Hum se Muslim bin Ibrahim ne byaan kiya , kaha ke hum se Shubah ne Amr bin Dinar se byaan kiya , unhon ne Jabir bin Abdullah se ke Muaz bin Jabal razi Allahu anhu , Nabi Karim salla Allahu alaihi wasallam ke saath namaaz parhte phir wapas aa kar apni qom ki imamat kiya karte thay .

(doosri sanad) aur mujh se Muhammad bin Bashar ne byaan kiya , kaha ke hum se Ghundar Muhammad bin Jafar ne byaan kiya , kaha ke hum se Shubah ne Amr se byaan kiya , kaha ke main ne Jabir bin Abdullah Ansari se suna , Aap ne farmaya ke Muaz bin Jabal razi Allahu anhu , Nabi Karim salla Allahu alaihi wasallam ke saath (farz) namaaz parhte phir wapas ja kar apni qom ke logon ko (wohi) namaaz parhaya karte thay . Ek baar Isha mein unhon ne Surah Baqarah shuru ki . (muqtadiyon mein se) ek shakhs namaaz tor kar chal diya . Muaz razi Allahu anhu us ko bura kehne lage . Yeh khabar Nabi Karim salla Allahu alaihi wasallam ko pohanchi (us shakhs ne ja kar Muaz ki shikayat ki) Aap salla Allahu alaihi wasallam ne Muaz ko farmaya to bala mein daalne wala hai , bala mein daalne wala , bala mein daalne wala teen baar farmaya . Ya yun farmaya ke to fasaadi hai , fasaadi , fasaadi . Phir Aap salla Allahu alaihi wasallam ne Muaz ko hukm farmaya ke mufassal ke beech ki do surtain parha kare . Amr bin Dinar ne kaha ke mujhe yaad na rahein (ke kaun si suraton ka Aap ne naam liya .)

Hum se Aadam bin Abi Iyaas ne byaan kiya , kaha ke hum se Shubah ne byaan kiya , kaha ke hum se Muharib bin Dithar ne byaan kiya , kaha ke main ne Jabir bin Abdullah Ansari se suna , Aap ne batlaya ke ek shakhs paani uthane wala do oont liye huay aaya , raat taareek ho chuki thi . Us ne Muaz razi Allahu anhu ko namaaz parhate huay paya . Is liye apne oonton ko baitha kar (namaaz mein shareek hone ke liye) Muaz razi Allahu anhu ki taraf barha . Muaz razi Allahu anhu ne namaaz mein Surah Baqarah ya Surah Nisa shuru ki . Chunanchay woh shakhs niyat tor kar chal diya . Phir usay maloom hua ke Muaz razi Allahu anhu ne mujhe bura bhala kaha hai . Is liye woh Nabi Karim salla Allahu alaihi wasallam ki khidmat mein haazir hua aur Muaz ki shikayat ki , Nabi Karim salla Allahu alaihi wasallam ne us se farmaya , Muaz! kya tum logon ko fitna mein daalte ho . Aap salla Allahu alaihi wasallam ne teen marteba ( «fitaan» ya «faatan») farmaya: «sabbih isma rabbika , wash shamsi wa duhaha , wal layli iza yaghsha» (surtain) tum ne kyun na parheen , kyunke tumhare peeche boorhe , kamzor aur haajat mand namaaz parhte hain . Shubah ne kaha ke mera khayal hai ke yeh aakhri jumla (kyunke tumhare peeche al kh) hadees mein daakhil hai . Shubah ke saath is ki mutabaat Saeed bin Masrooq , Masar aur Shaybani ne ki hai aur Amr bin Dinar , Ubaydullah bin Muqsim aur Abuz Zubayr ne bhi is hadees ko Jabir ke wastay se byaan kiya hai ke Muaz ne Isha mein Surah Baqarah parhi thi aur Shubah ke saath is riwayat ki mutabaat Amash ne Muharib ke wastay se ki hai .

Hum se Sulayman bin Harb aur Abun Numan Muhammad bin Fadl ne byaan kiya , unhon ne kaha ke hum se Hammad bin Zaid ne byaan kiya , unhon ne Ayyub Sakhtiyani se , unhon ne Amr bin Dinar se , unhon ne Jabir razi Allahu anhu se farmaya ke Muaz razi Allahu anhu , Nabi Karim salla Allahu alaihi wasallam ke saath namaaz parhte phir wapas aa kar apni qom ko namaaz parhate thay .

Hum se Muhammad bin Ubadah ne bayan kiya, kaha hum ko Yazid ne khabar di, kaha hum ko Saleem ne khabar di, kaha hum se Amr bin Dinar ne bayan kiya, in se Jabir bin Abdullah razi Allahu anhuma ne bayan kiya ke Maaz bin Jabal razi Allahu anhu Nabi Karim salla Allahu alaihi wasallam ke saath namaz parhte, phir apni qaum mein aate aur unhein namaz parhate. Unhon ne (ek martaba) namaz mein Surah al-Baqarah parhi. Is par ek sahab jama'at se alag ho gaye aur halki namaz parhi. Jab is ke mutalliq Maaz ko maloom hua to kaha woh munafiq hai. Maaz ki yeh baat jab un ko maloom hui to woh Nabi Karim salla Allahu alaihi wasallam ki khidmat mein hazir huay aur arz kiya: ya Rasool Allah! Hum log mehnat ka kaam karte hain aur apni oontniyon ko khud pani pilate hain Maaz ne kal raat hamain namaz parhayi aur Surah al-Baqarah parhni shuru kar di. Is liye main namaz torr kar alag ho gaya, is par woh kehte hain ke main munafiq hoon. Nabi Karim salla Allahu alaihi wasallam ne farmaya ”Ae Maaz! Tum logon ko fitna mein mubtala karte ho, teen martaba Aap salla Allahu alaihi wasallam ne yeh farmaya (jab Imam ho to) Surah «wash-shamsi wa duha-ha» aur «sab-bihisma rabbikal-a-la» jaisi suratein parha karo.