Hum se Abu Asim ne bayan kiya, un se Umar Bin Saeed Bin Abi Husain ne bayan kiya, un se Ibn Abi Mulaikah ne aur un se Uqbah Bin Haris ne ke Abu Bakr (Radi Allahu Anhu) asar ki namaz se farigh ho kar masjid se bahar nikle to dekha ke Hasan (Radi Allahu Anhu) bacchon ke sath khel rahe hain. Aap ne un ko apne kandhe par bitha liya aur farmaya: Mere baap tum par qurban hon tum mein Nabi Kareem (Sallallahu Alaihi Wasallam) ki shabahat hai. Ali ki nahi. Ye sun kar Ali (Radi Allahu Anhu) hans rahe thay (khush ho rahe thay)
.

Hum se Ahmad Bin Yunus ne bayan kiya, kaha hum se Zubair ne bayan kiya, kaha hum se Ismail Bin Abi Khalid ne bayan kiya aur un se Abu Juhaifah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ko mein ne dekha tha. Hasan (Radi Allahu Anhu) mein aap ki poori shabahat maujood thi
.

Mujh se Amr Bin Ali Fallas ne bayan kiya, kaha hum se Ibn Fuzail ne bayan kiya, kaha hum se Ismail Bin Abi Khalid ne bayan kiya, kaha ke mein ne Abu Juhaifah (Radi Allahu Anhu) se suna. Wo bayan karte thay ke mein ne Nabi Kareem (Sallallahu Alaihi Wasallam) ko dekha hai, Hasan Bin Ali (Radi Allahu Anhuma) mein aap ki shabahat poori tarah maujood thi. Ismail Bin Abi Khalid ne kaha, mein ne Abu Juhaifah (Radi Allahu Anhu) se arz kiya ke aap Nabi Kareem (Sallallahu Alaihi Wasallam) ki sifat bayan karein. Unhon ne kaha aap safaid rang ke thay, kuch baal safaid ho gaye thay aur aap ne humein tera ontniyon ke diye jane ka hukam kiya tha. Lekin abhi hum ne un ontniyon ko apne qabza mein bhi nahi liya tha ke aap ki wafat ho gayi
.

Hum se Abdullah Bin Rajaa ne bayan kiya, kaha hum se Israel ne bayan kiya, un se Abu Ishaq ne, un se Wahb ne, un se Abu Juhaifah Sawai (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) ko dekha. Aap (Sallallahu Alaihi Wasallam) ke nichle hont mubarak ke neeche thori ke kuch baal safaid thay
.

Hum se Isam Bin Khalid ne bayan kiya, unhon ne kaha hum se Hareez Bin Usman ne bayan kiya aur unhon ne Nabi Kareem (Sallallahu Alaihi Wasallam) ke sahabi Abdullah Bin Busr (Radi Allahu Anhu) se poocha, kya Rasul Allah (Sallallahu Alaihi Wasallam) boodhe ho gaye thay? Unhon ne kaha ke aap (Sallallahu Alaihi Wasallam) ki thori ke chand baal safaid ho gaye thay
.

Mujh se Yahya Bin Bukair ne bayan kiya, kaha ke mujh se Laith ne bayan kiya, un se Khalid ne, un se Saeed Bin Abi Hilal ne, un se Rabee-ah Bin Abi Abdur Rahman ne bayan kiya ke mein ne Anas Bin Malik (Radi Allahu Anhu) se suna, aap ne Nabi Kareem (Sallallahu Alaihi Wasallam) ke ausaf-e-mubaraka bayan karte hue batlayai ke aap (Sallallahu Alaihi Wasallam) darmiyana qad ke thay. Na bahut lambe aur na choute qad wale. Rang khulta hua tha (surkh-o-safaid) na khali safaid thay aur na bilkul gandam goon. Aap ke baal na bilkul mare hue sakht qism ke thay aur na seedhe latke hue hi thay. Nuzool-e-wahi ke waqt aap ki umr chalis saal thi. Makkah mein aap ne das saal tak qiyam farmaya aur is poore arsa mein aap par wahi nazil hoti rahi aur Madinah mein bhi aap ka qiyam das saal tak raha. Aap ke sar aur darhi mein bees baal bhi safaid nahi hue thay. Rabee-ah (rawi-e-hadees) ne bayan kiya ke phir mein ne Aap (Sallallahu Alaihi Wasallam) ka ek baal dekha to wo laal tha mein ne is ke mutaliq poocha to mujhe bataya gaya ke khushbu lagate lagate laal ho gaya hai
.

Hum se Abdullah Bin Yusuf ne bayan kiya, unhon ne kaha hum ko Malik Bin Anas ne khabar di, unhein Rabee-ah Bin Abi Abdur Rahman ne aur unhon ne Anas Bin Malik (Radi Allahu Anhu) se suna, aap ne kaha ke Rasul Allah (Sallallahu Alaihi Wasallam) na bahut lambe thay aur na choute qad ke, na bilkul safaid thay aur na gandami rang ke. Na aap (Sallallahu Alaihi Wasallam) ke baal bahut zyada ghangriyalay thay aur na bilkul seedhe latke hue, Allah Ta'ala ne aap ko chalis saal ki umr mein nubuwwat di aur aap (Sallallahu Alaihi Wasallam) ne Makkah mein das saal tak qiyam kiya aur Madinah mein das saal tak qiyam kiya. Jab Allah Ta'ala ne aap (Sallallahu Alaihi Wasallam) ko wafat di to aap ke sar aur darhi ke bees baal bhi safaid nahi thay
.

Hum se Abu Abdullah Ahmad Bin Saeed ne bayan kiya, kaha hum se Ishaq Bin Mansoor ne bayan kiya, kaha hum se Ibrahim Bin Yusuf ne bayan kiya, un se un ke walid ne, un se Abu Ishaq ne bayan kiya ke mein ne Bara Bin Azib (Radi Allahu Anhuma) se suna, aap ne bayan kiya ke Rasul Allah (Sallallahu Alaihi Wasallam) husn-o-jamal mein bhi sab se barh kar thay aur jismani sakht mein bhi sab se behtar thay. Aap ka qad na bahut lanba tha aur na chouta (balkay darmiyana qad tha)
.

Hum se Abu Nuaim ne bayan kiya, kaha hum se Hammam ne bayan kiya, un se Qatada ne ke mein ne Anas (Radi Allahu Anhu) se poocha kya Rasul Allah (Sallallahu Alaihi Wasallam) ne kabhi khizab bhi istemal farmaya tha? Unhon ne kaha ke aap (Sallallahu Alaihi Wasallam) ne kabhi khizab nahi lagaya. Sirf aap (Sallallahu Alaihi Wasallam) ki dono kanpatiyon par (sar mein) chand baal safaid thay
.

Hum se Hafs Bin Umar ne bayan kiya, hum se Shuba ne bayan kiya, un se Abu Ishaq ne aur un se Bara Bin Azib (Radi Allahu Anhu) ne bayan kiya ke Rasul Allah (Sallallahu Alaihi Wasallam) darmiyana qad ke thay. Aap (Sallallahu Alaihi Wasallam) ka seena bahut kushada aur khula hua tha. Aap ke (sar ke) baal kaanon ki lo tak latakte rehte thay. Mein ne aap (Sallallahu Alaihi Wasallam) ko ek martaba ek surkh jore mein dekha. Mein ne aap (Sallallahu Alaihi Wasallam) se barh kar haseen kisi ko nahi dekha tha. Yusuf Bin Abi Ishaq ne apne walid ke wasta se «ila mankibaihi» bayan kiya (bajaye lafz «shahmatu uzunihi») yani aap ke baal mondhon tak pahunchte thay
.