Hum se Musa bin Ismail ne bayan kiya, kaha hum se Abd-ul-Wahid bin Ziyad ne bayan kiya, in se Aamash ne, in se Ibrahim Nakhai ne, in se Alqama bin Qays ne aur in se Abdullah bin Masood razi Allahu anhune bayan kiya ke main Nabi Karim salla Allahu alaihi wasallam ke saath Madinah ke ek khet mein chal raha thu. Nabi Karim salla Allahu alaihi wasallam apne hath ki chhari ka sahara laite jaate thay, phir hum Yahudiyon ki ek jama'at ke paas se guzre to in logon ne aapas mein kaha ke in se rooh ke baare mein poochho. Kuch Yahudiyon ne mashwara diya ke na poochho, kahin koi aaisi baat na kahein jis ka (in ki zaban se sunna) tum pasand na karo. Lekin baaz ne israr kiya ke nahi! hum poochhein ge. Chunanche in mein se ek ne uth kar kaha: Ae Abu al-Qasim! rooh kiya cheez hai? Nabi Karim salla Allahu alaihi wasallam is par khamosh ho gaye. Main ne samajh liya ke Aap par wahi nazil ho rahi hai. Phir Aap salla Allahu alaihi wasallam ne yeh aayat parhi «wa yas-aloonaka an-ir-roohi qul-ir-roohu min amree rab-bee wa maaa ootoo minal-ilmi il-laa qaleelan» ”aur log Aap se rooh ke baare mein poochte hain. Keh dijiye ke rooh meere Rabb ke amar mein se hai aur tumhein is ka ilm bahut thora diya gaya hai.“ Aamash ne kaha ke hamari qiraat mein isi tarah hai.

Hum se Qais bin Hafs ne bayan kiya, un se Abdul Waahid ne, un se A’mash Sulaiman bin Mahran ne Ibrahim ke waaste se bayan kiya, unhon ne Alqamah se naql kiya, unhon ne Abdullah bin Mas’ood se riwayat kiya, woh kehte hain ke (ek martaba) main Rasoolullah Sallallahu Alaihi Wasallam ke saath Madinah ke khandaraat mein chal raha tha aur Aap khajoor ki chadi par sahara de kar chal rahe the, to kuch yahoodiyon ka (udhar se) guzar huwa, un mein se ek ne doosre se kaha ke Aap se rooh ke baare mein kuch poocho, un mein se kisi ne kaha mat poocho, aisa na ho ke woh koi aisi baat keh den jo tumhein na-gawaar ho (magar) un mein se ba’z ne kaha ke hum zaroor poochenge, phir ek shakhs ne khade ho kar kaha, aye Abul Qasim! Rooh kya cheez hai? Aap Sallallahu Alaihi Wasallam ne khamoshi ikhtiyaar farmaayi, main ne (dil mein) kaha ke Aap par Wahi aa rahi hai. Is liye main khada ho gaya. Jab Aap Sallallahu Alaihi Wasallam se (woh kaifiyat) door ho gayi to Aap Sallallahu Alaihi Wasallam ne (Quran ki yeh Aayat jo us waqt naazil hue thi) tilaawat farmaayi "(Aye Nabi!) Tum se yeh log rooh ke baare mein pooch rahe hain. Keh do ke rooh mere Rabb ke hukm se hai. Aur tumhein ilm ka bahut thoda hissah diya gaya hai. "(Is liye tum rooh ki haqeeqat nahi samajh sakte) A’mash kehte hain ke hamaari Qira’at main «وَمَا أُوتُوا» hai. ( «وَمَا أُوتِيتُمْ») nahi.

Hum se Umar bin Hafs bin Ghiyas ne byaan kiya , kaha hum se mere walid ne , kaha hum se Aamash ne , kaha ke mujh se Ibrahim Nakhai ne byaan kiya , un se Alqamah ne , un se Abdullah bin Masood razi Allahu anhu ne byaan kiya ke main Rasool Allah salla Allahu alaihi wasallam ke saath ek khet mein hazir tha Nabi Karim salla Allahu alaihi wasallam is waqt khajoor ke ek tanay par taik lagaye huay thay ke kuch Yahudi is taraf se guzre . Kisi Yahudi ne apne doosre saathi se kaha ke in se rooh ke baare mein poocho . In mein se kisi ne is par kaha aisa kyun karte ho ? Doosra Yahudi bola . Kahin woh koi aaisi baat na keh dein , jo tum ko napasand ho . Rai is par thehri ke rooh ke baare mein poochna hi chahiye . Chunanche unhon ne Aap se is ke baare mein sawal kiya . Nabi Karim salla Allahu alaihi wasallam thori der ke liye khamosh ho gaye aur un ki baat ka koi jawab nahi diya . Main samajh gaya ke is waqt Aap salla Allahu alaihi wasallam par wahi utar rahi hai . Is liye main wahin khara raha . Jab wahi khatam hui to Aap salla Allahu alaihi wasallam ne is aayat ki tilawat ki «wa yas'aloonaka anir-roohi qulir-roohu min amri rabbi wa ma ooteetum minal ilmi illa qaleelan» ke ”aur yeh Aap se rooh ke baare mein sawal karte hain . Aap keh dein ke rooh mere Parvardigar ke hukm hi se hai aur tumhein ilm to thora hi diya gaya hai .“

Hum se Muhammad bin Ubaid bin Maimoon ne bayan kiya, kaha hum se Esa bin Yunus ne bayan kiya, in se Aamash ne, in se Ibrahim ne, in se Alqama ne, in se Ibn Masood razi Allahu anhu ne bayan kiya ke main Nabi Karim salla Allahu alaihi wasallam ke saath Madinah ke ek khet mein thu. Nabi Karim salla Allahu alaihi wasallam khajoor ki ek shakh par tek lagaye huay thay ke Yahudi idhar se guzre to in mein se baaz ne kaha ke in se rooh ke baare mein poochho. Lekin doosron ne kaha ke in se na poochho. Kahin aaisi baat na suna dein jo tumhein napasand hai. Aakhir Aap ke paas woh log aane aur kaha: Abu al-Qasim! rooh ke baare mein hamain batayiye? Phir Nabi Karim salla Allahu alaihi wasallam thori der khare dekhte rahe main samajh gaya ke Aap par wahi nazil ho rahi hai. Main thori door hat gaya, yahan tak ke wahi ka nuzool poora ho gaya, phir Aap ne yeh aayat «wa yas-aloonaka an-ir-roohi qul-ir-roohu min amree rab-bee» parhi ”aur Aap rooh ke baare mein poochte hain, kehye ke rooh meere Rabb ke hukm mein se hai.“

Hum se Yahya bin Jafar ne bayan kiya, kaha hum se Waki bin Jarrah ne bayan kiya, in se Aamash ne, in se Ibrahim Nakhai ne, in se Alqama ne aur in se Ibn Masood razi Allahu anhune ke main Rasool Allah salla Allahu alaihi wasallam ke saath Madinah ke ek khet mein ja raha thu aur Aap salla Allahu alaihi wasallam ek khajoor ki chhari par tika laite jaate thay. Phir Aap Yahudiyon ki ek jama'at se guzre to in mein se baaz ne baaz se kaha ke in se rooh ke mutalliq poochho aur baaz ne kaha ke is ke mutalliq mat poochho. Aakhir unhon ne poochha to Aap chhari par tek laga kar khare ho gaye aur main Aap ke peeche thu. Main ne samajh liya ke Aap par wahi nazil ho rahi hai. Chunanche Aap ne yeh aayat parhi «wa yas-aloonaka an-ir-roohi qul-ir-roohu min amree rab-bee wa maaa ooteetum-minal-ilmi il-laa qaleelan» ”aur log Aap se rooh ke mutalliq poochte hain, keh dijiye ke rooh meere Rabb ke amar se aur tumhein ilm bahut thora diya gaya hai.“ Is par baaz Yahudiyon ne apne saathiyon se kaha ke hum ne kaha na thu ke mat poochho.