Hum se Abu al-Yaman ne bayan kiya, kaha hum ko Shuayb ne khabar di, unhein Zuhri ne (doosri sanad) aur Layth bin Saad ne bayan kiya ke mujh se Yunus ne bayan kiya, in se Ibn Shihab ne, unhein Ubaidullah bin Abdullah bin Utbah ne khabar di aur unhein Abu Hurairah razi Allahu anhu ne khabar di ke ek dehati ne masjid mein peshab kar diya, log is ki taraf maarne ko barhe, lekin Rasool Allahsalla Allahu alaihi wasallam ne farmaya ke usay chhorr do aur jahan us ne peshab kiya hai is jagah par pani ka ek doul bhara hua baha do, kyunke tum aasani karne wale bana kar bheje gaye ho tangi karne wale bana nahi bheje gaye.

Hum se Musa bin Ismail ne bayan kiya, kaha hum se Hammaam ne, kaha hum se Ishaaq ne Anas bin Malik ke waaste se naql kiya ke Rasoolullah Sallallahu Alaihi Wasallam ne ek dehaati ko Masjid mein peshaab karte huwe dekha to logon se Aap Sallallahu Alaihi Wasallam ne farmaaya use chhod do jab woh faarigh ho gaya to paani manga kar Aap ne (us jagah) baha diya.

Hum se Abul Yamaan ne bayan kiya, unhon ne kaha hamein Sho’aib ne Zohri ke waaste se khabar di, unhon ne kaha mujhe Ubaidullah bin Abdullah bin ’Utbah bin Mas’ood ne khabar di ke Abu Hurairah Radhiallahu Anhu ne farmaaya ke ek a’raabi khada ho kar Masjid mein peshaab karne laga. To log us par jhapatne lage. (Yeh dekh kar) Rasoolullah Sallallahu Alaihi Wasallam ne logon se farmaaya ke use chhod do aur us ke peshaab par paani ka bhara huwa dol ya kuch kam bhara huwa dol baha do. Kiunki tum narmi ke liye bheje gaye ho, sakhti ke liye nahi.

Hum se Abdan ne bayan kiya, kaha hamein Abdullah ne khabar di, kaha hamein Yahya bin Sa’eed ne khabar di, kaha main ne Anas bin Malik Radhiallahu Anhu se suna, woh Rasoolullah Sallallahu Alaihi Wasallam se riwayat karte hain ke ek dehaati shakhs aaya aur us ne Masjid ke ek kone mein peshaab kar diya. Logon ne us ko mana kiya to Rasoolullah Sallallahu Alaihi Wasallam ne unhein rok diya. Jab woh peshaab kar ke faarigh huwa to Aap Sallallahu Alaihi Wasallam ne us (ke peshaab) par ek dol paani bahaane ka hukm diya. Chunanche baha diya gaya.

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, kaha ke mujhe Abu Salamah bin Abd-ur-Rahman ne khabar di aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ek namaz ke liye khare huay aur hum bhi Nabi Karim salla Allahu alaihi wasallam ke saath khare huay. Namaz parhte hi ek dehati ne kaha: Ae Allah! Mujh par raham kar aur Muhammad (salla Allahu alaihi wasallam) par aur hamare saath kisi aur par raham na kar. Jab Nabi Karim salla Allahu alaihi wasallam ne salam phera to dehati se farmaya ke tum ne ek wasee cheez ko tang kar diya Aap ki murad Allah ki rahmat se thi.

Hum se Abdullah bin Abd-ul-Wahhab ne bayan kiya, kaha hum se Hammad bin Zayd ne bayan kiya, in se Sabit ne aur in se Anas bin Malik razi Allahu anhu ne kaha ke ek dehati ne masjid mein peshab kar diya tha. Sahabah ikraam in ki taraf dore lekin Rasool Allahsalla Allahu alaihi wasallam ne farmaya ke is ke peshab ko mat roko. Phir Aap ne pani ka doul mangwaya aur woh peshab ki jagah par baha diya gaya.