Hum se Abdan ne bayan kiya , kaha hum ko Abdullah ne khabar di , kaha hum ko Yunus ne , unhein Zuhri ne , unhein Ali bin Husain ne khabar di , unhein Husain bin Ali razi Allahu anhuma ne khabar di ke Ali razi Allahu anhu ne bayan kiya (ke Hamza razi Allahu anhu ne hurmat e sharab se pehle sharab ke nashe mein jab in ki oontni zibah kar di aur unhon ne Nabi Karim salla Allahu alaihi wasallam se aa kar is ki shikayat ki to) Nabi Karim salla Allahu alaihi wasallam ne apni chadar mangwayi aur usay oarh kar tashreef le chalne lage . Main aur Zayd bin Harisa razi Allahu anhu Aap ke peeche peeche thay . Aakhir Aap is ghar mein pahunche jis mein Hamza razi Allahu anhu thay , Aap ne andar aane ki ijazat maangi aur unhon ne Aap hazrat ko ijazat di .

Hum se Abdan ne bayan kiya, unhon ne kaha ke humein Abdullah Bin Mubarak ne khabar di, unhon ne kaha ke humein Yunus ne khabar di, unhon ne kaha ke hum se Ibn Shihab ne, unhon ne kaha ke humein Zain-ul-Abidin Ali Bin Husain (Radi Allahu Anhu) ne khabar di, unhein Husain Bin Ali (Radi Allahu Anhu) ne khabar di ke Ali (Radi Allahu Anhu) ne farmaya ke ghanimat ke mal mein se mere hisse mein ek ont aaya tha aur ek doosra ont mujhe Nabi Kareem (Sallallahu Alaihi Wasallam) ne ”khumus“ mein se diya tha. Phir jab mera irada Rasul Allah (Sallallahu Alaihi Wasallam) ki sahibzadi Fatima (Radi Allahu Anha) ki rukhsati kara ke lane ka hua to mein ne Bani Qaynuqa ke ek sunar se tay kiya ke wo mere sath chale aur hum donon mil kar idhkhir ghaas (jama kar ke) layein kyunke mera irada tha ke usay sunaron ke hath bech kar apni shadi ke walima mein is ki qeemat ko lagaoon
.

Hum se Abdan ne bayan kiya, unhon ne kaha hum ko Abdullah Bin Mubarak ne khabar di, unhein Yunus ne, un se Zuhri ne bayan kiya, unhein Zain-ul-Abidin Ali Bin Husain ne khabar di aur unhein Husain Bin Ali (Radi Allahu Anhu) ne khabar di ke Ali (Radi Allahu Anhu) ne bayan kiya, jung-e-Badr ke mal-e-ghaneemat se mere hisse mein ek jawan ontni aayi thi aur Nabi Kareem (Sallallahu Alaihi Wasallam) ne bhi ek jawan ontni khums ke mal mein se di thi, jab mera irada hua ke Fatima (Radi Allahu Anha) Bint Rasul Allah (Sallallahu Alaihi Wasallam) se shadi karoon, to Bani Qainuqa (qabile Yahud) ke ek sahab se jo sunar thay, mein ne ye tay kiya ke wo mere sath chale aur hum dono izkhar ghaas (jangal se) layein. Mera irada ye tha ke mein wo ghaas sunaron ko bech doon ga aur is ki qemat se apne nikah ka waleema karoon ga. Abhi mein in dono ontniyon ka saman, palan aur thailay aur rasiyan jama kar raha tha. Aur ye dono ontniyan ek Ansari Sahabi ke ghar ke paas baithi hui theen ke jab sara saman faraham kar ke wapas aya to kya dekhta hoon ke meri dono ontniyon ke kohan kisi ne kaat diye hain. Aur un ke pait cheer kar andar se kaleji nikal li gayi hain. Jab mein ne ye haal dekha to mein be-ikhtiyar ro diya. Mein ne pucha ke ye sab kuch kis ne kiya hai? To logon ne bataya ke Hamza Bin Abdul Muttalib (Radi Allahu Anhu) ne aur wo isi ghar mein kuch Ansar ke sath sharab pee rahe hain. Mein wahan se wapas aa gaya aur seedha Nabi Kareem (Sallallahu Alaihi Wasallam) ki khidmat mein hazir hua. Aap ki khidmat mein is waqt Zaid Bin Harithah (Radi Allahu Anhu) bhi baithe hue thay. Aap (Sallallahu Alaihi Wasallam) mujhe dekhte hi samajh gaye ke mein kisi bade sadme mein hoon. Is liye Aap (Sallallahu Alaihi Wasallam) ne daryaft farmaya: "Ali! Kya hua?" Mein ne arz kiya Ya Rasul Allah! Mein ne aaj ke din jaisa sadma kabhi nahi dekha. Hamza (Radi Allahu Anhu) ne meri dono ontniyon par zulm kar diya. Dono ke kohan kaat dale aur un ke pait cheer dale. Abhi wo isi ghar mein kai yaaron ke sath sharab ki majlis jamaye hue maujood hain. Nabi Kareem (Sallallahu Alaihi Wasallam) ne ye sun kar apni chadar mangi aur ise odh kar paidal chalne lage. Mein aur Zaid Bin Harithah (Radi Allahu Anhu) bhi aap ke peechhe peechhe hue. Aakhir jab wo ghar aa gaya jis mein Hamza (Radi Allahu Anhu) maujood thay to aap ne andar aane ki ijazat chahi aur andar maujood logon ne aap ko ijazat de di. Wo log sharab pee rahe thay. Hamza (Radi Allahu Anhu) ne jo kuch kiya tha. Is par Rasul Allah (Sallallahu Alaihi Wasallam) ne unhein kuch malamat karna shuru ki. Hamza (Radi Allahu Anhu) ki ankhein sharab ke nashe mein makhmour aur surkh ho rahi theen. Unhon ne nazar utha kar Aap (Sallallahu Alaihi Wasallam) ko dekha. Phir nazar zara aur upar uthayi, phir wo Aap (Sallallahu Alaihi Wasallam) ke ghutnon par nazar le gaye is ke baad nigah aur utha ke Aap (Sallallahu Alaihi Wasallam) ki naaf ke qareeb dekhne lage. Phir chehre par jama di. Phir kehne lage ke tum sab mere baap ke ghulam ho, ye haal dekh kar Aap (Sallallahu Alaihi Wasallam) ne jab mehsoos kiya ke Hamza bilkul nashe mein hain, to Aap wahin se ulte paon wapas aa gaye aur hum bhi Aap ke sath nikal aaye
.

Hum se Abdan ne bayan kiya, kaha hum ko Abdullah Bin Mubarak ne khabar di, unhein Yunus Bin Yezid ne khabar di, (Doosri sanad) Imam Bukhari Rahimahullah ne kaha hum ko Ahmad Bin Salih ne khabar di, un se Anbasah Bin Khalid ne bayan kiya, kaha hum se Yunus ne bayan kiya, un se Zuhri ne, unhein Ali Bin Husain (Imam Zain-ul-Abidin) ne khabar di, unhein Husain Bin Ali Radi Allahu Anhuma ne khabar di aur un se Ali Radi Allahu Anhu ne bayan kiya ke jang-e-Badr ki ghanimat mein se mujhe ek aur oontni mili thi aur isi jang ki ghanimat mein se Allah Ta'ala ne Rasul Allah Sallallahu Alaihi Wasallam ka jo khums ke taur par hissa muqarrar kiya tha is mein se bhi Nabi Kareem Sallallahu Alaihi Wasallam ne mujhe ek oontni inayat farmai thi. Phir mera irada hua ke Nabi Kareem Sallallahu Alaihi Wasallam ki sahibzadi Fatimah Radi Allahu Anha ki ruksati kara laoon. Is liye Bani Qainuqa ke ek sunar se baat cheet ki ke wo mere sath chale aur hum izkhir ghaas layein. Mera irada tha ke mein is ghaas ko sunaron ke hath bech doon ga aur is ki qeemat walima ki dawat mein lagaoon ga. Mein abhi apni oontni ke liye palan, tokre aur rasiyan jama kar raha tha. Oontniyan ek Ansari Sahabi ke hujra ke qareeb baithi hui theen. Mein jin intezamat mein tha jab wo poore ho gaye to (oontniyon ko lene aaya) wahan dekha ke in ke kohan kisi ne kaat diye hain aur kookh cheer kar andar se kaleji nikal li hai. Ye halat dekh kar mein apne aansuon ko na rok saka. Mein ne poocha, ye kis ne kiya hai? Logon ne bataya ke Hamza Bin Abdul Muttalib Radi Allahu Anhu ne aur wo abhi isi hujra mein Ansar ke sath sharab noshi ki ek majlis mein mojood hain. In ke paas ek gaane wali hai aur in ke dost ahbab hain. Gaane wali ne gaate hue jab ye misra parha. Haan, ay Hamza! Ye umdah aur farbah oontniyan hain, to Hamza Radi Allahu Anhu ne kood kar apni talwar thami aur in dono oontniyon ke kohan kaat dale aur in ki kookh cheer kar andar se kaleji nikal li. Ali Radi Allahu Anhu ne bayan kiya ke phir mein wahan se Nabi Kareem Sallallahu Alaihi Wasallam ki khidmat mein hazir hua. Zaid Bin Harisah Radi Allahu Anhu bhi Nabi Kareem Sallallahu Alaihi Wasallam ki khidmat mein mojood thay. Aap Sallallahu Alaihi Wasallam ne mere gham ko pehle hi jaan liya aur farmaya ke kya baat pesh aayi? Mein bola: Ya Rasul Allah! Aaj jaisi takleef ki baat kabhi pesh nahi aayi thi. Hamza Radi Allahu Anhu ne meri dono oontniyon ko pakar ke in ke kohan kaat dale aur in ki kookh cheer dali hai. Wo yehein ek ghar mein sharab ki majlis jamaye baithe hain. Nabi Kareem Sallallahu Alaihi Wasallam ne apni chadar mubarak mangwayi aur ise odh kar aap tashreef le chale. Mein aur Zaid Bin Harisah Radi Allahu Anhu bhi sath sath holiye. Jab is ghar ke qareeb aap tashreef le gaye aur Hamza Radi Allahu Anhu ne jo kuch kiya tha is par unhein tanbih farmai. Hamza Radi Allahu Anhu sharab ke nashe mein mast thay aur in ki aankhein surkh theen. Unhon ne aap Sallallahu Alaihi Wasallam ki taraf nazar uthayi, phir zara aur upar uthayi aur aap ke ghutnon par dekhne lage, phir aur nazar uthayi aur aap ke chehra par dekhne lage. Phir kehne lage, tum sab mere baap ke ghulam ho. Aap Sallallahu Alaihi Wasallam samajh gaye ke wo is waqt bey-hosh hain. Is liye aap foran ulte paon is ghar se bahar nikal aaye, hum bhi aap ke sath thay
.