Aur Allah Ta'ala ka farman ke aur ae Paighambar! kaash tu is waqt ko dekhe jab zalim kafir maut ki sakhtiyoon mein giraftar hote hain aur farishte apne haath phailaye huay kehte jaate hain ke apni jaanein nikalo aaj tumhari saza mein tum ko ruswayi ka azab (yani qabr ka azab) hona hai . Imam Bukhari rahimahullah ne kaha ke lafz «hawan» Quran mein «huwan» ke maane mein hai yani zillat aur ruswayi aur hawan ka maani narmi aur malaimat hai . Aur Allah ne Surah at-Tauba mein farmaya ke hum un ko do baar azab dein ge . (yani dunya mein aur qabr mein) phir bare azab mein lautaye jayein ge . Aur Surah Momin mein farmaya Firaun walon ko bure azab ne gher liya , subah aur shaam aag ke saamne laye jaate hain aur Qayamat ke din to Firaun walon ke liye kaha jaye ga un ko sakht azab mein le jao .

Hum se Hafs bin Amr ne byaan kiya ‘ kaha hum se Shubah ne ‘ un se Alqamah bin Marthad ne ‘ un se Saad bin Ubaydah ne aur un se Bara bin Azib razi Allahu anhuma ne ke Nabi Karim salla Allahu alaihi wasallam ne farmaya ke momin jab apni qabr mein bithaya jata hai to is ke paas farishte aate hain . Woh shahadat deta hai ke Allah ke siwa koi mabood nahin aur Muhammad salla Allahu alaihi wasallam Allah ke Rasool hain . To yeh Allah ke is farman ki tabeer hai jo Surah Ibrahim mein hai ke Allah iman walon ko dunya ki zindagi aur aakhirat mein theek baat yani tauheed par mazboot rakhta hai .

Hum se Muhammad bin Bashar ne byaan kiya ‘ kaha hum se Ghundar ne kaha ke hum se Shubah ne yehi hadees byaan ki . Un ki riwayat mein yeh ziyaadati bhi hai ke aayat «yusabbit-ullahul-lazeena aamanoo...» ”Allah momino ko saabit qadmi bakhshta hai .“ azab-e-qabr ke baare mein nazil hui hai .

Hum se Ali bin Abdullah Madini ne byaan kiya ‘ kaha hum se Yaqub bin Ibrahim ne ‘ un se un ke baap ne ‘ un se Salih ne ‘ un se Nafi ne ke Ibn Umar razi Allahu anhuma ne unhein khabar di ke Nabi Karim salla Allahu alaihi wasallam kunwein walon (jis mein Badr ke mushrik maqtooleen ko daal diya gaya tha) ke qareeb aaye aur farmaya tumhare maalik ne jo tum se sacha waada kiya tha ise tum logon ne pa liya . Logon ne arz kiya ke Aap salla Allahu alaihi wasallam mardon ko khitab karte hain ? Aap salla Allahu alaihi wasallam ne farmaya ke tum kuch un se zyada sunne wale nahin ho albatta woh jawab nahin de sakte .

Hum se Abdullah bin Muhammad ne byaan kiya ‘ kaha hum se Sufyan bin Uyaynah ne ‘ un se Hisham bin Urwah ne ‘ un se un ke waalid ne aur un se Aisha razi Allahu anha ne farmaya ke Rasool Allah salla Allahu alaihi wasallam ne Badr ke kafiroon ko yeh farmaya tha ke main jo un se kaha karta tha ab un ko maloom hua ho ga ke woh sach hai . Aur Allah ne Surah ar-Room mein farmaya «innaka la tusmi-ul-mauta» ae Paighambar! tu mardon ko nahin suna sakta .

Hum se Abdan ne byaan kiya ‘ kaha mujh ko mere baap (Uthman) ne khabar di ‘ unhein Shubah ne ‘ unhon ne Ashath se suna ‘ unhon ne apne waalid Abush Shatha se ‘ unhon ne Masrooq se aur unhon ne Aisha razi Allahu anha se ke ek Yahudi aurat un ke paas aayi . Us ne azab-e-qabr ka zikr chhair diya aur kaha ke Allah tujh ko azab-e-qabr se mahfooz rakkhe . Is par Aisha razi Allahu anha ne Rasool Allah salla Allahu alaihi wasallam se azab-e-qabr ke baare mein daryaft kiya . Aap salla Allahu alaihi wasallam ne is ka jawab yeh diya ke han azab-e-qabr haq hai . Aisha razi Allahu anha ne byaan kiya ke phir main ne kabhi aisa nahin dekha ke Aap salla Allahu alaihi wasallam ne koi namaaz parhi ho aur is mein azab-e-qabr se Allah ki panah na maangi ho . Ghundar ne «azab-ul-qabri haqqun» ke alfaz zyada kiye .

Hum se Yahya bin Sulayman ne byaan kiya , unhon ne kaha , hum se Abdullah bin Wahb ne byaan kiya , unhon ne kaha ke mujhe Yunus ne Ibn Shihab se khabar di , unhon ne kaha mujhe Urwah bin Zubayr ne khabar di , unhon ne Asma bint Abi Bakr razi Allahu anha se suna ke Rasool Allah salla Allahu alaihi wasallam khutba ke liye kharay huay to Aap salla Allahu alaihi wasallam ne qabr ke imtihan ka zikr kiya jahan insaan jaancha jata hai . Jab Nabi Karim salla Allahu alaihi wasallam is ka zikr kar rahe thay to Musalmanon ki hichkiyaan bandh gayin .

Hum se Ayash bin Waleed ne byaan kiya ‘ kaha hum se Abdul Ala ne byaan kiya ‘ kaha ke hum se Saeed ne byaan kiya ‘ un se Qatadah ne aur un se Anas bin Malik razi Allahu anhu ne ke Rasool Allah salla Allahu alaihi wasallam ne farmaya ke aadmi jab apni qabr mein rakkha jata hai aur janaza mein shareek hone wale log is se rukhsat hote hain to abhi woh un ke jooton ki awaaz sunta hota hai ke do farishte (Munkar Nakeer) is ke paas aate hain ‘ woh ise bitha kar poochte hain ke is shakhs yani Muhammad salla Allahu alaihi wasallam ke baare mein tu kya aeteqad rakhta tha ? Momin to yeh kahe ga ke main gawahi deta hoon ke Aap salla Allahu alaihi wasallam Allah ke bande aur us ke Rasool hain . Is jawab par is se kaha jaye ga ke tu yeh dekh apna Jahannam ka thikana lekin Allah Ta'ala ne is ke badla mein tumhare liye Jannat mein thikana de diya . Is waqt ise Jahannam aur Jannat donon thikane dikhayi jayein ge . Qatadah ne byaan kiya ke is ki qabr khoob kushada kar di jaye gi . (jis se aaram o rahat mile) Phir Qatadah ne Anas razi Allahu anhu ki hadees byaan karni shuru ki ‘ farmaya aur munafiq o kafir se jab kaha jaye ga ke is shakhs ke baare mein tu kya kehta tha to woh jawab de ga ke mujhe kuch maloom nahin ‘ main bhi wahi kehta tha jo doosre log kehte thay . Phir is se kaha jaye ga na tu ne jaanne ki koshish ki aur na samajhne walon ki raaye par chala . Phir ise lohay ke gurzoon se bari zor se maara jaye ga ke woh cheekh pare ga aur is ki cheekh ko jinn aur insaanon ke siwa is ke aas paas ki tamam makhlooq sune gi .