Aur Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se Riwayat kiya ke Ibrahim (Alaihis Salam) ne Sarah (Alaihas Salam) ke sath hijrat ki to wo ek aise shehar mein pahunche jahan ek kafir badshah ya (ye kaha ke) zalim badshah tha. Is badshah ne kaha ke unhein (Ibrahim Alaihis Salam ko) Aajar (Hajira) ko de do. Nabi Kareem (Sallallahu Alaihi Wasallam) ki khidmat mein (Khaibar ke Yahudiyou ki taraf se dushmani mein) hadiya ke taur par bakri ka aisa gosht pesh kiya gaya tha jis mein zeher tha. Abu Humaid ne bayan kiya ke Ailah ke hakim ne Nabi Kareem (Sallallahu Alaihi Wasallam) ki khidmat mein safaid khachar aur chadar hadiya ke taur bheji thi aur Nabi Kareem (Sallallahu Alaihi Wasallam) ne ise likhwaya ke wo apni qoum ke hakim ki haisiyat se baqi rahe (kyunke us ne jizya dena manzoor kar liya tha)
.

Hum se Abdullah Bin Muhammad ne bayan kiya, kaha hum se Yunus Bin Muhammad ne bayan kiya, un se Shaiban ne bayan kiya Qatada se aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ki khidmat mein dabeez qisam ke resham ka ek jubba hadiya ke taur par pesh kiya gaya. Aap (Sallallahu Alaihi Wasallam) is ke istemal se (mardon ko) mana farmate thay. Sahaba ko bari hairat hui (ke kitna umda resham hai) Aap (Sallallahu Alaihi Wasallam) ne farmaya (tumhein is par hairat hai) is zaat ki qasam jis ke hath mein Muhammad (Sallallahu Alaihi Wasallam) ki jaan hai, jannat mein Saad Bin Muaz (Radi Allahu Anhu) ke roomal is se bhi zyada khubsoorat hain
.

Aur Saeed ne bayan kiya Qatada se aur un se Anas (Radi Allahu Anhu) ne ke Doomah (Tabook ke qareeb ek maqam) ke Ukaidar (Nasrani) ne Nabi Kareem (Sallallahu Alaihi Wasallam) ki khidmat mein hadiya bheja tha
.

Hum se Abdullah Bin Abdul Wahab ne bayan kiya, kaha hum se Khalid Bin Haris ne bayan kiya, un se Shuba ne, un se Hisham Bin Zaid ne aur un se Anas Bin Malik (Radi Allahu Anhu) ne ke ek Yahudi aurat Nabi Kareem (Sallallahu Alaihi Wasallam) ki khidmat mein zeher mila hua bakri ka gosht layi, Aap (Sallallahu Alaihi Wasallam) ne is mein se kuch khaya (lekin fauran hi farmaya ke is mein zeher para hua hai) phir jab ise laya gaya (aur us ne zeher dalne ka iqrar bhi kar liya) to kaha gaya ke kyun na ise qatal kar diya jaye. Lekin Aap (Sallallahu Alaihi Wasallam) ne farmaya ke nahi. Is zeher ka asar mein ne hamesha Nabi Kareem (Sallallahu Alaihi Wasallam) ke taalu mein mehsoos kiya
.

Hum se Abu Al-Numan ne bayan kiya, unhon ne kaha hum se Mutamir Bin Suleman ne bayan kiya, un se un ke baap ne bayan kiya, un se Abu Usman ne bayan kiya aur un se Abdur Rahman Bin Abi Bakr (Radi Allahu Anhuma) ne bayan kiya ke hum ek so tees aadmi Rasul Allah (Sallallahu Alaihi Wasallam) ke sath (ek safar mein) thay. Aap (Sallallahu Alaihi Wasallam) ne daryaft farmaya kya kisi ke sath khane ki bhi koi cheez hai? Ek Sahabi ke sath taqreeban ek saa khana (aata) tha. Wo aata goondha gaya. Phir ek lamba taranga mushrik pareshan haal bakriyan hankta hua aaya. To Nabi Kareem (Sallallahu Alaihi Wasallam) ne daryaft farmaya ye bechne ke liye hain. Ya kisi ka atiya hai ya Aap ne (atiya ki bajaye) hiba farmaya. Us ne kaha ke nahi bechne ke liye hain. Aap (Sallallahu Alaihi Wasallam) ne is se ek bakri khareedi phir wo zibah ki gayi. Phir Nabi Kareem (Sallallahu Alaihi Wasallam) ne is ki kaleji bhoonne ke liye kaha. Qasam Allah ki ek so tees ashaab mein se har ek ko is kaleji mein se kaat ke diya. Jo maujood thay unhein to Aap (Sallallahu Alaihi Wasallam) ne fauran hi de diya aur jo is waqt maujood nahi thay un ka hissa mehfooz rakh liya. Phir bakri ke gosht ko do bari qaabou mein rakkha gaya aur sab ne khoob sair ho kar khaya. Jo kuch qaabou mein bach gaya tha ise ont par rakh kar hum wapas laye. Aw kama qaal
.