Hum se Muhammad bin Mahboob ne bayan kiya, kaha hum se Abu Awanah ne bayan kiya, in se Qatadah ne aur in se Anas razi Allahu anhu ne bayan kiya ke Nabi Karim salla Allahu alaihi wasallam Jumu'ah ke din khutba de rahe thay ke ek aadmi khada hua aur kaha ke ya Rasool Allah! Allah se dua farma dijiye ke hamare liye baarish barsaye (Nabi Karim salla Allahu alaihi wasallam ne dua farmayi) aur aasman par baadal chha gaya aur baarish barasne lagi, yeh haal ho gaya ke hamare liye ghar tak pahunchna mushkil tha. Yeh baarish agle Jumu'ah tak hoti rahi phir wahi sahabi ya koi doosre sahabi is doosre Jumu'ah ko khade huay aur kaha ke Allah se dua farmayiye ke ab baarish band kar de hum to doob gaye. Nabi Karim salla Allahu alaihi wasallam ne dua ki ke Ae Allah! Hamare charon taraf bastiyon ko serab kar aur ham par baarish band kar de. Chunanche baadal tukray ho kar Madinah ke charon taraf bastiyon mein chala gaya aur Madinah walon par baarish ruk gayi.

Hum se Musaddad bin Musarhad ne byaan kiya , kaha ke hum se Hammad bin Zayd ne byaan kiya , un se Abdul Aziz bin Anas ne byaan kiya , un se Anas bin Malik razi Allahu anhu ne (doosri sanad) aur Hammad bin Yunus se bhi riwayat ki Abdul Aziz aur Yunus dono ne Sabit se , unhon ne Anas razi Allahu anhu se ke Nabi Karim salla Allahu alaihi wasallam Juma ka khutbah de rahe thay ke aik shakhs khara ho gaya aur arz kiya ya Rasool Allah salla Allahu alaihi wasallam maweshi aur bakriyan halak ho gayeen (barish na hone ki wajah se) Aap dua farmayein ke Allah Ta'ala barish barsaye . Chunanche Aap salla Allahu alaihi wasallam ne dono haath phailaye aur dua ki .

Hum se Ibrahim bin al-Munzir ne byaan kiya , unhon ne kaha ke hum se Waleed bin Muslim ne byaan kiya , unhon ne kaha ke hum se Imam Abu Amr Awzai ne byaan kiya , unhon ne kaha ke mujh se Ishaq bin Abdullah bin Abi Talhah razi Allahu anhu ne byaan kiya , un se Anas bin Malik razi Allahu anhu ne ke aik martaba Nabi Karim salla Allahu alaihi wasallam ke zamane mein qahet para , Aap salla Allahu alaihi wasallam khutbah de rahe thay ke aik dehati ne kaha ya Rasool Allah! jaanwar mar gaye aur ahl o ayal danon ko taras gaye . Aap hamare liye Allah Ta'ala se dua farmayein . Aap salla Allahu alaihi wasallam ne dono haath uthaye , us waqt baadal ka aik tukra bhi aasman par nazar nahi aa raha tha . Us zaat ki qasam jis ke haath meri jaan hai abhi Aap salla Allahu alaihi wasallam ne haathon ko neeche bhi nahi kiya tha ke paharon ki tarah ghata umad aayi aur Aap salla Allahu alaihi wasallam abhi minbar se utre bhi nahi thay ke main ne dekha ke barish ka pani Aap salla Allahu alaihi wasallam ke reesh mubarak se tapak raha tha . Us din is ke baad aur mutawatir aglay Juma tak barish hoti rahi . (doosre Juma ko) yahi dehati phir khara hua ya kaha ke koi doosra shakhs khara hua aur arz ki ke ya Rasool Allah! imaraten munahedim ho gayeen aur jaanwar doob gaye . Aap hamare liye Allah se dua kijiye . Aap salla Allahu alaihi wasallam ne dono haath uthaye aur dua ki ke ay Allah! ab doosri taraf barish barsa aur hum se rok de . Aap haath se baadal ke liye jis taraf bhi isharah karte , udhar matla saaf ho jata . Sara Madinah talaab ki tarah ban gaya tha aur Qanat ka nala mahina bhar behta raha aur ard-gird se aane wale bhi apne yahan bharpoor barish ki khabar dete rahe .

Hum se Abu Nuaym Fadl bin Dukayn ne byaan kiya , unhon ne kaha ke hum se Sufyan Thauri ne Abdullah bin Abi Bakr se byaan kiya , in se Abbad bin Tamim ne aur in se in ke chacha Abdullah bin Zayed ne ke Nabi Karim salla Allahu alaihi wasallam pani ki dua karne ke liye tashreef le gaye aur apni chadar ultayi .

Hum se Ishaq bin Ibrahim ne byaan kiya , unhon ne kaha ke hum se Wahb bin Jarir ne byaan kiya , unhon ne kaha hamein Shubah ne khabar di , unhein Muhammad bin Abi Bakr ne , unhein Abbad bin Tamim ne , unhein Abdullah bin Zayed razi Allahu anhu ke Nabi Karim salla Allahu alaihi wasallam ne Dua-e-Istisqa ki to apni chadar ko bhi ulta .

Hum se Ali bin Abdullah Madini ne byaan kiya , unhon ne kaha ke hum se Sufyan bin Uyaynah ne Abdullah bin Abi Bakr se byaan kiya , unhon ne Abbad bin Tamim se suna , woh apne baap se byaan karte thay ke in se in ke chacha Abdullah bin Zayed razi Allahu anhu ne byaan kiya ke Nabi Karim salla Allahu alaihi wasallam Eidgah gaye . Aap salla Allahu alaihi wasallam ne wahan Dua-e-Istisqa qibla ru ho kar ki aur Aap salla Allahu alaihi wasallam ne chadar bhi palti aur do rakat namaaz parhi . Abu Abdullah (Imam Bukhari rahmahu Allah) kehte hain ke Ibn Uyaynah kehte thay ke (hadees ke raawi Abdullah bin Zayed) wahi hain jinon ne azaan khwab mein dekhi thi lekin yeh in ki ghalati hai kyunke yeh Abdullah Ibn Zayed bin Asim Maazini hai jo Ansar ke qabeelah Maazin se thay .

Hum se Muhammad bin Marhoom Baykandi ne byaan kiya , unhon ne kaha ke hum se Abu Zamrah Anas bin Iyaz ne byaan kiya , unhon ne kaha ke hum se Shareek bin Abdullah bin Abi Namar ne byaan kiya ke unhon ne Anas bin Malik razi Allahu anhu se suna Aap ne aik shakhs (Ka'b bin Murrah ya Abu Sufyan) ka zikr kiya jo minbar ke saamne wale darwaze se Juma ke din Masjid-e-Nabwi mein aaya . Rasool Allah salla Allahu alaihi wasallam kharay hue khutbah de rahe thay , us ne bhi kharay kharay Rasool Allah salla Allahu alaihi wasallam se kaha ya Rasool Allah! (barish na hone se) jaanwar mar gaye aur raaste band ho gaye Aap Allah Ta'ala se barish ki dua farmayein unhon ne byaan kiya ke Rasool Allah salla Allahu alaihi wasallam ne yeh kehte hi haath utha diye Aap salla Allahu alaihi wasallam ne dua ki «Allahumma asqina , Allahumma asqina , Allahumma asqina» ke ay Allah! hamein sairaab kar . Ay Allah! hamein sairaab kar . Ay Allah! hamein sairaab kar . Anas razi Allahu anhu ne kaha bakhuda kahein door door tak aasman par baadal ka koi tukra nazar nahi aata tha aur na koi aur cheez (hawa waghaira jis se maloom ho ke barish aayegi) aur hamare aur Sila pahar ke darmiyan koi makan bhi na tha (ke hum baadal hone ke bawajood na dekh sakte hon) pahar ke peeche se dhaal ke barabar baadal namoodar hua aur beech aasman tak pahunch kar charon taraf phail gaya aur barish shuroo ho gayi , Allah ki qasam! hum ne sooraj aik hafta tak nahi dekha . Phir aik shakhs doosre Juma ko isi darwaze se aaya . Rasool Allah salla Allahu alaihi wasallam kharay hue khutbah de rahe thay , us shakhs ne phir Aap salla Allahu alaihi wasallam ko kharay kharay hi mukhatib kiya ke ya Rasool Allah! (barish ki kasrat se) maal o manal par tabahi aa gayi aur raaste band ho gaye . Allah Ta'ala se dua kijiye ke barish rok de . Phir Rasool Allah salla Allahu alaihi wasallam ne haath uthaye aur dua ki «Allahumma hawalaina wala alaina , Allahumma alal aakaami wal jibaali wal aajami wal zirabi wal awdiyati wa manabitish shajari» ke ya Allah ab hamare ard-gird barish barsa hum se ise rok de . Teelon , paharon , pahariyon , wadiyon aur baaghon ko sairaab kar . Unhon ne kaha ke us dua se barish khatam ho gayi aur hum nikle to dhoop nikal chuki thi . Shareek ne kaha ke main ne Anas razi Allahu anhu se poocha ke yeh wahi pehla shakhs tha to unhon ne farmaya ke mujhe maloom nahi .

Hum se Qutaybah bin Saeed ne byaan kiya , unhon ne kaha ke hum se Ismail bin Jafar ne byaan kiya , in se Shareek ne byaan kiya , in se Anas bin Malik razi Allahu anhu ke aik shakhs Juma ke din Masjid mein dakhil hua . Ab jahan Dar al-Qaza hai isi taraf ke darwaze se woh aaya tha . Rasool Allah salla Allahu alaihi wasallam kharay hue khutbah de rahe thay , us ne bhi kharay kharay Rasool Allah salla Allahu alaihi wasallam ko mukhatib kiya kaha ke ya Rasool Allah! jaanwar mar gaye aur raaste band ho gaye . Allah Ta'ala se dua kijiye ke hum par pani barsaye . Chunanche Rasool Allah salla Allahu alaihi wasallam ne dono haath utha kar dua farmayi «Allahumma aghisna , Allahumma aghisna , Allahumma aghisna» ay Allah! hum par pani barsa . Ay Allah! hamein sairaab kar . Anas razi Allahu anhu ne kaha Allah ki qasam! aasman par baadal ka kahein nishan bhi na tha aur hamare aur Sila pahar ke beech mein makanat bhi nahi thay , itne mein pahar ke peeche se baadal namoodar hua dhaal ki tarah aur aasman ke beech mein pahunch kar charon taraf phail gaya aur barsane laga . Allah ki qasam! hum ne aik hafta tak sooraj nahi dekha . Phir doosre Juma ko aik shakhs isi darwaze se dakhil hua . Rasool Allah salla Allahu alaihi wasallam kharay khutbah de rahe thay , is liye us ne kharay kharay kaha ke ya Rasool Allah! (kasrat-e-barish se) jaanwar tabah ho gaye aur raaste band ho gaye . Allah Ta'ala se dua kijiye ke barish band ho jaye . Rasool Allah salla Allahu alaihi wasallam ne dono haath utha kar dua ki «Allahumma hawalaina wala alaina , Allahumma alal aakaami wal zirabi wa butoonil awdiyati wa manabitish shajari» ay Allah! hamare atraf mein barish barsa (jahan zaroorat hai) hum par na barsa . Ay Allah! teelon pahariyon wadiyon aur baaghon ko sairaab kar . Chunanche barish ka silsila band ho gaya aur hum bahar aaye to dhoop nikal chuki thi . Shareek ne byaan kiya ke main ne Anas bin Malik razi Allahu anhu se daryaft kiya ke kya yeh pehla hi shakhs tha? Unhon ne jawab diya mujhe maloom nahi .

Hum se Musaddad bin Musarhad ne byaan kiya , unhon ne kaha ke hum se Abu Awana ne byaan kiya , in se Qatada ne byaan kiya , in se Anas bin Malik razi Allahu anhu ke Rasool Allah salla Allahu alaihi wasallam Juma ke din khutbah de rahe thay ke aik shakhs aaya aur arz kiya ke ya Rasool Allah! pani ka qahet par gaya hai , Allah se dua kijiye ke hamein sairaab kar de . Aap salla Allahu alaihi wasallam ne dua ki aur barish is tarah shuroo hui ke gharon tak pahunchna mushkil ho gaya , doosre Juma tak barabar barish hoti rahi . Anas razi Allahu anhu ne kaha ke phir (doosre Juma mein) wahi shakhs ya koi aur khara hua aur arz kiya ke ya Rasool Allah! dua kijiye ke Allah Ta'ala barish ka rukh kisi aur taraf mor de . Rasool Allah salla Allahu alaihi wasallam ne dua farmayi ke «Allahumma hawalaina wala alaina» ay Allah hamare ard-gird barish barsa hum par na barsa . Anas razi Allahu anhu ne kaha ke main ne dekha ke baadal tukre tukre ho kar dayein bayein taraf chale gaye phir wahan barish shuroo ho gayi aur Madinah mein is ka silsila band hua .

Hum se Abdullah bin Muslimah Qanabi ne byaan kiya , in se Imam Malik ne byaan kiya , in se Shareek bin Abdullah bin Abi Namar ne , in ko Anas razi Allahu anhu ne batlaya ke aik aadmi Rasool Allah salla Allahu alaihi wasallam ki khidmat mein hazir hua aur arz kiya ke jaanwar halak ho gaye aur raaste band ho gaye . Aap salla Allahu alaihi wasallam ne dua ki aur aik hafta tak barish hoti rahi phir aik shakhs aaya aur arz kiya ke (barish ki kasrat se) ghar gir gaye raaste band ho gaye . Chunanche Aap salla Allahu alaihi wasallam ne phir kharay ho kar dua ki «Allahumma alal aakaami wal zirabi wal awdiyati wa manabitish shajari» ke ay Allah! barish teelon , paharon , wadiyon aur baaghon mein barsa (dua ke nateeja mein) baadal Madinah se is tarah phat gaye jaise kapra phat kar tukre tukre ho jata hai .

Hum se Ismail bin Abi Ayub ne byaan kiya , unhon ne kaha ke mujh se Imam Malik ne byaan kiya , unhon ne Shareek bin Abdullah bin Abi Namar ke waasta se byaan kiya , in se Anas bin Malik razi Allahu anhu ne kaha ke aik shakhs Rasool Allah salla Allahu alaihi wasallam ki khidmat mein hazir hua . Arz ki ya Rasool Allah salla Allahu alaihi wasallam! maweshi halak ho gaye aur raaste band ho gaye . Aap Allah Ta'ala se dua kijiye . Rasool Allah salla Allahu alaihi wasallam ne dua farmayi to aik Juma se doosre Juma tak barish hoti rahi phir doosre Juma ko aik shakhs hazir-e-khidmat hua aur kaha ke ya Rasool Allah salla Allahu alaihi wasallam! (kasrat-e-baran se bahut se) makanat gir gaye , raaste band ho gaye aur maweshi halak ho gaye . Chunanche Rasool Allah salla Allahu alaihi wasallam ne dua farmayi «Allahumma ala ru'oosil jibaali wal aakaami wa butoonil awdiyati wa manabitish shajari» ke ay Allah! paharon teelon wadiyon aur baghat ki taraf barish ka rukh kar de . (jahan barish ki kami hai) chunanche Aap salla Allahu alaihi wasallam ki dua se baadal kapre ki tarah phat gaya .

Hum se Hasan bin Bishr ne byaan kiya , unhon ne kaha ke hum se Ma'afi bin Imran ne byaan kiya ke in se Imam Awzai ne , in se Ishaq bin Abdullah bin Abi Talhah ne , in se Anas bin Malik razi Allahu anhu ne byaan kiya ke aik shakhs ne Nabi Karim salla Allahu alaihi wasallam se (qahet se) maal ki barbadi aur ahl o ayal ki bhook ki shikayat ki . Chunanche Aap salla Allahu alaihi wasallam ne Dua-e-Istisqa ki . Raawi ne is mauqa par na chadar paltane ka zikr kiya aur na qibla ki taraf munh karne ka .

Hum se Abdullah bin Yusuf Tanisi ne byaan kiya , unhon ne kaha ke hamein Imam Malik rahmahu Allah ne Shareek bin Abdullah bin Abi Namar ke waasta se khabar di aur unhein Anas bin Malik razi Allahu anhu ne ke aik shakhs Rasool Allah salla Allahu alaihi wasallam ki khidmat mein hazir hua . Arz kiya ya Rasool Allah! (qahet se) jaanwar halak ho gaye aur raaste band , Allah se dua kijiye . Chunanche Aap salla Allahu alaihi wasallam ne dua ki aur aik Juma se aglay Juma tak aik hafta barish hoti rahi . Phir aik shakhs ne Rasool Allah salla Allahu alaihi wasallam ki khidmat mein hazir ho kar arz kiya ke ya Rasool Allah! (barish ki kasrat se) raaste band ho gaye aur maweshi halak ho gaye . Ab Rasool Allah salla Allahu alaihi wasallam ne yeh dua ki «Allahumma ala zuhooril jibaali wal aakaami wa butoonil awdiyati wa manabitish shajari» ke ay Allah! barish ka rukh paharon , teelon , wadiyon aur baghat ki taraf mor de , chunanche baadal Madinah se is tarah chhat gaya jaise kapra phat jaya karta hai .

Hum se Muhammad bin Kaseer ne byaan kiya , in se Sufyan Thauri ne , unhon ne byaan kiya ke hum se Mansoor aur A'mash ne byaan kiya , in se Abu al-Duha ne , in se Masrooq ne , Aap ne kaha ke main Ibn Masood razi Allahu anhu ki khidmat mein hazir tha . Aap ne farmaya ke Quraish ka Islam se airaz barhta gaya to Nabi Karim salla Allahu alaihi wasallam ne in ke haq mein bad-dua ki . Is bad-dua ke nateeja mein aisa qahet para ke kuffar marne lage aur murdar aur haddiyaan khane lage . Aakhir Abu Sufyan Aap ki khidmat mein hazir hua aur arz kiya ay Muhammad! (salla Allahu alaihi wasallam) Aap sila rehmi ka hukm dete hain lekin Aap ki qaum mar rahi hai . Allah Azzawajal se dua kijiye . Aap ne is aayat ki tilawat ki (tarjama) us din ka intezar kar jab aasman par saaf khula hua dhowan namoodar hoga Al-aayah (khair Aap ne dua ki barish hui qahet jata raha) lekin woh phir kufr karne lage is par Allah Paak ka yeh farmaan nazil hua (tarjama) jis din hum unhein sakhti ke sath pakar karein ge aur yeh pakar Badr ki larayi mein hui aur Asbat bin Muhammad ne Mansoor se byaan kiya ke Rasool Allah salla Allahu alaihi wasallam ne Dua-e-Istisqa ki (Madinah mein) jis ke nateeja mein khoob barish hui ke saat din tak woh barabar jari rahi . Aakhir logun ne barish ki ziadati ki shikayat ki to Rasool Allah salla Allahu alaihi wasallam ne dua ki «Allahumma hawalaina wala alaina» ke ay Allah! hamare atraf o jawanib mein barish barsa , Madinah mein barish ka silsila khatam kar . Chunanche baadal aasman se chhat gaya aur Madinah ke ard-gird khoob barish hui .

Mujh se Muhammad bin Abi Bakr ne byaan kiya , kaha ke hum se Mu'tamir bin Sulayman ne Ubaidullah Umri se byaan kiya , in se Sabit ne , in se Anas bin Malik razi Allahu anhu ke Rasool Allah salla Allahu alaihi wasallam Juma ke din khutbah de rahe thay ke itne mein logun ne kharay ho kar ghal machaya , kehne lage ke ya Rasool Allah! barish ke naam boond bhi nahi darakht surkh ho chuke (yani tamam patte khushk ho gaye) aur jaanwar tabah ho rahe hain , Aap Allah Ta'ala se dua kijiye ke hamein sairaab kare . Aap salla Allahu alaihi wasallam ne dua ki «Allahumma asqina» ay Allah! hamein sairaab kar . Do martaba Aap salla Allahu alaihi wasallam ne is tarah kaha , qasam Allah ki us waqt aasman par baadal kahein door door nazar nahi aata tha lekin dua ke baad achanak aik baadal aaya aur barish shuroo ho gayi . Aap salla Allahu alaihi wasallam minbar se utre aur namaaz parhayi . Jab Aap salla Allahu alaihi wasallam namaaz se farigh hue to barish ho rahi thi aur doosre Juma tak barish barabar hoti rahi phir jab Nabi Karim salla Allahu alaihi wasallam doosre Juma mein khutbah ke liye kharay hue to logun ne bataya ke makanat munahedim ho gaye aur raaste band ho gaye , Allah se dua kijiye ke barish band kar de . Is par Nabi Karim salla Allahu alaihi wasallam muskuraye aur dua ki «Allahumma hawalaina wala alaina» ay Allah! hamare atraf mein ab barish barsa , Madinah mein is ka silsila band kar . Aap salla Allahu alaihi wasallam ki dua se Madinah se baadal chhat gaye aur barish hamare ard-gird hone lagi . Is shaan se ke ab Madinah mein aik boond bhi na parti thi main ne Madinah ko dekha abr taj ki tarah girda-gird tha aur Madinah us ke beech mein .

Hum se Abu Nuaym Fadl bin Dukayn ne byaan kiya , in se Zuhair ne , in se Abu Ishaq ne ke Abdullah bin Zayed Ansari razi Allahu anhu Istisqa ke liye bahar nikle . In ke sath Bara bin Azib aur Zayed bin Arqam razi Allahu anhuma bhi thay . Unhon ne pani ke liye dua ki to paon par kharay rahe , minbar na tha . Isi tarah Aap ne dua ki phir do rakat namaaz parhi jis mein qirat buland aawaz se ki , na azaan kahi aur na iqamat Abu Ishaq ne kaha Abdullah bin Zayed ne Nabi Karim salla Allahu alaihi wasallam ko dekha tha .

Hum se Abul Yamaan Hakeem bin Nafi ne byaan kiya , unhon ne kaha ke hamein Shuayb ne khabar di , unhein Zuhri ne , unhon ne kaha ke mujh se Abbad bin Tamim ne byaan kiya ke un ke chacha Abdullah bin Zayed jo sahabi thay , unhein khabar di ke Nabi Karim salla Allahu alaihi wasallam logun ko sath le kar Istisqa ke liye nikle aur Aap kharay hue aur kharay hi kharay Allah Ta'ala se dua ki , phir qibla ki taraf munh kar ke apni chadar palti chunanche barish khoob hui .

Hum se Abu Nuaym Fadl bin Dukayn ne byaan kiya , kaha ke hum se Ibn Abi Zayb ne Zuhri se byaan kiya , in se Abbad bin Tamim ne aur in se in ke chacha (Abdullah bin Zayed) ke Nabi Karim salla Allahu alaihi wasallam Istisqa ke liye bahar nikle to qibla ru ho kar dua ki . Phir apni chadar palti aur do rakat namaaz parhi . Namaaz mein Aap salla Allahu alaihi wasallam ne qirat buland aawaz se ki .

Hum se Aadam bin Abi Iyaas ne byaan kiya , unhon ne kaha ke hum se Ibn Abi Zayb ne Zuhri se byaan kiya , in se Abbad bin Tamim ne , in se in ke chacha Abdullah bin Zayed ke main ne Nabi Karim salla Allahu alaihi wasallam ko jab Aap salla Allahu alaihi wasallam Istisqa ke liye bahar nikle , dekha tha . Unhon ne byaan kiya ke Aap salla Allahu alaihi wasallam ne apni peeth sahabah ki taraf kar di aur qibla rukh ho kar dua ki . Phir chadar palti aur do rakat namaaz parhayi jis ki qirat Quran mein Aap salla Allahu alaihi wasallam ne jahr kiya tha .

Mujh se Qutaybah bin Saeed ne byaan kiya , unhon ne kaha ke hum se Sufyan bin Uyaynah ne Abdullah bin Abi Bakr se byaan kiya , in se Abbad bin Tamim ne , in se in ke chacha Abdullah bin Zayed razi Allahu anhu ke Nabi Karim salla Allahu alaihi wasallam ne Dua-e-Istisqa ki to do rakat namaaz parhi aur chadar palti .

Hum se Abdullah bin Muhammad Musnadi ne byaan kiya , unhon ne kaha ke hum se Sufyan bin Uyaynah ne Abdullah bin Abi Bakr se byaan kiya , unhon ne Abbad bin Tamim se suna aur Abbad apne chacha Abdullah bin Zayed razi Allahu anhu se byaan karte thay ke Nabi Karim salla Allahu alaihi wasallam Dua-e-Istisqa ke liye Eidgah ko nikle aur qibla rukh ho kar do rakat namaaz parhi phir chadar palti . Sufyan Thauri ne kaha mujhe Abdur Rahman bin Abdullah Masoodi ne Abu Bakr ke hawale se khabar di ke Aap salla Allahu alaihi wasallam ne chadar ka dahna kona bayein kandhe par dala .

Abdul Aziz Owaisi ne kaha ke mujh se Muhammad bin Jafar ne byaan kiya in se Yahya bin Saeed aur Shareek ne , unhon ne kaha ke hum ne Anas razi Allahu anhu se suna ke Nabi Karim salla Allahu alaihi wasallam (ne Istisqa mein dua karne ke liye) is tarah haath uthaye ke main ne Aap salla Allahu alaihi wasallam ki baghlun ki safaidi dekh li .

Hum se Muhammad bin Bashar ne byaan kiya , unhon ne kaha ke hum se Yahya bin Saeed Qattan aur Muhammad bin Ibrahim bin Adi bin Aroobah ne byaan kiya , in se Saeed ne , in se Qatada aur in se Anas bin Malik razi Allahu anhu ke Nabi Karim salla Allahu alaihi wasallam Dua-e-Istisqa ke siwa aur kisi dua ke liye haath (zyada) nahi uthate thay aur Istisqa mein haath itna uthate ke baghlun ki safaidi nazar aa jati .

Hum se Muhammad bin Muqatil ne byaan kiya , unhon ne kaha ke hamein Abdullah bin Mubarak ne khabar di , unhon ne kaha ke hamein Imam Awzai ne khabar di , kaha ke hum se Ishaq bin Abdullah bin Abi Talhah Ansari ne byaan kiya , unhon ne kaha mujh se Anas bin Malik razi Allahu anhu ne byaan kiya ke Rasool Allah salla Allahu alaihi wasallam ke zamana mein logun par aik dafa qahet para . Inhi dinon Aap salla Allahu alaihi wasallam Juma ke din minbar par khutbah de rahe thay ke aik dehati ne kharay ho kar kaha ya Rasool Allah! jaanwar mar gaye aur baal bache faaqay par faaqay kar rahe hain , Allah Ta'ala se dua kijiye ke pani barsaye . Anas razi Allahu anhu ne byaan kiya ke Rasool Allah salla Allahu alaihi wasallam ne yeh sun kar dua ke liye dono haath utha diye . Aasman par door door tak abr ka pata tak nahi tha . Lekin (Aap salla Allahu alaihi wasallam ki dua se) paharon ke barabar baadal garajte hue aa gaye abhi Nabi Karim salla Allahu alaihi wasallam minbar se utre bhi nahi thay ke main ne dekha ke barish ka pani Aap salla Allahu alaihi wasallam ki daarhi se beh raha hai . Anas ne kaha ke us roz barish din bhar hoti rahi . Doosre din teesre din , bhi aur barabar isi tarah hoti rahi . Is tarah doosra Juma aa gaya . Phir yahi badwi ya koi doosra shakhs khara hua aur kaha ke ya Rasool Allah salla Allahu alaihi wasallam! (kasrat-e-baran se) imaraten gir gayeen aur jaanwar doob gaye , hamare liye Allah Ta'ala se dua kijiye . Chunanche Rasool Allah salla Allahu alaihi wasallam ne phir dono haath uthaye aur dua ki «Allahumma hawalaina wala alaina» ke ay Allah! hamare atraf mein barsa aur hum par na barsa . Anas ne kaha ke Nabi Karim salla Allahu alaihi wasallam apne haathun se aasman ki jis taraf bhi isharah kar dete abr udhar se phat jata , ab Madinah hauz ki tarah ban chuka tha aur isi ke baad wadi Qanat ka nala aik mahina tak behta raha . Anas ne byaan kiya ke is ke baad Madinah ke ard-gird se jo bhi aaya us ne khoob sairabi ki khabar layi .

Hum se Abdula'la bin Hammad ne bayan kiya, unhon ne kaha hum se Yazid bin Zurai ne bayan kiya, unhon ne kaha hum se Sa'id ne bayan kiya, unhon ne Qatadah se, unhon ne Anas bin Malik Radi Allahu Anhu se ke Rasoolullah Sallallahu Alaihi Wa Sallam dua istisqa ke siwa aur kisi dua mein (zyada uncha) hath nahi uthate thay. Is dua mein Aap Sallallahu Alaihi Wa Sallam itna uncha hath uthate ke baghl mubarak ki safedi dikhayi deti thi.

Hum se Musaddad ne bayan kiya, kaha hum se Hammad ne bayan kiya, un se Abdul Aziz ne aur un se Anas Radi Allahu Anhu ne is hadeeth ko Yunus se bhi riwayat kiya hai. Un se Thabit ne aur un se Anas Radi Allahu Anhu ne bayan kiya ke Rasoolullah Sallallahu Alaihi Wa Sallam ke zamane mein ek saal qahet para. Aap Sallallahu Alaihi Wa Sallam Jumua ki namaz ke liye khutba de rahe thay ke ek shakhs ne khare ho kar kaha: Ya Rasul Allah! Ghore bhook se halak ho gaye aur bakriyan bhi halak ho gayin. Aap Allah Ta'ala se dua kijiye ke woh hum par pani barsaye. Nabi Kareem Sallallahu Alaihi Wa Sallam ne apne hath uthaye aur dua ki. Anas Radi Allahu Anhu ne bayan kiya ke is waqt aasman sheeshe ki tarah (bilkul saaf) tha. Itne mein hawa chali. Us ne abr (badal) ko uthaya phir abr ke bahut se tukre jama ho gaye aur aasman ne goya apne dahane khol diye. Hum jab masjid se nikle to ghar pahunchte pahunchte pani mein doob chuke thay. Barish yun hi doosre Jumua tak barabar hoti rahi. Doosre Jumua ko wahi sahib ya koi doosre phir khare hue aur arz kiya: Ae Allah ke Rasool! Makanat gir gaye. Dua farmaye ke Allah Ta'ala barish ko rok de. Nabi Kareem Sallallahu Alaihi Wa Sallam muskuraye aur farmaya: Ae Allah! Ab hamare charon taraf barish barsa (jahan is ki zaroorat ho) hum par na barsa. Anas Radi Allahu Anhu kehte hain ke mein ne jo nazar uthayi to dekha ke isi waqt abr phat kar Madinah ke ard gird sar peech ki tarah ho gaya tha.

Hum se Muhammad bin Mahboob ne bayan kiya, kaha hum se Abu Awanah ne bayan kiya, in se Qatadah ne aur in se Anas razi Allahu anhu ne (doosri sanad) aur mujh se Khaleefa ne bayan kiya, kaha hum ko Yazid bin Zuray ne bayan kiya, in se Saeed ne bayan kiya, in se Qatadah ne aur in se Anas razi Allahu anhu ne ke ek sahab Jumu'ah ke din Nabi Karim salla Allahu alaihi wasallam ke paas aaye Nabi Karim salla Allahu alaihi wasallam is waqt Madinah mein Jumu'ah ka khutba de rahe thay, unhon ne arz kiya baarish ka qahet par gaya hai, Aap apne Rabb se baarish ki dua kijiye. Nabi Karim salla Allahu alaihi wasallam ne aasman ki taraf dekha kahin hamain baadal nazar nahi aa raha tha. Phir Aap ne baarish ki dua ki, itne mein baadal utha aur baaz tukray baaz ki taraf barhe aur baarish hone lagi, yahan tak ke Madinah ke naale behne lage. Agle Jumu'ah tak isi tarah baarish hoti rahi silsila toot-ta hi na tha chunanche wahi sahab ya koi doosre (agle Jumu'ah ko) khare huay, Nabi Karim salla Allahu alaihi wasallam khutba de rahe thay aur unhon ne arz kiya: hum doob gaye, apne Rabb se dua karein ke ab baarish band kar de. Nabi Karim salla Allahu alaihi wasallam ne farmaya, Ae Allah! Hamare charon taraf baarish ho, hum par na ho. Do ya teen martaba Aap salla Allahu alaihi wasallam ne yeh farmaya, chunanche Madinah Munawwarah se baadal chhatne lage, bayein aur dayein, hamare charon taraf doosre maqamat par baarish hone lagi aur hamare yahan baarish yak-dum band ho gayi. Yeh Allah ne logon ko Nabi Karim salla Allahu alaihi wasallam ka mo-jiza aur apne Paighambar salla Allahu alaihi wasallam ki karamat aur dua ki qabooliyat batlayi.

Hum se Musa bin Ismail ne bayan kiya, unhon ne kaha hum se Wuhaib bin Khalid ne bayan kiya, unhon ne kaha hum se Amr bin Yahya ne bayan kiya, in se Ubadah bin Tameem ne bayan kiya aur in se Abdullah bin Zayd Ansari razi Allahu anhu ne bayan kiya ke Rasool Allah salla Allahu alaihi wasallam is Eid-gah mein istisqa ki dua ke liye nikle aur baarish ki dua ki, phir Aap qibla-rukh ho gaye aur apni chadar ko palta.