Hum se Abul Yaman ne byaan kiya , kaha ke hamein Shoaib ne Zuhri se khabar di , unhon ne kaha ke mujhe Urwah bin Zubayr ne Aishah razi Allahu anha se byaan kiya , Aap razi Allahu anha ne farmaya ke Rasool Allah salla Allahu alaihi wasallam ne ek marteba Isha ki namaaz mein itni der ki ke Umar razi Allahu anhu ko kehna para ke auraten aur bache so gaye . Phir Nabi Karim salla Allahu alaihi wasallam (hijray se tashreef laye aur farmaya ke dekho roye zameen par is namaaz ka (us waqt) tumhare siwa aur koi intizaar nahi kar raha hai . Un dinon Madinah ke siwa aur kahin namaaz nahi parhi jati thi aur log Isha ki namaaz shafaq doobne ke baad se raat ki pehli tehayi guzarne tak parha karte thay .

Hum se Yahya bin Bukair ne bayan kiya , unhon ne kaha hum se Layth ne Aqeel ke wastay se bayan kiya , unhon ne Ibn Shihab se , unhon ne Urwah se ke Aisha raziyallahu anha ne unhein khabar di ke ek raat Rasool Allah salla Allahu alaihi wa sallam ne isha ki namaz der se parhi . Yeh Islam ke phelnay se pehle ka waqia hai . Aap salla Allahu alaihi wa sallam is waqt tak bahar tashreef nahi laye jab tak Umar raziyallahu anhu ne yeh na farmaya ke auraten aur bache sab so gaye . Pas aap salla Allahu alaihi wa sallam tashreef laye aur farmaya ke tumhare ilawa duniya mein koi bhi insaan is namaz ka intizar nahi karta .

Hum se Muhammad bin Alaa ne bayan kiya kaha hum se Abu Usama ne Buraid ke wastay se , unhon ne Abi Burda se unhon ne Abu Moosa Ashari raziyallahu anhu se , aap ne farmaya ke mein ne apne un sathiyon ke sath jo kashti mein mere sath Habsha se aaye thay Baqi Bathan mein qiyam kiya . Is waqt Nabi Karim salla Allahu alaihi wa sallam Madina mein tashreef rakhte thay . Hum mein se koi na koi isha ki namaz mein rozana bari muqarrar kar ke Nabi Karim salla Allahu alaihi wa sallam ki khidmat mein hazir hua karta tha . Ittifaq se mein aur mere ek sathi ek martaba aap salla Allahu alaihi wa sallam ki khidmat mein hazir hue . Aap salla Allahu alaihi wa sallam apne kisi kaam mein mashghool thay . Kisi milli muamle mein aap salla Allahu alaihi wa sallam aur Abu Bakr Siddiq raziyallahu anhu guftugu farma rahe thay jis ki wajah se namaz mein der ho gayi aur taqreeban aadhi raat guzar gayi . Phir Nabi Karim salla Allahu alaihi wa sallam tashreef laye aur namaz parhayi . Namaz poori kar chukay to hazireen se farmaya ke apni apni jagah par waqar ke sath baithe raho aur ek khushkhabri suno . Tumhare siwa duniya mein koi bhi aisa aadmi nahi jo is waqt namaz parhta ho , ya aap salla Allahu alaihi wa sallam ne yeh farmaya ke tumhare siwa is waqt kisi ummat ne bhi namaz nahi parhi thi . Yeh yaqeen nahi ke aap ne in do jumlon mein se kon sa jumla kaha tha . Phir raawi ne kaha ke Abu Moosa raziyallahu anhu ne farmaya . Pas hum Nabi Karim salla Allahu alaihi wa sallam se yeh sun kar bohot hi khush ho kar lote .

Hum se Ayyub bin Sulaiman ne bayan kiya , kaha hum se Abu Bakr ne Sulaiman se , un se Saleh bin Kaisan ne bayan kiya ke mujhe Ibn Shihab ne Urwah se khabar di ke Aisha raziyallahu anha ne batlaya ke Rasool Allah salla Allahu alaihi wa sallam ne ek dafa isha ki namaz mein der farmayi . Yahan tak ke Umar raziyallahu anhu ne pukara , namaz! auraten aur bache sab so gaye . Tab aap salla Allahu alaihi wa sallam ghar se bahar tashreef laye , aap salla Allahu alaihi wa sallam ne farmaya ke roye zameen par tumhare ilawa aur koi is namaz ka intizar nahi karta . Raawi ne kaha , is waqt yeh namaz bajamaat Madina ke siwa aur kahin nahi parhi jati thi . Sahaba is namaz ko sham ki surkhi ke ghaib hone ke baad raat ke pehle tehai hissay tak kisi waqt bhi parhte thay .

To unhon ne farmaya ke mein ne Abdullah bin Abbas raziyallahu anhuma se suna tha ke Nabi Karim salla Allahu alaihi wa sallam ne ek raat isha ki namaz mein der ki jis ke nateeje mein log masjid hi mein so gaye . Phir bedar hue phir so gaye phir bedar hue . Aakhir mein Umar bin Khattab raziyallahu anhu uthe aur pukara namaz Ata ne kaha ke Ibn Abbas raziyallahu anhuma ne batlaya ke is ke baad Nabi Karim salla Allahu alaihi wa sallam ghar se tashreef laye . Woh manzar meri nigahon ke samne hai jab ke aap salla Allahu alaihi wa sallam ke sar mubarak se pani ke qatre tapak rahe thay aur aap hath sar par rakhe hue thay . Aap ne farmaya ke agar meri ummat ke liye mushkil na ho jati , to mein unhein hukm deta ke isha ki namaz ko isi waqt parhen . Mein ne Ata se mazeed tahqeeq chahi ke Nabi Karim salla Allahu alaihi wa sallam ke hath sar par rakhne ki kaifiyat kya thi ? Ibn Abbas raziyallahu anhuma ne unhein is silsile mein kis tarah khabar di thi . Is par Ata ne apne hath ki ungliyan thori si khol di aur unhein sar ke ek kinare par rakha phir unhein mila kar yun sar par pherne lage ke un ka angutha kaan ke is kinare se jo chehre se qareeb hai aur darhi se ja laga . Na susti ki aur na jaldi , balkay is tarah kiya aur kaha ke phir Nabi Karim salla Allahu alaihi wa sallam ne farmaya ke agar meri ummat par mushkil na guzarti to mein hukm deta ke is namaz ko isi waqt parha karen .

Hum se Abul Yaman ne byaan kiya , unhon ne kaha ke hamein Shoaib ne Zuhri se khabar di , unhon ne kaha ke mujhe Urwah bin Zubayr ne khabar di ke Umm al-Momineen Aishah razi Allahu anha ne farmaya ke Nabi Karim salla Allahu alaihi wasallam ne ek raat Isha mein der ki aur Ayyash ne hum se Abdul Aala se byaan kiya , unhon ne kaha ke hum se Mamar ne Zuhri se byaan kiya , un se Urwah ne aur un se Aishah razi Allahu anha ne farmaya ke Rasool Allah salla Allahu alaihi wasallam ne Isha mein ek marteba der ki . Yahan tak ke Umar razi Allahu anhu ne awaaz di ke auraten aur bache so gaye . Phir Nabi Karim salla Allahu alaihi wasallam (hijray se) tashreef laye aur farmaya ke dekho roye zameen par is namaaz ka (us waqt) tumhare siwa aur koi intizaar nahi kar raha hai . Un dinon Madinah ke siwa aur kahin namaaz nahi parhi jati thi .