Hum se Muhammad bin Muthanna ne byaan kiya ‘ kaha ke hum se Yahya bin Saeed Qattan ne , kaha hum se Shubah ne , kaha ke mujh se Awn bin Abi Hujayfah ne byaan kiya , un se un ke waalid Abu Hujayfah ne , un se Bara bin Azib ne aur un se Abu Ayub Ansari razi Allahu anhu ne byaan kiya ke Nabi Karim salla Allahu alaihi wasallam Madina se bahar tashreef le gaye , sooraj ghuroob ho chuka tha , is waqt Aap salla Allahu alaihi wasallam ko ek awaaz sunayi di . (Yahudiyoon par azab-e-qabr ki) phir Aap salla Allahu alaihi wasallam ne farmaya ke Yahudi par is ki qabr mein azab ho raha hai . Aur Nadar bin Shumayl ne byaan kiya ke humein Shubah ne khabar di , un se Awn ne byaan kiya , unhon ne apne baap Abu Hujayfah se suna , unhon ne Bara se suna , unhon ne Abu Ayub Ansari razi Allahu anhu se aur unhon ne Nabi Karim salla Allahu alaihi wasallam se .

Hum se Mu'alla bin Asad ne byaan kiya ‘ kaha hum se Wuhaib ne byaan kiya ‘ un se Musa bin Uqbah ne byaan kiya . Kaha ke mujh se Khalid bin Saeed bin Aas ki saahibzadi (Umm Khalid) ne byaan kiya ‘ unhon ne Nabi Karim salla Allahu alaihi wasallam ko qabr ke azab se panah mangte suna .

Hum se Muslim bin Ibrahim ne byaan kiya ‘ unhon ne kaha hum se Hisham Dastuwai ne byaan kiya ‘ un se Yahya bin Abi Kaseer ne byaan kiya , un se Abu Salamah ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam is tarah dua karte thay «Allahumma inni auzu bika min azabil-qabri, wa min azabin-nari, wa min fitnatil-mahya wal-mamat, wa min fitnatil-maseehid-dajjal» ”Ae Allah! main qabr ke azab se Teri panah chahta hoon aur Dozakh ke azab se aur zindagi aur maut ki aazmaishoon se aur kaane Dajjal ki bala se Teri panah chahta hoon“ .