Hum se Ali bin Abdullah ne bayan kiya, kaha hum se Sufyan ne bayan kiya, in se Abu al-Zinad ne, in se Aaraj ne, in se Abu Hurairah razi Allahu anhu ne bayan kiya ke Abu al-Qasim salla Allahu alaihi wasallam ne farmaya ”agar koi shakhs tumhari ijazat ke baghair tumhein (jab ke tum ghar ke andar ho) jhaank kar dekhe aur tum usay kankari maar do jis se is ki aankh phoot jaye to tum par koi gunah nahi hai.“

Hum se Adam bin Abi Iyas ne bayan kiya, kaha hum se Ibn Abi Zib ne bayan kiya, in se Zuhri ne, in se Sahl bin Saad razi Allahu anhu ne ke ek sahab ne Nabi Karim salla Allahu alaihi wasallam ke diwar ke ek surakh se ghar ke andar dekha Nabi Karim salla Allahu alaihi wasallam is waqt apna sar kanghay se khujla rahe thay phir Aap salla Allahu alaihi wasallam ne farmaya ke agar mujhe maloom hota ke tum jhaank rahe ho to main tumhari aankh phorr deta are izn (ijazat) lena to is ke liye hai ke aadmi ki nazar (kisi ke) satar par na pare.

Hum se Ali bin Abdullah ne bayan kiya, kaha hum se Sufyan ne, in se Zuhri ne bayan kiya (Sufyan ne kaha ke) main ne yeh hadees Zuhri se sun kar is tarah yaad ki hai ke jaise tu is waqt yahan maujood ho aur in se Sahl bin Saad ne ke ek shakhs ne Nabi Karim salla Allahu alaihi wasallam ke kisi hujra mein surakh se dekha, Nabi Karim salla Allahu alaihi wasallam ke paas is waqt ek kangha tha jis se Aap sar mubarak khuja rahe thay. Nabi Karim salla Allahu alaihi wasallam ne is se farmaya ke agar mujhe maloom hota ke tu jhaank raha hai to yeh kangha tumhari aankh mein chabho deta (andar dakhil hone se pehle) ijazat maangna to hai hi is liye ke (andar ki koi zaati cheez) na dekhi jaye.

Hum se Musaddad ne bayan kiya, kaha hum se Hammad bin Zayd ne bayan kiya, in se Ubaidullah bin Abi Bakr ne aur in se Anas bin Malik razi Allahu anhu ne ke ek sahab Nabi Karim salla Allahu alaihi wasallam ke kisi hujra mein jhaank kar dekhne lage to Nabi Karim salla Allahu alaihi wasallam in ki taraf teer ka phal ya bahut se phal le kar badhe, goya main Nabi Karim salla Allahu alaihi wasallam ko dekh raha hoon in sahab ki taraf is tarah chupke chupke tashreef laaye.

Aur isi asnad ke saath (riwayat hai ke Nabi Karim salla Allahu alaihi wasallam ne farmaya) agar koi shakhs tere ghar mein (kisi surakh ya jangle waghaira se) tum se ijazat liye baghair jhaank raha ho aur tum usay kankari maaro jis se is ki aankh phoot jaye to tum par koi saza nahi hai na gunah ho ga na duniya ki koi saza lagu ho gi.

Hum se Musaddad ne bayan kiya, kaha hum se Yahya ne bayan kiya, in se Humayd ne ke ek sahab Nabi Karim salla Allahu alaihi wasallam ke ghar mein jhaank rahe thay to Nabi Karim salla Allahu alaihi wasallam ne in ki taraf teer ka phal barhaya tha. Main ne poochha ke yeh hadees tum se kis ne bayan ki hai? To unhon ne bayan kiya Anas bin Malik razi Allahu anhu ne.

Hum se Abu al-Yaman ne bayan kiya, unhon ne kaha hum se Hammad bin Zayd ne bayan kiya, in se Ubaidullah bin Abi Bakr bin Anas ne bayan kiya aur in se Anas bin Malik razi Allahu anhu ne ke ek aadmi Nabi Karim salla Allahu alaihi wasallam ke ek hujra mein jhaankne laga to Nabi Karim salla Allahu alaihi wasallam teer ka phal le kar uthe aur chahte thay ke ghaflat mein is ko maar dein.

Hum se Qutaybah bin Saeed ne bayan kiya, unhon ne kaha hum se Layth bin Saad ne bayan kiya, in se Ibn Shihab ne bayan kiya aur unhein Sahl bin Saad al-Saadi razi Allahu anhu ne khabar di ke ek aadmi Nabi Karim salla Allahu alaihi wasallam ke darwaze ke ek surakh se andar jhaankne laga. Is waqt Nabi Karim salla Allahu alaihi wasallam ke paas lohay ka kangha thu jis se Aap sar jhaar rahe thay. Jab Aap ne usay dekha to farmaya ke agar mujhe maloom hota ke tum mera intizar kar rahe ho to main usay tumhari aankh mein chabho deta. Phir Aap salla Allahu alaihi wasallam ne farmaya ke (ghar ke andar aane ka) izn lene ka hukm diya gaya hai woh isi liye to hai ke nazar na pare.