Sabit razi Allahu anhu ne Anas razi Allahu anhu se bayan kiya ke Nabi Karim salla Allahu alaihi wasallam ne (apne sahibzade) Ibrahim razi Allahu anhu ko goad mein liya aur unhein bosa diya aur usay soungha.

Hum se Musa bin Ismail ne bayan kiya, kaha hum se Mahdi ne bayan kiya, kaha hum se Ibn Yaqoob ne bayan kiya, in se Abu Nuaym ne bayan kiya ke main Ibn Umar razi Allahu anhuma ki khidmat mein maujood tha in se ek shakhs ne (halat e ihram mein) machhar ke maarne ke mutalliq poochha (ke is ka kya kaffara ho ga) Ibn Umar razi Allahu anhuma ne daryaft farmaya ke tum kahan ke ho? Is ne bataya ke Iraq ka, farmaya ke is shakhs ko dekho, (machhar ki jaan lene ke tawan ka masla poochhta hai) haalan ke is ke mulk walon ne Rasool Allah salla Allahu alaihi wasallam ke nawasa ko (be-takalluf qatl kar dala) main ne Nabi Karim salla Allahu alaihi wasallam se suna Aap salla Allahu alaihi wasallam farma rahe thay ke yeh donon (Hasan aur Husain razi Allahu anhuma) duniya mein mere do phool hain.

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, kaha mujh se Abdullah bin Abi Bakr ne bayan kiya, unhein Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha razi Allahu anha ne bayan kiya ke mere yahan ek aurat (aur) is ke saath do bachiyaan thien, woh maangne aayi thi. Mere paas se siwa ek khajoor ke usay aur kuch na mila. Main ne usay woh khajoor دے di aur us ne woh khajoor apni donon larkiyon ko taqseem kar di. Phir uth kar chali gayi is ke baad Nabi Karim salla Allahu alaihi wasallam tashreef laaye to main ne Aap se is ka zikr kiya to Aap salla Allahu alaihi wasallam ne farmaya ke jo shakhs bhi is tarah ki larkiyon ki parwarish kare ga aur in ke saath achha muamla kare ga to yeh is ke liye jahannum se parda ban jayein gi.

Hum se Abu al-Waleed ne bayan kiya, kaha hum se Layth ne bayan kiya, kaha hum se Saeed Muqbiri ne bayan kiya, kaha hum se Amr bin Sulaym ne bayan kiya, kaha hum se Abu Qatadah razi Allahu anhu ne bayan kiya, kaha ke Nabi Karim salla Allahu alaihi wasallam bahar tashreef laaye aur Umamah bint Abi al-Aas (jo bachi thien) woh Aap ke shana e mubarak par thien phir Nabi Karim salla Allahu alaihi wasallam ne namaz parhi jab Aap rukoo karte to unhein utaar dete aur jab kharay hote to phir utha laite.

Hum se Abu al-Yaman ne bayan kiya, unhon ne kaha hum ko Shuayb ne khabar di, unhein Zuhri ne khabar di, in se Abu Salamah bin Abd-ur-Rahman ne bayan kiya aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne Hasan bin Ali razi Allahu anhu ko bosa diya. Nabi Karim salla Allahu alaihi wasallam ke paas Aqra bin Habis razi Allahu anhu baithe huay thay. Aqra razi Allahu anhu ne is par kaha ke mere das larke hain aur main ne in mein se kisi ko bosa nahi diya. Nabi Karim salla Allahu alaihi wasallam ne in ki taraf dekha aur farmaya ke jo Allah ki makhlooq par raham nahi karta is par bhi raham nahi kiya jata.

Hum se Muhammad bin Yusuf ne bayan kiya, kaha hum se Sufyan ne bayan kiya, in se Hisham ne, in se Urwah ne aur in se Aisha razi Allahu anha ne bayan kiya ke ek dehati Nabi Karim salla Allahu alaihi wasallam ki khidmat mein hazir hua aur kaha Aap log bachon ko bosa dete hain, hum to unhein bosa nahi dete. Nabi Karim salla Allahu alaihi wasallam ne farmaya ke agar Allah ne tumhare dil se raham nikaal diya hai to main kya kar sakta hoon.

Hum se Ibn Abi Maryam ne bayan kiya, kaha hum se Abu Ghassan ne, kaha ke mujh se Zayd bin Aslam ne, in se un ke walid ne aur in se Umar bin Khattab razi Allahu anhu ne bayan kiya ke Nabi Karim salla Allahu alaihi wasallam ke paas kuch qaidi aaye qaidiyon mein ek aurat thi jis ka pistan doodh se bhara hua tha aur woh dor rahi thi, itne mein ek bacha is ko qaidiyon mein mila us ne jhat apne pait se laga liya aur is ko doodh pilane lagi. Hamase Nabi Karim salla Allahu alaihi wasallam ne farmaya ke kya tum khayal kar sakte ho ke yeh aurat apne bache ko aag mein daal sakti hai hum ne arz kiya ke nahi jab tak is ko qudrat ho gi yeh apne bache ko aag mein nahi phenk sakti. Nabi Karim salla Allahu alaihi wasallam ne is par farmaya ke Allah apne bandon par is se bhi zyada raham karne wala hai jitna yeh aurat apne bacha par meherban ho sakti hai.