eena minal-moomineena fis-sadaqaati wal-ladheena la yajidoona illa juhdahum» ”woh log jo in momino par aib lagate hain jo sadqa zyada dete hain aur un par bhi jo mehnat se kama kar laate hain . (aur kam sadqa karte hain)“ aakhir tak .

Hum se Saeed bin Yahya ne byaan kiya , kaha mujh se mere walid ne byaan kiya , kaha ke hum se Aamash ne byaan kiya , un se Shaqeeq ne aur un se Abu Masood Ansari razi Allahu Ta'ala anhu ne kaha ke Rasool Allah salla Allahu alaihi wasallam ne jab humein sadqa karne ka hukm diya to hum mein se bahut se bazaar ja kar bojh uthane ki mazdoori karte aur is tarah ek mudd (ghalla ya khajoor waghera) haasil karte . (Jisay sadqa kar dete) lekin aaj hum mein se bahut son ke paas laakh laakh (dirham ya deenaar) maujood hain .

Hum se Sulayman bin Harb ne byaan kiya ‘ kaha ke hum se Shubah ne byaan kiya aur un se Abu Ishaq Amru bin Abdullah Sabiee ne kaha ke maine Abdullah bin Maqal se suna ‘ unhon ne kaha ke maine Adi bin Hatim razi Allahu anhu se suna ‘ unhon ne kaha ke maine Rasool Allah salla Allahu alaihi wasallam ko yeh kehte suna ke Jahannam se bacho agarchay khajoor ka ek tukra de kar hi sahi (magar zaroor sadqa kar ke dozakh ki aag se bachne ki koshish karo) .

Hum se Bishr bin Muhammad ne byaan kiya ‘ kaha ke humein Abdullah bin Mubarak ne khabar di ‘ kaha ke humein Mamar ne Zuhri se khabar di ‘ unhon ne kaha ke mujh se Abdullah bin Abi Bakr bin Hazm ne byaan kiya ‘ un se Urwah bin Zubayr ne aur un se Aisha razi Allahu anha ne ke ek aurat apni do bacchiyon ko liye mangti hui aayi . Mere paas ek khajoor ke siwa is waqt aur kuch na tha maine wahi de di . Woh ek khajoor us ne apni dono bacchiyon mein taqseem kar di aur khud nahi khayi . Phir woh uthi aur chali gayi . Is ke baad Nabi Karim salla Allahu alaihi wasallam tashreef laye to maine Aap salla Allahu alaihi wasallam se is ka haal byaan kiya . Aap salla Allahu alaihi wasallam ne farmaya ke jis ne in bacchiyon ki wajah se khud ko mamooli si bhi takleef mein dala to bacchiyan us ke liye dozakh se bacha'o ke liye aar ban jayeingi .