Hum se Yahya bin Jafar ne bayan kiya, unhon ne kaha hum se Abu Muawiyah ne bayan kiya, in se Aamash ne aur in se Ibrahim Taymi ne, in se in ke walid ne aur in se Abu Zarr razi Allahu anhu ne bayan kiya ke main masjid mein dakhil hua aur Rasool Allah salla Allahu alaihi wasallam baithe huay thay, phir jab sooraj ghuroob hua to Aap salla Allahu alaihi wasallam ne farmaya ”Ae Abu Zarr! kya tumhein maloom hai yeh kahan jata hai?“ Bayan kiya ke main ne arz kiya ke Allah aur is ka Rasool zyada jaanne wale hain. Farmaya ke yeh jata hai aur sajda ki ijazat chahta hai phir usay ijazat di jaati hai aur goya is se kaha jata hai ke wapas wahan jao jahan se aaye ho. Chunanche woh maghrib ki taraf se tuloo hota hai, phir Aap ne yeh aayat parhi «zhaalika mustaqar-rul-lahaa» Abdullah razi Allahu anhu ki qiraat yun hi hai.

Hum se Muhammad Bin Yusuf ne bayan kiya, kaha hum se Sufyan Thauri ne bayan kiya, un se Aamash ne, un se Ibrahim Taimi ne, un se un ke baap Yazid Bin Shareek ne aur un se Abu Zarr Ghifari (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne jab sooraj ghuroob hua to un se pucha ke tum ko maloom hai ye sooraj kahan jata hai? Mein ne arz ki ke Allah aur us ke Rasul hi ko ilm hai. Aap (Sallallahu Alaihi Wasallam) ne farmaya ke ye jata hai aur Arsh ke neeche pahunch kar pehle sajda karta hai. Phir (dobara aane) ki ijazat chahta hai aur ise ijazat di jati hai aur wo din bhi qareeb hai, jab ye sajda karega to is ka sajda qabool na hoga aur ijazat chahega lekin ijazat na milegi. Balki is se kaha jaye ga ke jahan se aaya tha wahin wapas chala ja. Chunanche is din wo maghrib hi se nikalega. Allah Ta'ala ke farman "wa-sh-shamsu tajri limustaqarrin laha zalika taqdeeru-l-azeezi-l-aleemi" (Yaaseen: 38) mein isi taraf isharah hai
.

Hum se Abu Nuaym ne bayan kiya, kaha hum se Aamash ne bayan kiya, in se Ibrahim Taymi ne, in se in ke walid ne aur in se Abu Zarr razi Allahu anhu ne bayan kiya ke Aaftab ghuroob hone ke waqt main masjid mein Nabi Karim salla Allahu alaihi wasallam ke saath maujood thu. Nabi Karim salla Allahu alaihi wasallam ne farmaya ke Abu Zarr! tumhein maloom hai yeh Aaftab kahan ghuroob hota hai? Main ne arz kiya Allah aur is ke Rasool ko zyada ilm hai. Aap salla Allahu alaihi wasallam ne farmaya ke yeh chalta rehta hai yahan tak ke arsh ke neeche sajda karta hai jaisa ke irshad e Bari hai «wash-shamsu tajree li-mustaqar-rul-lahaa zhaalika taqdeerul-azheezhil-aleemi» ke ”aur Aaftab apne thikane ki taraf chalta rehta hai, yeh zabardast ilm wale ka thehraya hua andazha hai.“