Aur Fatima alaihas-salam ne kaha ke Nabi Karim salla Allahu alaihi wasallam ne chupke se mujh se ek baat kahi to main hans di. Ibn Abbas razi Allahu anhuma ne kaha ke Allah hi hansata hai aur rulata hai.

Hum se Habban bin Musa ne bayan kiya, kaha hum ko Abdullah ne khabar di, kaha hum ko Mamar ne khabar di, unhein Zuhri ne, unhein Urwah ne aur unhein Aisha razi Allahu anha ne ke Rifaa Qurazi ne apni biwi ko talaq de di aur talaq e raj'ee nahi di. Is ke baad in se Abd-ur-Rahman bin Zubayr razi Allahu anhuma ne nikah kar liya, lekin woh Nabi Karim salla Allahu alaihi wasallam ki khidmat mein hazir huien aur arz kiya: ya Rasool Allah! Main Rifaa razi Allahu anhu ke nikah mein thi lekin unhon ne mujhe teen talaqein de dein. Phir mujh se Abd-ur-Rahman bin Zubayr razi Allahu anhuma ne nikah kar liya, lekin Allah ki qasam in ke paas to pallu ki tarah ke siwa aur kuch nahi. (Murad yeh ke woh namard hain) aur unhon ne apne chadar ka pallu pakar kar bataya (rawi ne bayan kiya ke) Abu Bakr razi Allahu anhu Nabi Karim salla Allahu alaihi wasallam ke paas baithe huay thay aur Saeed bin al-Aas ke larke Khalid hujra ke darwaze par thay aur andar dakhil hone ki ijazat ke muntazir thay. Khalid bin Saeed is par Abu Bakr razi Allahu anhu ko aawaz de kar kehne lage ke Aap is aurat ko dante nahi ke Nabi Karim salla Allahu alaihi wasallam ke samne kis tarah ki baat kehti hai aur Nabi Karim salla Allahu alaihi wasallam ne tabassum ke siwa aur kuch nahi farmaya. Phir farmaya, ghaliban tum Rifaa ke paas dobara jaana chahti ho lekin yeh is waqt tak mumkin nahi hai jab tak tum in ka (Abd-ur-Rahman razi Allahu anhu ka) maza na chakh lo aur woh tumhara maza na chakh lein.

Hum se Ismail ne bayan kiya, kaha hum se Ibrahim ne bayan kiya, in se Salih bin Kaisan ne, in se Ibn Shihab ne, in se Abd-ul-Hameed bin Abd-ur-Rahman bin Zayd bin Khattab ne, in se Muhammad bin Saad ne aur in se in ke walid ne bayan kiya ke Umar bin Khattab razi Allahu anhu ne Nabi Karim salla Allahu alaihi wasallam ki khidmat mein hazir hone ki ijazat chahi. Is waqt Nabi Karim salla Allahu alaihi wasallam ke paas Aap ki kai biwiyaan jo Quraish se talluq rakhti thien Aap se kharch dene ke liye taqaza kar rahi thien aur oonchi aawaz mein baatein kar rahi thien. Jab Umar razi Allahu anhu ne ijazat chahi to woh jaldi se bhaag kar parde ke peeche chali gayiein. Phir Nabi Karim salla Allahu alaihi wasallam ne un ko ijazat di aur woh dakhil huay. Nabi Karim salla Allahu alaihi wasallam is waqt hans rahe thay, Umar razi Allahu anhu ne arz kiya: Allah Aap ko khush rakkhe, ya Rasool Allah! Mere maan baap Aap par qurban hon. Nabi Karim salla Allahu alaihi wasallam ne farmaya ke in par mujhe hairat hui, jo abhi mere paas taqaza kar rahi thien, jab unhon ne tumhari aawaz suni to fauran bhaag kar parde ke peeche chali gayiein. Umar razi Allahu anhu ne is par arz kiya: ya Rasool Allah! Aap is ke zyada mustahiq hain ke Aap se dara jaye, phir auraton ko mukhatab kar ke unhon ne kaha, apni jaanon ki dushman! Mujh se to tum darti ho aur Allah ke Rasool se nahi dartien. Unhon ne arz kiya: Aap Nabi Karim salla Allahu alaihi wasallam se zyada sakht hain. Is par Nabi Karim salla Allahu alaihi wasallam ne farmaya: haan Ae Ibn Khattab! Is zaat ki qasam jis ke hath mein meri jaan hai, agar shaytan bhi tumhein raste par aata hua dekhe ga to tumhara rasta chhorr kar doosre raste par chala jaye ga.

Hum se Qutaybah bin Saeed ne bayan kiya, kaha hum se Sufyan bin Uyaynah ne bayan kiya, in se Amr bin Dinar ne, in se Abu al-Abbas Saib ne aur in se Abdullah bin Umar razi Allahu anhuma ne bayan kiya ke jab Rasool Allah salla Allahu alaihi wasallam Taif mein thay (Fatah Makkah ke baad) to Aap salla Allahu alaihi wasallam ne farmaya ke agar Allah ne chaha to hum yahan se kal wapas hon ge. Aap ke baaz sahabah ne kaha ke hum is waqt tak nahi jayein ge jab tak usay fatah na kar lein. Nabi Karim salla Allahu alaihi wasallam ne farmaya ke agar yahi baat hai to kal subah larayi karo. Bayan kiya ke doosre din subah ko sahabah ne ghumsaan ki larayi lari aur bakasrat sahabah zakhmi huay. Nabi Karim salla Allahu alaihi wasallam ne farmaya ke in sha Allah hum kal wapas hon ge. Bayan kiya ke ab sab log khamosh rahe. Is par Nabi Karim salla Allahu alaihi wasallam hans pare. Humaydi ne bayan kiya ke hum se Sufyan ne poori sanad «khabar» ke lafz ke saath bayan ki.

Hum se Musa bin Ismail ne bayan kiya, kaha hum se Ibrahim bin Saad ne bayan kiya, kaha hum ko Ibn Shihab ne khabar di, unhein Humayd bin Abd-ur-Rahman ne, in se Abu Hurairah razi Allahu anhu ne bayan kiya ke ek sahab Rasool Allah salla Allahu alaihi wasallam ki khidmat mein hazir huay aur arz kiya: main to tabah ho gaya apni biwi ke saath Ramzan mein (roza ki halat mein) hum-bistari kar li. Nabi Karim salla Allahu alaihi wasallam ne farmaya ke phir ek ghulam aazad kar. Unhon ne arz kiya: mere paas koi ghulam nahi. Nabi Karim salla Allahu alaihi wasallam ne farmaya ke phir do mahine ke roze rakh. Unhon ne arz kiya: is ki mujh mein taqat nahi. Nabi Karim salla Allahu alaihi wasallam ne farmaya phir saath miskeenon ko khana khila. Unhon ne arz kiya ke itna bhi mere paas nahi hai. Bayan kiya ke phir khajoor ka ek tokra laya gaya. Ibrahim ne bayan kiya ke «araq» ek tarah ka (nau kilogram ka) ek paimana tha. Nabi Karim salla Allahu alaihi wasallam ne farmaya ke poochne wala kahan hai? Lo usay sadqa kar dena. Unhon ne arz kiya mujh se jo zyada muhtaj ho usay doon? Allah ki qasam! Madinah ke donon maidanon ke darmiyan koi gharana bhi hamase zyada muhtaj nahi hai. Is par Nabi Karim salla Allahu alaihi wasallam hans diye aur Aap ke samne ke dandan e mubarak khul gaye, is ke baad farmaya ke achha phir to tum miyaan biwi hi usay kha lo.

Hum se Abd-ul-Aziz bin Abdullah Owaysi ne bayan kiya, kaha hum se Imam Malik rahmahullah ne bayan kiya, in se Ishaq bin Abdullah bin Abi Talha ne aur in se Anas bin Malik razi Allahu anhu ne bayan kiya ke main Rasool Allah salla Allahu alaihi wasallam ke saath chal raha tha. Aap ke jism par ek Najrani chadar thi, jis ka hashiya mota tha. Itne mein ek dehati Aap salla Allahu alaihi wasallam ke paas aaya aur us ne Aap ki chadar bare zor se khainchi. Anas razi Allahu anhu ne bayan kiya ke main ne Nabi Karim salla Allahu alaihi wasallam ke shaane ko dekha ke zor se khainchne ki wajah se, is par nishan par gaye. Phir us ne kaha: Ae Muhammad! Allah ka jo maal Aap ke paas hai is mein se mujhe diye jaane ka hukm farmayein. Is waqt main ne Nabi Karim salla Allahu alaihi wasallam ko murr kar dekha to Aap muskura diye phir Aap salla Allahu alaihi wasallam ne usay diye jaane ka hukm farmaya.

Hum se Ibn Numayr ne bayan kiya, kaha hum se Ibn Idrees ne bayan kiya, in se Ismail ne, in se Qays ne aur in se Jareer razi Allahu anhu ne bayan kiya ke jab se main ne Islam qabool kiya Nabi Karim salla Allahu alaihi wasallam ne (apne paas aane se) kabhi nahi roka aur jab bhi Aap ne mujhe dekha to muskuraye.

Main ne Nabi Karim salla Allahu alaihi wasallam se shikayat ki ke main ghore par jum kar nahi baith paata to Nabi Karim salla Allahu alaihi wasallam ne apna hath mere seene par maara aur dua ki «allahumma sabit-hu waj-alhu haadiyam-mahdiy-yan» ”Ae Allah! Isay sabat farma, isay hidayat karne wala aur khud hidayat paya hua bana.“

Hum se Muhammad bin Musanna ne bayan kiya, kaha hum se Yahya Qattan ne bayan kiya, in se Hisham bin Urwah ne bayan kiya, unhein in ke walid ne khabar di, unhein Zaynub bint Umm Salamah razi Allahu anhuma ne, unhein Umm Salamah razi Allahu anha ne ke Umm Sulaym razi Allahu anha ne arz kiya: ya Rasool Allah! Allah haq se nahi sharmata, kya aurat ko jab ihtilam ho to is par ghusl wajib hai? Nabi Karim salla Allahu alaihi wasallam ne farmaya ke haan jab aurat pani dekhe (to is par ghusl wajib hai) is par Umm Salamah razi Allahu anha hansien aur arz kiya, kya aurat ko bhi ihtilam hota hai? Nabi Karim salla Allahu alaihi wasallam ne farmaya ke phir bacha ki surat maan se kyun milti hai.

Hum se Yahya bin Sulayman ne bayan kiya, unhon ne kaha ke mujh se Ibn Wahb ne bayan kiya, unhon ne kaha hum ko Amr ne khabar di, in se Abu al-Nadr ne bayan kiya, in se Sulayman bin Yasar ne aur in se Aisha razi Allahu anha ne bayan kiya ke Nabi Karim salla Allahu alaihi wasallam ko is tarah khul kar kabhi hanste nahi dekha ke Aap ke halaq ka kauwa nazar aane lagta ho, Aap salla Allahu alaihi wasallam sirf muskurate thay.