Hum se Sulayman bin Harb ne bayan kiya, kaha hum se Shubah ne bayan kiya, in se Mansoor ne bayan kiya, kaha main ne Abu Wail se suna aur woh Abdullah bin Masood razi Allahu anhu se bayan karte thay ke unhon ne bayan kiya ke Rasool Allahsalla Allahu alaihi wasallam ne farmaya ”Musalman ko gaali dena gunah hai aur is ko qatl karna kufr hai.“ Ghundar ne Shubah se riwayat karne mein Sulayman ki mutabia-t ki hai.

Hum se Ahmad bin Abdullah bin ’Ali Manjooni ne bayan kiya, kaha hum se Rooh ne bayan kiya, kaha hum se ’Awf ne bayan kiya, unhon ne Hasan Basri aur Muhammed bin Sireen se, unhon ne Abu Hurairah Radhiallahu Anhu se ke Nabi Kareem Sallallahu Alaihi Wasallam ne farmaaya, jo koi imaan rakh kar aur sawab ki niyyat se kisi musalmaan ke janaaze ke saath jaaye aur Namaz aur dafan se faraghat hone tak us ke saath rahe to woh do Qiraat sawab le kar lautega har Qiraat itna bada hoga jaise Uhud ka pahaad, aur jo shakhs janaaze par Namaz padh kar dafan se pehle laut jaaye to woh ek Qiraat sawab le kar lautega. Rooh ke saath is Hadees ko Uthman Mu’azzin ne bhi riwayat kiya hai. Kaha hum se ’Awf ne bayan kiya, unhon ne Muhammed bin Sireen se suna, unhon ne Abu Hurairah Radhiallahu Anhu se, unhon ne Nabi Kareem Sallallahu Alaihi Wasallam se agli riwayat ki tarah.

Hum se Muhammed bin ’Ar’arah ne bayan kiya, woh kehte hain ke hum se Sho’bah ne bayan kiya, unhon ne Zubaid bin Haarith se, kaha main ne Abu Waail se Murjiyah ke baare main poocha, (woh kehte hain gunaah se aadmi faasiq nahi hota) unhon ne kaha ke mujh se Abdullah bin Mas’ood Radhiallahu Anhu ne bayan kiya ke Nabi Kareem Sallallahu Alaihi Wasallam ne farmaaya ke musalmaan ko gaali dene se aadmi faasiq ho jaata hai aur musalmaan se ladna kufr hai.

`Hum se Umar bin Hafs ne bayan kiya, kaha mujh se mere walid ne bayan kiya, kaha hum se A'mash ne bayan kiya, un se Shaqeeq ne bayan kiya, kaha ke Abdullah Radi Allahu Anhu ne bayan kiya ke Rasul Allah صلی اللہ علیہ وسلم ne farmaya ”Musalman ko gaali dena fisq hai aur is ko qatl karna kufr hai.“