Hum se Yahya bin Bukayr ne byaan kiya , kaha ke hum se Layth ne Aqeel se byaan kiya , un se Ibn Shihab ne , unhon ne kaha ke mujhe Urwah ne khabar di ke Aisha razi Allahu anha ne unhein khabar di ke Rasool Allah salla Allahu alaihi wasallam ne raat ke waqt uth kar masjid mein namaaz parhi aur chand sahabah bhi Aap salla Allahu alaihi wasallam ki iqtada mein namaaz parhne kharay ho gaye . Subah ko in sahabah (Rizwan Allah alaihim ajmaeen) ne doosre logon se is ka zikr kiya chunanche (doosre din) is se bhi zyada jama ho gaye aur Aap salla Allahu alaihi wasallam ke peeche namaaz parhi . Doosri subah ko is ka charcha aur zyada hua phir kya tha teesri raat bari tadaad mein log jama ho gaye aur jab Rasool Allah salla Allahu alaihi wasallam uthe to sahabah razi Allahu anhum ne Aap salla Allahu alaihi wasallam ke peeche namaaz shuroo kar di . Chauthi raat jo aayi to masjid mein namaziyon ki kasrat se til rakhne ki bhi jagah nahi thi . Lekin aaj raat Nabi Karim salla Allahu alaihi wasallam ne yeh namaaz na parhayi aur Fajr ki namaaz ke baad logon se farmaya , pehle aap ne kalimah shahadat parha phir farmaya . «Amma ba'd» ! mujhe tumhari is haziri se koi darr nahi lekin main is baat se dara ke kahein yeh namaaz tum par farz na kar di jaye , phir tum se yeh ada na ho sake . Is riwayat ki mutabi'at Yunus ne ki hai .

Hum se Muhammad bin Salam Baykandi ne byaan kiya , kaha ke hum se Abdah bin Sulayman ne Yahya bin Saeed Ansari ke wastay se byaan kiya , unhon ne Umrah bint Abdur Rahman se , unhon ne Aishah razi Allahu anha se , Aap ne batlaya ke Rasool Allah salla Allahu alaihi wasallam raat mein apne hijray ke andar (tahajjud ki) namaaz parhte thay . Hijray ki deewarein post thi is liye logon ne Nabi Karim salla Allahu alaihi wasallam ko dekh liya aur kuch log Aap salla Allahu alaihi wasallam ki iqtida mein namaaz ke liye kharay ho gaye . Subah ke waqt logon ne is ka zikr doosron se kiya . Phir jab doosri raat Aap salla Allahu alaihi wasallam kharay huay to kuch log Aap salla Allahu alaihi wasallam ki iqtida mein us raat bhi kharay ho gaye . Yeh soorat do ya teen raat tak rahi . Is ke baad Rasool Allah salla Allahu alaihi wasallam baith rahe aur namaaz ke maqaam par tashreef nahi laye . Phir subah ke waqt logon ne is ka zikr kiya to Aap salla Allahu alaihi wasallam ne farmaya ke main dara ke kahin raat ki namaaz (tahajjud) tum par farz na ho jaye . (is khayal se main ne yahan ka aana naagah kar diya) .

Hum se Abdullah bin Yusuf Tanisi ne byaan kiya , unhon ne kaha ke humein Imam Malik rahimahullah ne khabar di , unhein Ibn Shihab Zuhri ne , unhein Urwah bin Zubayr ne , unhein Umm al-Mumineen Aisha razi Allahu anha ne ke Rasool Allah salla Allahu alaihi wasallam ne ek raat masjid mein namaaz parhi . Sahaba ne bhi Aap salla Allahu alaihi wasallam ke saath yeh namaaz parhi . Doosri raat bhi Aap salla Allahu alaihi wasallam ne yeh namaaz parhi to namaziyon ki tadaad bohat barh gayi teesri ya chauthi raat to poora ijtima hi ho gaya tha . Lekin Nabi Karim salla Allahu alaihi wasallam is raat namaaz parhane tashreef nahin laaye . Subah ke waqt Aap salla Allahu alaihi wasallam ne farmaya ke tum log jitni bari tadaad mein jama ho gaye thay . Main ne ise dekha lekin mujhe bahar aane se yeh khayal manay raha ke kahin tum par yeh namaaz farz na ho jaye . Yeh Ramazan ka waqia tha .

Hum se Ismail Bin Uwais ne bayan kiya, kaha ke mujh se Imam Malik ne bayan kiya, un se Ibn Shihab ne, un se Urwah Bin Zubair (Radi Allahu Anhu) ne aur un se Nabi Kareem (Sallallahu Alaihi Wasallam) ki zaujah-e-mutahira Aisha (Radi Allahu Anha) ne ke Nabi Kareem (Sallallahu Alaihi Wasallam) ne ek baar namaz (tarawih) parhi aur ye Ramzan mein hua tha
.

Aur hum se Yahya Bin Bukair ne bayan kiya, kaha ke hum se Laith Bin Saad ne bayan kiya, un se Aqeel ne, un se Ibn Shihab ne, unhein Urwah ne khabar di aur unhein Aisha (Radi Allahu Anha) ne khabar di ke Rasul Allah (Sallallahu Alaihi Wasallam) ek martaba (Ramzan ki) nisf-e-shab mein masjid tashreef le gaye aur wahan tarawih ki namaz parhi. Kuch sahaba (Radi Allahu Anhum) bhi aap ke sath namaz mein shareek ho gaye. Subah hui to unhon ne is ka charcha kiya. Chunanche doosri raat mein log pehle se bhi zyada jama ho gaye aur Aap (Sallallahu Alaihi Wasallam) ke sath namaz parhi. Doosri subah ko aur zyada charcha hua aur teesri raat is se bhi zyada log jama ho gaye. Aap ne (is raat bhi) namaz parhi aur logon ne Aap (Sallallahu Alaihi Wasallam) ki iqteda ki. Chauthi raat ko ye aalam tha ke masjid mein namaz parhne aane walon ke liye jagah bhi baqi nahi rahi thi. (lekin is raat aap bar-amad hi nahi hue) balkay subah ki namaz ke liye bahar tashreef laye. Jab namaz parh li to logon ki taraf mutawajja ho kar shahadat ke baad farmaya. Amm-a-Ba'ad! tumhare yahan jama hone ka mujhe ilm tha, lekin mujhe khauf is ka hua ke kahin ye namaz tum par farz na kar di jaye aur phir tum is ki aday-i-gi se aajiz ho jao, chunanche jab Nabi Kareem (Sallallahu Alaihi Wasallam) ki wafat hui to yehi kaifiyat qayam rahi
.